ຜູ້ປະກອບການສິນຄ້າ ໜຶ່ງເມືອງ ໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບ 110 ຫົວໜ່ວຍ ໄດ້ນໍາສິນຄ້າ ເຂົ້າຮ່ວມງານ ວາງສະແດງ ແລະ ຈຳໜ່າຍສິນຄ້າ ໜຶ່ງເມືອງ ໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ຂອງນະຄອນຫຼວງວຽງຈັນ ຄັ້ງທີ X ຢູ່ສູນການຄ້າລາວໄອເຕັກ ໃນລະຫວ່າງວັນທີ 14 – 22 ກັນຍາ 2024.
ພິທີເປີດງານວາງສະແດງມີຂຶ້ນໃນວັນທີ 16 ກັນຍາ 2024 ເຂົ້າຮ່ວມຂອງທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ທ່ານ ນາງ ວັນມະນີ ພິມມະສານ ຫົວໜ້າພະແນກ ອຸດສາຫະກໍາ ແລະ ການຄ້ານະຄອນຫຼວງວຽງຈັນ ມີເຈົ້າເມືອງ, ຮອງເຈົ້າເມືອງ, ຫົວໜ້າພະແນກ, ຮອງພະແນກ, ທ່ານປະທານສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ ແລະຫົວໜ້າຫ້ອງການອຸດສາຫະກຳ ແລະ ການຄ້າ 9 ຕົວເເມືອງພ້ອມ ຜູ້ປະກອບການ ຫົວໜ່ວຍທຸລະກິດ ເຂົ້າຮ່ວມ.
ທ່ານ ນາງ ວັນມະນີ ພິມມະສານ ກ່າວວ່າ: ການຈັດງານວາງສະແດງ ແລະ ຈຳໜ່າຍສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ(ODOP) ແມ່ນກິດຈະກຳໜື່ງທີ່ໄດ້ຈັດຕັ້ງປະຕິບັດຄັ້ງທີ I ໃນປີ 2014 ແລະ ຄັ້ງທີ IX ໃນປີ 2023; ສຳລັບປີ 2024 ເປັນຄັ້ງທີ X ເພື່ອປະຕິບັດຕາມນະໂຍບາຍການຊຸກຍູ້ສົ່ງເສີມ ການຜະລິດເປັນສິນຄ້າ ແລະການໂຄສະນາສິນຄ້າໃຫ້ແກ່ບັນດາຫົວໜ່ວຍຈຸນລະວິສາຫະກິດ, ທຸລະກິດຂະໜາດນ້ອຍ ແລະ ກາງ ທີ່ຢູ່ພາຍໃນນະຄອນຫຼວງວຽງຈັນ ແລະ ບັນດາແຂວງໃຫ້ມີຕາໜ່າງຕະຫຼາດຮອງຮັບຜະລິດຕະພັນທີ່ຜະລິດໄດ້ພາຍໃນຫຼາຍຂຶ້ນ ແລະເສີມສ້າງທ່າແຮງໃຫ້ແກ່ສິນຄ້າ ທີ່ໄດ້ຮັບຮອງໃຫ້ເປັນສິນຄ້າ ໜຶ່ງເມືອງໜຶ່ງຜະລິດຕະພັນ ແຫ່ງຊາດ ຂອງນະຄອນຫຼວງວຽງຈັນ, ບັນດາແຂວງທົ່ວປະເທດ ແລະ ສິນຄ້າຄອບຄົວຕົວແບບ ເພື່ອປະກອບສ່ວນໃນການຈັດຕັ້ງປະຕິບັດວາລະແຫ່ງຊາດໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ຂອງປະເທດ ກໍຄືນະຄອນຫຼວງວຽງຈັນ ໃນການເຂົ້າຫາຕະຫຼາດ ແລະມີຕະຫຼາດທີ່ໝັ້ນຄົງ. ພ້ອມນີ້ກໍເປັນການຊ່ວຍຟື້ນຟູຫົວໜ່ວຍ MSME ໃນຊ່ວງເສດຖະກິດພົບຄວາມຫຍຸ້ງຍາກ, ສະພາບອັດຕາແລກປ່ຽນເງິນຕາສູງຂຶ້ນ ຊຸກຍູ້ໃຫ້ມີການແລກປ່ຽນຊື້-ຂາຍສິນຄ້າ ຂັ້ນສູນກາງ, ນະຄອນຫຼວງວຽງຈັນ ແລະ ຂັ້ນເມືອງ ໂດຍການຈັດງານວາງສະແດງ-ຂາຍສິນຄ້າ, ງານຕະຫຼາດນັດຂາຍສິນຄ້າ ເປັນແຕລະໄລຍະ. ເພື່ອຮັບປະກັນໃຫ້ການຈັດງານດຳເນີນໄປຕາມແຜນການ ຄະນະຮັບຜິດຊອບໄດ້ກຳນົດການຈັດງານຂຶ້ນລະຫວ່າງວັນທີ 14 – 22 ກັນຍາ 2024 ຢູ່ທີ່ສູນການຄ້າ ລາວ-ໄອເຕັກ (ຕຶກເກົ່າ)
ໂຕເລກຫຼ້າສຸດເດືອນກັນຍາ 2024 ຫົວໜ່ວຍທຸລະກິດທີ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນ ແຫ່ງຊາດ ປະຈຸບັນມີທັງໝົດ 70 ຫົວໜ່ວຍ; ລວມມີ 291 ຜະລິດຕະພັນ ກວມເອົາ 62 ບ້ານ.
ສໍາລັບການຈັດງານ ນອກຈາກງານວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ແລ້ວ ພາຍໃນງານຍັງໄດ້ມີການຈັດກອງປະຊຸມຝຶກອົບຮົມ, ສໍາມະນາໃຫ້ຫົວໜ່ວຍສິນຄ້າທີ່ໄດ້ຮັບກາໝາຍ ODOP ແຫ່ງຊາດ, ຫົວໜ່ວຍຄອບຄົວຕົວແບບ, ບັນດາຫົວໜ່ວຍທຸລະກິດທີໄດ້ຮັບການຊ່ວຍເຫຼືອຈາກໂຄງການ ແລະ ສະຖາບັນການສຶກສາ ໃນຫົວຂໍ້:
- ຝຶກອົບຮົມດ້ານການຕະຫຼາດ ແລະ ການບໍລິຫານທຸລະກິດ ຈາກໂຄງການ TICA.
- ສໍາມະນາຫົວຂໍ້: ການພັດທະນາຜະລິດຕະພັນລາວໃຫ້ເປັນສິນຄ້າ ໜຶ່ງເມືອງໜຶ່ງຜະລິດຕະພັນ
ແຫ່ງຊາດ ແລະ ເພື່ອການສົ່ງອອກສູ່ຕະຫຼາດສາກົນ.
– ພ້ອມດຽວກັນນີ້ ຍັງມີກິດຈະກໍາການຈໍາໜ່າຍສິນຄ້າບໍລິໂພກໃນລາຄາຖືກ ເພື່ອເປັນການກະຕຸ້ນ
ເສດຖະກິດ ແລະ ຊ່ວຍຜູ້ທີ່ມີລາຍຮັບຕໍ່າ ແລະ ກິດຈະກໍາຂາຍເຂົ້າແຊກແຊງ ຊ່ວຍສັງຄົມ.
ການຈັດງານໃນຄັ້ງນີ້ ມີຫົວໜ່ວຍທຸລະກິດເຂົ້າຮ່ວມ 110 ຫົວໜ່ວຍ, ຈໍານວນ 151 ຫ້ອງ ໄດ້ແຍກລາຍລະອຽດມີດັ່ງນີ້ :
– ສິນຄ້າ ໜຶ່ງເມືອງໜຶ່ງຜະລິດຕະພັນຂອງນະຄອນຫຼວງວຽງຈັນ ແລະຕ່າງແຂວງ ຈຳນວນ 45 ຫົວໜ່ວຍ. ສໍາລັບສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ ຈາກຕ່າງແຂວງ ເຂົ້າຮ່ວມມີຈໍານວນ08 ແຂວງ ຄື : ຫຼວງພະບາງ, ຫຼວງນໍ້າທາ, ອຸດົມໄຊ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກ ແລະ ສາລະວັນ.
– ສິນຄ້າຄອບຄົວຕົວແບບ ຈຳນວນ 39 ຫົວໜ່ວຍ
– ສິນຄ້າອຸດສາຫະກຳປຸງແຕ່ງ ແລະ ຫັດຖະກຳ ຈຳນວນ 13 ຫົວໜ່ວຍ
– ສິນຄ້າສະພາການຄ້າ ແລະອຸດສາຫະກໍາ ຈໍານວນ 8 ຫົວໜ່ວຍ
– ຂະແໜງການທ່ອງທ່ຽວ ຈຳນວນ 5 ຫົວໜ່ວຍ
– ຄາດຄະເນມູນຄ່າສິນຄ້າມາວາງຂາຍພາຍໃນງານ ຈຳນວນ 9 ວັນ ມູນຄ່າ 3,886 ຕື້ກີບ.
ໃນງານຄັ້ງນີ້ພວກເຮົາຍັງມີພິທີ ປະກາດຫົວໜ່ວຍທີ່ໄດ້ຮັບກາໝາຍສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ ປະຈຳປີ 2024 ຂອງນະຄອນຫຼວງວຽງຈັນ ຈຳນວນ 2 ຫົວໜ່ວຍ, ພິທີປະດັບດາວນາມມະຍົດສິນຄ້າ ໜຶ່ງເມືອງໜຶ່ງຜະລິດຕະພັນແຫ່ງຊາດ ຈໍານວນ 10 ຫົວໜ່ວຍ. ພາຍໃນງານພວກເຮົາຍັງມີບູດພາວິນລຽນ ເພື່ອວາງສະແດງສິນຄ້າທ່າແຮງ, ສິນຄ້າຕົວແບບ ຂອງເມືອງສີສັດຕະນາກ ໂດຍໄດ້ັບການສະໜັບສະໜູນຈາກສະພາການຄ້າ ແລະ ອຸດສາຫະກໍາ ເມືອງສີສັດຕະນາກ ຮ່ວມກັບ ບໍລິສັດກິດຕະພົງກຣຸບ.
