ກ໊ອກກ໊ອກ ມາດ ( KOKKOK Mart ) ຮ່ວມກັບ ຂຽງ ລາວ ( Khiang Laos ) ສະຕີດຟູດ ຈັດພິທີເປີດ ສາຂາໜອງບອນ ຫວັງຈະເປັນສູນລວມດ້ານການບໍລິໂພກ ຄົບຈົບໃນບ່ອນດຽວ
ພິທີດັ່ງກ່າວ ເຂົ້າຮ່ວມໂດຍ ທ່ານ ນາງ ຖາວອນ ວົງສົມບັດ ປະທານກຸ່ມ ບໍລິສັດ ໂຄລາວ ກຣຸບ, ທ່ານ ຊູນິນ ຈິນຕະນາການສາກົນ ຜູ້ອໍານວຍການ ຝ່າຍປະຕິບັດການ ກ໊ອກກ໊ອກ ມາດ, ທ່ານ ຊີຮຸວັດ ຊັດຊະວານ ຮອງປະທານເຈົ້າໜ້າທີ່ ບໍລິຫານ ກຸ່ມທຸລະກິດແບຣນໄທ ແລະ ແຟຣນໄຊ, ທ່ານ ນາງ ປຣະພາວະດີ ກຸວະສານ ຜູ້ອໍານວຍການ ບໍລິສັດ ເນັສຊັດ ໂຊ ຈໍາກັດ ຜຸູ້ດຽວ, ທ່ານ ນາງ ຜົນດາລາ ສົມສະນິດ ຜູ້ອໍານວຍການ ບໍລິສັດ ອິນເຕີເວຍ ບໍລິຫານອະສັງຫາລິມະຊັບ ຈໍາກັດຜູ້ດຽວ ແລະ ທ່ານ ນາງ ຈັນເພັງ ວົງສົມບັດ ຜູ້ອຳນວຍການ ທະນາຄານອິນໂດຈີນ ພ້ອມດ້ວຍຄະນະ, ລູກຄ້າ ແລະ ສື່ມວນຊົນເຂົ້າຮ່ວມ.
ທ່ານ ຊູນິນ ຈິນຕະນາການສາກົນ ຜູ້ອໍານວຍການ ຝ່າຍປະຕິບັດການ ກ໊ອກກ໊ອກ ມາດ ກ່າວໃນພິທີວ່າ: ຮູ້ສຶກເປັນກຽດຢ່າງຍິ່ງທີ່ໄດ້ຕ້ອນຮັບ ແລະ ສະແດງຄວາມຍິນດີກັບ KOKKOK Mini Mart ສາຂາໜອງບອນ ເຊິ່ງເປັນສາຂາທີ 44 ທີ່ເຂົ້າຮ່ວມທຸກລະກິດກັບພວກເຮົາ, ຄວາມສໍາເລັດນີ້ເປັນສ່ວນສໍາຄັນທີ່ຊ່ວຍໃຫ້ພວກເຮົາຂະຫຍາຍທຸລະກິດສູ່ຊຸມຊົນໜອງບອນໄດ້ສໍາເລັດ, ເຊິ່ງເຮົາມີແຜນຂະຫຍາຍສາຂາໄປທົ່ວປະເທດ ທັງໄຮເປີມາເກັດ 20 ສາຂາ ແລະ ມິນິມາດ ອີກ 2.000 ສາຂາ ພາຍໃຕ້ແນວຄວາມຄິດ 1 ໜູ່ບ້ານ 1 ສາຂາ ເຊິ່ງພວກເຮົາຫວັງທີ່ຈະເປັນສ່ວນເສີມລະບົບການຜະລິດ ແລະ ສະໜອງສິນຄ້າພາຍໃນປະເທດໃຫ້ເຂັ້ມແຂງ ແລະ ຈະເລີນເຕີບໂຕໄປພ້ອມກັນ.
“ ພິເສດ ພວກເຮົາຍັງມີຄວາມຍິນດີທີ່ຈະເປີດຕົວຮ້ານຂຽງ ( Khiang Laos ) ສາຂາທໍາອິດໃນລາວ ຕັ້ງຢູ່ໃນ Kokkok Franchise ສາຂາໜອງບອນ ແຫ່ງນີ້ ເຊິ່ງຮ້ານຂຽງ ເປັນຮ້ານອາຫານທີ່ມີສຽງສຽງຈາກປະເທດໄທ ແລະ ພວກເຮົາໝັ້ນໃຈວ່າ ຄວາມຮ່ວມມືລະຫວ່າງ Kokkok Franchise ແລະ ຮ້ານຂຽງ ສາມາດມອບປະສົບການຮັບປະທານອາຫານທີ່ໂດດເດັ່ນໃຫ້ກັບທຸກທ່ານໃນຟື້ນທີ່ນີ້ ເພື່ອຕອກຢໍ້າແນວຄວາມຄິດ “ ອີ່ມ ຄົບ ຈົບທີ່ດຽວ ” ທ່ານ ຊູນິນ ຈິນຕະນາການສາກົນ ກ່າວ.
ສໍາລັບ ກ໊ອກກ໊ອກ ມາດ ( KOKKOK Mart ) ສາຂາໜອງບອນ ຕັ້ງຢູ່ໃນຕຶກໂຄລາວ ທາວເວີ 2 ຊັ້ນ 1 ແມ່ນເປີດໃຫ້ບໍລິການທາງການໃນວັນທີ 16 ກັນຍາ 2024 ເຊິ່ງໃນຈະມີໂປຣໂມຊັນຫຼາຍຢ່າງ ລວມທັງການແຈກຖາມ. ພິເສດພາຍໃນຮ້ານຍັງມີ ຂຽງ ລາວ ( Khiang Laos ) ສະຕີດຟູດ ພ້ອມເມນູຕົ້ນຕໍາລັບຈາກປະເທດໄທ ໃຫ້ບໍລິການຄົບເຄື່ອງໃນບ່ອນດຽວອີກດ້ວຍ.
