ໃນວັນທີ 14 ກັນຍາ 2024 ນີ້ ຄະນະກຳມະການຄຸ້ມຄອງໄພພິບັດຂັ້ນສູນກາງ ຮ່ວມກັບ ທະນາຄານການຄ້າຕ່າງປະເທດ ມະຫາຊົນ ໄດ້ຕັດສິນໃຈເປີດນຳໃຊ້ ລະບົບ One-Heart ເພື່ອລະດົມທຶນຈາກສັງຄົມ, ບຸກຄົນ ແລະ ນິຕິບຸກຄົນ ຊ່ວຍເຫລືອບັນດາແຂວງທີ່ໄດ້ຮັບກະທົບຈາກໄພພິບັດ ໃນ 14 ແຂວງ ລວມທັງແຂວງຫລວງນໍ້າທາ.
ການເປີດລະບົບ One-Heart ຈາກທະນາຄານການຄ້າຕ່າງປະເທດມະຫາຊົນ ຄັ້ງນີ້ ແມ່ນເລີ່ມແຕ່ວັນທີ 14 ກັນຍາ ເຖິງ 30 ພະຈິກ 2024 ເຊິ່ງຈຳນວນເງິນທີ່ໄດ້ຈາກລະບົບດັ່ງກ່າວ, ຄະນະກຳມະການຄຸ້ມຄອງໄພພິບັດຂັ້ນສູນກາງ ຈະຈັດສັນໄປຊ່ວຍເຫລືອຟື້ນຟູໃຫ້ບັນດາແຂວງ ທີ່ໄດ້ຮັບຜົນກະທົບຈາກໄພພິບັດ ໃນປີ 2024 ນີ້.
ທ່ານ ວົງຄຳ ພັນທະນຸວົງ ຫົວໜ້າກົມສັງຄົມສົງເຄາະ, ກອງເລຂາຄະນະກໍາມະການຄຸ້ມຄອງໄພພິບັດ ຕາງໜ້າໃຫ້ທາງຄະນະກຳມະການຄຸ້ມຄອງໄພພິບັດຂັ້ນສູນກາງ ລາຍງານຫຍໍ້ສະພາບໄພພິບັດທີ່ເກີດຂຶ້ນໃນ ລະຫວ່າງວັນທີ 18 ກໍລະກົດ ຫາ 21 ສິງຫາ 2024 ຜ່ານມາພາຍຸດີເປຣຊັນ, ພາຍຸໝຸນເຂດຮ້ອນ ພຣະພິຣຸນ ແລະ ໃນວັນທີ 08-13 ກັນຍາ 2024 ລົມພາຍຸໄຕ້ຝຸ່ນ ຢາກິ ໄດ້ພັດຜ່ານເຂົ້າ ສປປ ລາວ ກໍໃຫ້ເກີດມີເຫດການລົມພັດແຮງ ແລະ ເກີດ ນໍ້າຖ້ວມ ເຊິ່ງສົ່ງຜົນກະທົບ ຢູ່ພາກເໜືອ, ພາກກາງ ແລະ ພາກໃຕ້ ຂອງ ສປປ ລາວ ທັງໝົດ 14 ແຂວງ, 99 ເມືອງ, 1.099 ບ້ານ, 46.545 ຄອບຄົວ, ພົນລະເຮືອນ 177.641 ຄົນ, ຍິງ 85.286 ຄົນ, ເສີຍຊີວິດ 5 ຄົນ, ບາດເຈັບ 2 ຄົນ, ຄອບຄົວຖືກຍົກຍ້າຍຊົ່ວຄາວ649 ຄອບຄົວ (34.763 ຄົນ), ເຮືອນເສຍຫາຍ 195 ຫລັງ, ເນື້ອທີ່ທຳການຜະລິດ 12.614,15 ເຮັກຕາ, ເສັ້ນທາງ 263 ເສັ້ນ, ຂົວ 12 ແຫ່ງ, ຊົນລະປະທານ 87 ແຫ່ງ, ໂຮງໝໍ/ສຸກສາລາ 9 ແຫ່ງ, ນໍ້າລິນ 37 ແຫ່ງ, ໜອງປາ 398 ໜອງ, ສັດລ້ຽງ (ງົວ, ຄວາຍ, ແບ້, ໝູ ແລະ ສັດປີກ) ລວມທັງໝົດ 13.665 ໂຕ ທີ່ໄດ້ຮັບຜົນກະທົບ ແລະ ຜົນເສຍຫາຍ, ຄາດຄະເນມູນຄ່າຜົນເສຍຫາຍເບື້ອງຕົ້ນ 477 ຕື້ກວ່າກີບ.
ຕໍ່ກັບສະພາບການດັ່ງກ່າວ, ຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະ ຂັ້ນທ້ອງຖິ່ນ ໄດ້ຊີ້ນຳ-ນຳພາ ກຳລັງປ້ອງກັນຊາດ ແລະ ປ້ອງກັນຄວາມສະຫງົບ ລົງໄປຊ່ວຍຍົກຍ້າຍປະຊາຊົນ, ເຄື່ອງຂອງ ແລະ ສັດລ້ຽງ ໄປຢູ່ບ່ອນທີ່ປອດໄພ, ໄດ້ຈັດຕັ້ງທີມແພດ ລົງໄປບໍລິການດ້ານສຸຂະອະນາໄມ ຢູ່ພື້ນທີ່ຕົວຈິງ, ໄດ້ຈັດສົ່ງເຄື່ອງຊ່ວຍ ເຫລືອເບື້ອງຕົ້ນ ໄປໃຫ້ບັນດາແຂວງທີ່ປະສົບໄພພິບັດ ໃນ 14 ແຂວງ ເປັນຕົ້ນ ເຂົ້າກິນ, ອາຫານແຫ້ງ, ນໍ້າດື່ມ, ສັງ ກະສີ, ເຄື່ອງໃຊ້ຄົວເຮືອນ ຈຳນວນໜຶ່ງ, ນໍາໃຊ້ລົດຜະລິດນໍ້າສະອາດ ແລະ ລົດສະແຕັກນໍ້າ ເພື່ອຜະລິດ ແລະຂົນສົ່ງນໍ້າໃຫ້ປະຊາຊົນນໍາໃຊ້, ພົ່ນຢາຂ້າຍຸງລາຍໃນເຂດທີ່ໄດ້ຮັບຜົນກະທົບ, ສະໜອງຢາປົວພະຍາດ, ສ້ອມແປງເສັ້ນທາງເບື້ອງຕົ້ນ ເພື່ອສາມາດນຳໃຊ້ໄປມາຫາກັນໄດ້.
ພ້ອມນີ້, ກໍໄດ້ມອບເງິນເພື່ອສົມທົບເຂົ້າກອງທຶນຄຸ້ມຄອງໄພພິບັດໃຫ້ບັນດາແຂວງທີ່ໄດ້ຮັບຜົນກະທົບຈາາກໄພພິບັດ, ເນື່ອງຈາກວ່າສະພາບໄພພິບັດໄດ້ແຜ່ເປັນວົງກວ້າງກະ ທົບຫລາຍແຂວງ, ການຊ່ວຍເລືອສຸກເສີນ ແລະ ຟື້ນຟູແມ່ນຍັງມີມູນຄ່າສູງ. ສະນັ້ນ ການເປີດນຳໃຊ້ລະບົບ BCEL OneHeart ເພື່ອລະດົມທຶນບໍລິຈາກຊ່ວຍເຫລືອຜູ້ປະສົບໄພພິບັດ ປີ 2024 ຈະສາມາດແບ່ງເບົາ, ຊ່ວຍເຫລືອຜູ້ປະສົບໄພ ເຊິ່ງເງິນທີ່ໄດ້ຈາກລະບົບດັ່ງກ່າວ, ຄະນະກຳມະການຄຸ້ມຄອງໄພພິບັດ ຈະນຳໃຊ້ໃຫ້ຖືກເປົ້າໝາຍ ເພື່ອໃຫ້ສາມາດຊ່ວຍໃຫ້ຄົບທຸກແຂວງທີ່ໄດ້ຮັບຜົນກະທົບ.
ນາງ ສາຍສະໝອນ ຈັນທະຈັກ ຜູ້ອໍານວຍການທະນາຄານການຄ້າຕ່າງປະເທດລາວ ມະຫາຊົນ ໄດ້ກ່າວວ່າ: ປັດຈຸບັນ ສປປ ລາວ ກຳລັງປະສົບກັບໄພນໍ້າຖ້ວມ ແລະ ໄດ້ຂະຫຍາຍອອກໄປໃນຫລາຍແຂວງໃນຂອບເຂດທົ່ວປະເທດ ລວມທັງຢູ່ນະຄອນຫລວງວຽງຈັນ. ຈາກສະພາບການດັ່ງກ່າວ ຄະນະກຳມະການຄຸ້ມຄອງໄພພິບັດຂັ້ນສູນກາງ ໄດ້ສົມທົບກັບທະນາຄານການຄ້າຕ່າງປະເທດລາວມະຫາຊົນ ຈັດກິດຈະກຳ ລະດົມທຶນບໍລິ ຈາກຊ່ວຍເຫລືອຜູ້ປະສົບໄພພິບັດ ປີ 2024 ຜ່ານ BCEL OneHeart ຂອງທະນາຄານການຄ້າຕ່າງປະເທດລາວ ມະຫາຊົນ ໃນຄັ້ງນີ້, ກໍເພື່ອແບ່ງເບົາຄວາມຫຍຸ້ງຍາກໃຫ້ແກ່ຜູ້ປະສົບໄພພິບັດນໍ້າຖ້ວມ, ສຳລັບທ່ານໃດມີຈຸດປະສົງຊ່ວຍເຫລືອຜູ້ປະສົບໄພ ສາມາດບໍລິຈາກທຶນສົມທົບຜ່ານລະບົບດັ່ງກ່າວໄດ້ຕະຫລອດ 24 ຊົ່ວໂມງນັບແຕ່ຕອນບ່າຍຂອງວັນທີ 14 ກັນຍາ 2024. ສຳລັບການບໍລິຈາກແມ່ນ ບໍ່ຈຳເປັນຕ້ອງມີບັນຊີເງິນຝາກຢູ່ທະນາຄານການຄ້າ ກໍສາມາດບໍລິຈາກໄດ້ ສ່ວນຄົນທີ່ຢູ່ຕ່າງປະເທດ ກໍສາມາດຮ່ວມບໍລິຈາກໄດ້ໂດຍຜ່ານບັດສາກົນ ເຊັ່ນ: VISA, Master Card, UnionPay ແລະ JCB ຜ່ານເວັບໄຊ www.oneheart.la ເຊິ່ງ ທຄຕລ ຈະຮັບຜິດຊອບຄ່າທຳນຽມ 2,5% ທີ່ສູນບັດສາກົນເກັບຈາກຜູ້ຖືບັດ.
ໃນໂອກາດດັ່ງກ່າວ, ທະນາຄານການຄ້າຕ່າງປະເທດລາວມະຫາຊົນ ກໍໄດ້ມອບເງິນຂອງທະນາຄານ 1 ຕື້ກີບ ເພື່ອຊ່ວຍເຫລືອຜູ້ປະສົບໄພພິບັດ ໃນຂອບເຂດທົ່ວປະເທດ ໂດຍມອບໃຫ້ກັບຄະນະກໍາມະການຄຸ້ມຄອງໄພພິ ບັດຂັ້ນສູນກາງ ເປັນຕົວແທນໄປມອບຕໍ່. ພ້ອມທັງເຊື່ອໝັ້ນວ່າ ເງິນຈຳນວນດັ່ງກ່າວ, ຈະຖືກນຳໃຊ້ໃຫ້ເກີດປະ ໂຫຍດສູງສຸດສໍາລັບຜູ້ປະສົບໄພ.
ຂ່າວຈາກ: ຂປລ
