ວິທະຍຸກະຈາຍສຽງແຫ່ງຊາດລາວລາຍງານວ່າ: ວັນທີ 15 ກັນຍາ 2024 ທ່ານ ທອງລຸນ ສີສຸລິດ ປະທານປະເທດ ໄດ້ລົງຕິດຕາມ ແລະ ໃຫ້ກຳລັງໃນປະຊາຊົນທີ່ຖືກນ້ຳຖ້ວມ ແລະ ພະນັກງານ ທະຫານ ຕຳຫຼວດ ທີ່ກຳລັງປະຕິບັດໜ້າທີ່ປ້ອງກັນນ້ຳຖ້ວມຢູ່ຈຸດຕ່າງໆ ໃນຕົວນະຄອນຫຼວງວຽງຈັນ.
ການລົງຕິດຕາມສະພາບນ້ຳຖ້ວມບັນດາບ້ານ ແລະ ເມືອງທີ່ຢູ່ລຽບຕາມແຄມແມ່ນ້ຳຂອງໃນ ນວ ຄັ້ງນີ້ເລີ່ມຕົ້ນໄປເບິ່ງນ້ຳຖ້ວມທາງເລກທີ 11 ຈຸດຄ້ອຍແລນມາກຊາຍແດນບ້ານອ່າງໃຫຍ່ເມືອງສີໂຄດຕະບອງ-ບ້ານສຳພັນນາເມືອງສັງທອງ ເຊິ່ງຖ້ວມເສັ້ນທາງມີຄວາມຍາວປະມານກິໂລແມັດປາຍ ເລິກປະມານ 60-70 ຊັງຕີແມັດ ແລະ ຈຸດບ້ານແກ້ງໝໍ້-ທ່ານາສ້າງຫີນເມືອງສັງທອງ ຖ້ວມມີຄວາມຍາວປະມານ 500 ແມັດ ເລິກປະມານ 70-90 ຊັງຕີແມັດ ເລີ່ມຖ້ວມມາແຕ່ວັນທີ 10 ກັນຍາ 2024 ເປັນຕົ້ນມາ ໄລຍະຖ້ວມນີ້ປະເພດໃຫຍ່ທີ່ຕ່ຳ ແລະ ລົດຈັກບໍ່ສາມາດໄປມາໄດ້ຈຸດດັ່ງກ່າວ ແຕ່ມີລົດທະຫານ ຕຳຫຼວດ ແລະ ລົດບໍລິສັດ ວຽງຈັນອຸດສາຫະກຳໄມ້ປ່ອງ ໃຫ້ການຊ່ວຍເຫຼືອຂົນສົ່ງລົດຈັກ ແລະ ຄົນຂ້າມໄປມາ ແຕ່ມາຮອດວັນທີ 15 ກັນຍາ 2024 ນໍ້າໄດ້ເລີ່ມຫຼຸດລົງແລ້ວປະມານ 10 ຊັງຕີແມັດ. ໃນໂອກາດນີ້ ນວ ຍັງໄດ້ມອບເຄື່ອງປະເພດເຄື່ອງບໍລິໂພກ -ອຸປະໂພກໃຫ້ປະຊາຊົນບ້ານສຳພັນນາປະມານ 350 ຖົງ ເພື່ອເປັນການບັນເທົາທຸກ.
ນອກຈາກລົງຕິດຕາມຈຸດນ້ຳຖ້ວມຢູ່ເມືອງສັງທອງແລ້ວ ທ່ານປະທານປະເທດພ້ອມດ້ວຍຄະນະຍັງໄດ້ລົງຕິດຕາມ ແລະ ໃຫ້ກຳລັງໃຈພະນັກງານ ທະຫານ ຕຳຫຼວດ ແລະ ປະຊາຊົນ ຊາວ ນວ ທີ່ກຳລັງປະຕິບັດໜ້າທີ່ຫ່າຍເປົາຊາຍເພື່ອເຮັດຄູປ້ອງກັນນ້ຳຖ້ວມຢູ່ຈຸດບ້ານໜອງດາ-ໂນນຂີ້ເຫຼັກ ເມືອງສີໂຄດຕະບອງ ຈຸດປະຕູນ້ຳສວນເຈົ້າອານຸວົງ ເມືອງຈັນທະບູລີ ແລະ ເຂດທ່າເຮືອຫຼັກ 4 ເມືອງສີສັດຕະນາກຕື່ມອີກ.
ໃນໂອກາດທີ່ລົງຕິດຕາມນ້ຳຖ້ວມແຕ່ລະຈຸດນັ້ນ ທ່ານປະທານປະເທດ ໄດ້ໃຫ້ກຳລັງໃຈປະຊາຊົນຜູ້ທີ່ປະສົບໄພນ້ຳຖ້ວມ ແຕ່ລະຄອບຄົວຕ້ອງສູ້ຊົນອົດທົນຄວາມລຳບາກໄປນຳກັນ ເຊິ່ງຄາດວ່າອີກບໍ່ດົນນ້ຳຂອງອາດຈະບົກແຫ້ງລົງເປັນປົກກະຕິ ເນື່ອງຈາກປັດຈຸບັນກຳລັງບົກແຫ້ງລົງເທື່ອລະໜ້ອຍແລ້ວ ແລະ ເຫດການນ້ຳຖ້ວມຄັ້ງນີ້ແມ່ນຍ້ອນໄພທຳມະຊາດພາຍຸເຮັດໃຫ້ສາຂາຂອງແມ່ນ້ຳຂອງ ແລະ ນ້ຳຂອງຂຶ້ນສູງຖ້ວມຫຼາຍແຂວງທົ່ວປະເທດ ແລະ ປະເທດໃກ້ຄຽງລາວຂອງພວກເຮົາ.
ພ້ອມນີ້ທ່ານຍັງໄດ້ສະແດງຄວາມຍ້ອງຍໍຊົມເຊີຍມາຍັງການນຳທຸກພາກສ່ວນ ທັງກະຊວງ-ອົງການ ນວ ເມືອງ ແລະ ບ້ານທີ່ໄດ້ນຳເອົາພະນັກງານ ທະຫານ ຕຳຫຼວດ ແລະ ປະຊາຊົນ ມາຊ່ວຍປ້ອງກັນນ້ຳຖ້ວມທັງເວັນ ແລະ ຄືນຈົນສາມາດປ້ອງກັນຈຸດທີ່ຕ່ຳເຂດຫຼໍ່ແຫຼມໄດ້ .ທ່ານຍັງໄດ້ຮຽກຮ້ອງໃຫ້ສືບຕໍ່ເຝົ້າລະວັງຕະຫຼອດ 24 ຊົ່ວໂມງ ຈົ່ງພ້ອມກັນກຽມພ້ອມກຳລັງແຮງຈາກທຸກພາກສ່ວນປະກອບສ່ວນປ້ອງກັນນ້ຳຖ້ວມຕົວເມືອງ ນວ ໃຫ້ໄດ້.
