ບໍລິສັດ ແຟເຊັດພັດທະນາແຫຼ່ງທ່ອງທ່ຽວທຳມະຊາດ ຈຳກັດ ຜູ້ພັດທະນາແຫຼ່ງທ່ອງທ່ຽວ ນໍ້າກັດຢໍລະປ່າ ແລະ ນໍ້າປຽນຢໍລະປ່າ ຈະເຂົ້າພັດທະນາ ສະຖານທີ່ທ່ອງທ່ຽວທຳມະຊາດແບບອະນຸຮັກ ດອນຄອນ ຢໍລະປ່າ ໃນເນື້ອທີ່ຫຼາຍກວ່າ 41 ເຮັກຕາ ຢູ່ບ້ານດອນຄອນ ເມືອງໂຂງ ແຂວງຈຳປາສັກ.
ວັນທີ 10 ກັນຍາ 2024, ໄດ້ມີພິທີເຊັນສັນຍາສຳປະທານ ( ຊີເອ ) ຫຼື Concession Agreement ( CA ) ໂຄງການພັດທະນາສະຖານທີ່ທ່ອງທ່ຽວທຳມະຊາດແບບອະນຸຮັກ ດອນຄອນ ຢໍລະປ່າ ( Don Khone Yorlapa ) ຢູ່ບ້ານດອນຄອນ ເມືອງໂຂງ ແຂວງຈຳປາສັກ.
ຮ່ວມລົງນາມລະຫວ່າງ ທ່ານ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ສົມເພັດ ມ້າວປະເສີດ ປະທານ ບໍລິສັດ ແຟເຊັດພັດທະນາແຫຼ່ງທ່ອງທ່ຽວທຳມະຊາດ ຈຳກັດຜູ້ດຽວ, ທ່ານ ວັນນະໄຊ ຊາດຕະກຸນ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ທ່ານ ຄໍາ ນີລາວົງ ວ່າການຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ບຸນເຮັງ ກົມປະເສີດ ຮອງເຈົ້າເມືອງໂຂງ. ຝ່າຍບໍລິສັດ ລົງນາມເປັນພິຍານມີ ທ່ານ ເບັນຈາມິນ ດາອູ ຜູ້ຈັດການບໍລິສັດ ແຟເຊັດພັດທະນາແຫຼ່ງທ່ອງທ່ຽວທຳມະຊາດ ຈຳກັດຜູ້ດຽວ ໂດຍມີ ທ່ານ ອະລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ການເຊັນສັນຍາສໍາປະທານຄັ້ງນີ້ ແມ່ນປະຕິບັດຕາມຂໍ້ຕົກລົງຂອງແຂວງຈຳປາສັກ ເລກທີ 957/ຈຂ.ຈສ ລົງວັນທີ 21 ສິງຫາ 2024 ວ່າດ້ວຍການມອບສິດໃຫ້ພະແນກແຜນການ ແລະ ການລົງທຶນແຂວງ ຕາງໜ້າອົງການປົກຄອງແຂວງ ເຊັນສັນຍາສໍາປະທານໂຄງການພັດທະນາສະຖານທີ່ທ່ອງທ່ຽວທຳມະຊາດແບບອະນຸຮັກ ດອນຄອນ ຢໍລະປ່າ ກັບ ບໍລິສັດ ແຟເຊັດ ພັດທະນາແຫຼ່ງທ່ອງທ່ຽວທໍາມະຊາດ ຈຳກັດຜູ້ດຽວ.
ໂຄງການພັດທະນາດັ່ງກ່າວ ມີໄລຍະສໍາປະທານ 50 ປີ ເນື້ອທີ່ສໍາປະທານຢູ່ບ້ານດອນຄອນ ເມືອງໂຂງ, ມີເນື້ອທີ່ທັງໝົດ 41 ເຮັກຕາ 6.263 ຕາແມັດ ມີ 3 ຈຸດ ຄື: ຈຸດທີ 1 ຂອບເຂດປ່າສະຫງວນພູດຳດວນ ເນື້ອທີ່ຈໍານວນ 21 ເຮັກຕາ 929 ຕາແມັດ ສ້າງເປັນເສັ້ນທາງຜ່ານບ້ານ ( ທາງເບຕົງ ), ຂີ່ລົດຖີບ, ຂົວເທິງຕົ້ນໄມ້ ເປັນການອະນຸຮັກທຳມະຊາດ, ປ່າໄມ້ ແລະ ກໍ່ສ້າງວັດ, ຕ້ອງໄດ້ປະຕິບັດຕາມກົດໝາຍ ວ່າດ້ວຍປ່າໄມ້ ເລກທີ 64/ສພຊ ລົງວັນທີ 13 ມິຖຸນາ 2019; ຈຸດທີ 2 ຂອບເຂດດິນສະຫງວນຂອງລັດ, ເນື້ອທີ່ດິນ 3.508 ຕາແມັດ, ເຂດປຸກສ້າງທ່າກຳປັ່ນ, ອາຄານຕັ້ງຫົວລົດໄຟ, ການອະນຸຮັກວັດທະນະທໍາ – ປະຫວັດສາດ, ຈຸດບໍລິການຈອດລົດ ແລະ ອາຄານຕ້ອນຮັບ; ຈຸດທີ 3 ດອນອີ່ເຮີະ ເນື້ອທີ່ 20 ເຮັກຕາ, 1.826 ຕາແມັດ ລົງທຶນໃນການພັດທະນາກໍ່ສ້າງຣີສອດ ຈໍານວນ 65 ຫຼັງ, ຮ້ານອາຫານ, ອາຄານຕ້ອນຮັບ ແລະ ສິ່ງອໍານວຍຄວາມສະດວກໃນການທ່ອງທ່ຽວ.
ສ່ວນຮູບແບບການລົງທຶນ ແມ່ນພາຍໃນ 100% ມີທຶນຈົດທະບຽນ 5.610.840 ໂດລາສະຫະລັດ, ການຈັດຕັ້ງປະຕິບັດໂຄງການຈະເລີ່ມລົງມື ນັບແຕ່ມື້ເຊັນສັນຍາສໍາປະທານເປັນຕົ້ນໄປ.
[ຂ່າວ – ຮູບ: ທູນທອງໃຈ ]
