ນໍ້າຂອງໄດ້ໄຫຼເຂົ້າຖ້ວມພື້ນທີ່ຕໍ່າແຄມຂອງເຂດເມືອງຫາດຊາຍຟອງ, ສີໂຄດຕະບອງ ແລ ະ ສີສັດຕະນາກ ນະຄອນຫຼວງວຽງຈັນ ແຕ່ວັນທີ 12 ກັນຍາເປັນຕົ້ນມາ ແລະ ລະດັບນໍ້າຍັງສືບຕໍ່ສູງຂຶ້ນຕໍ່ເນື່ອງເຂົ້າສູ່ເຂດອັນຕະລາຍ ໃນວັນທີ 13 ກັນຍາ. ດ້ານຫ້ອງວ່າການນະຄອນຫຼວງໄດ້ອອກແຈ້ງການດ່ວນ ໃຫ້ກຽມຄວາມພ້ອມໃນລະດັບສູງສຸດ ເພື່ອຮັບມືກັບໄພນໍ້າຖ້ວມ ທີ່ອາດຈະເກີດຂຶ້ນ.
ຕະຫຼອດວັນທີ 13 ກັນຍາ ພະນັກງານ, ທະຫານ ຕຳຫຼວດ ແລະ ປະຊາຊົນໄດ້ສຸມກຳລັງ ວາງກະຊອບຊາຍຕາມຈຸດສ່ຽງ ເພື່ອປ້ອງກັນບໍ່ໃຫ້ນ້ຳທະລັກເຂົ້າຕົວເມືອງ ໂດຍສະເພາະຈຸດທ່າເຮືອຫຼັກ 4 ແລະ ຈຸດອື່ນໆ.
ຄະນະກຳມະການຄຸ້ມຄອງໄພພິບັດ ຂັ້ນສູນກາງ(ຄພສ) ໄດ້ອອກແຈ້ງການ ເລກທີ 80/ຄພສ ລົງວັນທີ 12 ກັນຍາ 2024 ແຈ້ງເຖິງອໍານາດການປົກຄອງທຸກພາກສ່ວນ ລວມເຖິງພໍ່ແມ່ປະຊາຊົນບັນດາເຜົ່າ ທີ່ອາໄສຢູ່ຕາມລຽບແຄມແມ່ນໍ້າຂອງໂດຍສະເພາະ ນະຄອນຫຼວງວຽງຈັນ, ຫຼວງພະບາງ, ໄຊຍະບູລີ, ແຂວງ ວຽງຈັນ ແລະ ບັນດາບ້ານທີ່ຢູ່ໃກ້ລຽບຕາມແມ່ນໍ້າເຊຈໍາພອນ ແຂວງ ສະຫວັນນະເຂດ ທີ່ອາດຈະເກີດນໍ້າຖ້ວມຊຸ, ຖ້ວມຂັງ.
ດ້ານຫ້ອງວ່າການນະຄອນຫຼວງວຽງຈັນ ກໍໄດ້ອອກແຈ້ງການດ່ວນ ເລກທີ40/ຫວນວລົງວັນທີ 12 ກັນຍາ 2024, ເລື່ອງ ໃຫ້ກຽມຄວາມພ້ອມໃນລະດັບສູງສຸດ ເພື່ອຮັບມືກັບໄພນໍ້າຖ້ວມ ທີ່ອາດຈະເກີດຂຶ້ນ ຢູ່ນະຄອນຫຼວງວຽງຈັນ ໄລຍະແຕ່ວັນທີ 12-18 ກັນຍາ 2024 ວ່າ: ໃນໄລຍະແຕ່ວັນທີ 12-16 ກັນຍາ 2024 ຕາມການແຈ້ງເຕືອນຂອງກົມອຸຕຸນິຍົມ ແລະ ອຸທົກກະສາດ ແລະ ຂໍ້ມູນຄາດການ ຈາກອົງການແມ່ນໍ້າຂອງສາກົນ ຈະມີຝົນຕົກຫຼາຍວັນຕິດຕໍ່ກັນ ເຮັດໃຫ້ລະດັບນໍ້າເພີ່ມຂຶ້ນ ກະທັນຫັນ ເຊິ່ງຄາດວ່າ ວັນທີ 14ກັນຍາ2024 ລະດັບນໍ້າຂອງຈະຂຶ້ນຮອດ 12,54 ແມັດ, ວັນທີ 15 ກັນຍາ 2024 ລະດັບນໍ້າຂອງຈະຂຶ້ນຮອດ 13,41 ແມັດ (ສູງກວ່າ 0,9 ແມັດ ຈາກລະດັບອັນຕະລາຍ 12,50 ແມັດ), ວັນທີ 16 ກັນຍາ 2024 ລະດັບນໍ້າຂອງຈະຂຶ້ນສູງສຸດ 13,85 ແມັດ.ສະນັ້ນ ຫ້ອງວ່າການນະຄອນຫຼວງວຽງຈັນ ຈຶ່ງຂໍຖືເປັນກຽດແຈ້ງມາຍັງບັນດາທ່ານຊາບ ແລະ ຮີບຮ້ອນຈັດ ຕັ້ງປະຕິບັດ ດັ່ງນີ້:
ໃຫ້ບັນດາຫົວຫນ້າຫ້ອງການກະຊວງ-ອົງການທຽບເທົ່າກະຊວງ, ຫົວຫນ້າກອງບັນຊາການ ປກຊ-ປກສ, ຫົວຫນ້າພະແນກການ-ອົງການທຽບເທົ່າພະແນກ ນະຄອນຫຼວງວຽງຈັນ ແລະ ບັນດາເມືອງ, ບ້ານ ຮີບຮ້ອນເຜີຍແຜ່ ຂໍ້ມູນແຈ້ງເຕືອນນໍ້າຈະຖ້ວມ ໃຫ້ພະນັກງານ-ລັດຖະກອນ, ທະຫານ, ຕໍາຫຼວດ, ຜູ້ປະກອບການ ແລະ ພໍ່ແມ່ ປະຊາຊົນ ທີ່ຢູ່ໃນຄວາມຮັບຜິດຊອບຂອງຕົນ ເພີ່ມທະວີສະຕິລະວັງຕົວ ແລະ ກຽມພ້ອມຮອບດ້ານ ໃນລະດັບສູງສຸດ ແລະ ເລັ່ງດ່ວນ ເພື່ອປ້ອງກັນ ແລະ ແກ້ໄຂ; ພ້ອມນັ້ນ ກໍໃຫ້ເກັບມ້ຽນປື້ມ, ເອກະສານທາງລັດຖະການ, ພາຫະນະ, ອຸປະກອນ ແລະ ຊັບສິນສໍາຄັນທັງໝົດ ໄວ້ໃນທີ່ປອດໄພ, ຈັດຕັ້ງກໍາລັງເຂົ້າຮ່ວມຂະບວນການປ້ອງ ກັນນໍ້າຖ້ວມ ແລະ ຈັດຕັ້ງປະຕິບັດແຈ້ງການ ຂອງຄະນະກໍາມະການຄຸ້ມຄອງໄພພິບັດ ຂັ້ນສູນກາງ ສະບັບເລກທີ 80/ຄພສ, ລົງວັນທີ 12 ກັນຍາ 2024 ຢ່າງຮີບດ່ວນ.
ໃຫ້ຄະນະກໍາມະການປ້ອງກັນ ແລະ ຄວບຄຸມໄພພິບັດ ຂັ້ນນະຄອນຫຼວງວຽງຈັນ ເປັນໃຈກາງສົມທົບ ກັບທຸກພາກສ່ວນ ເພື່ອກະກຽມກໍາລັງ (ລະດົມກໍາລັງຂອງນະຄອນຫຼວງ, ເມືອງ ແລະ ສູນກາງ), ອຸປະກອນ ແລະ ກໍານົດແຜນແກ້ໄຂສຸກເສີນ ລວມທັງເຄື່ອງຊ່ວຍເຫຼືອເບື້ອງຕົ້ນ ໃຫ້ແກ່ຜູ້ທີ່ໄດ້ຮັບຜົນກະທົບ ແລະ ລາຍງານຂັ້ນ ເທິງຊາບໃນແຕ່ລະວັນ.
ໃຫ້ພະແນກກະສິກໍາ ແລະ ປ່າໄມ້ ກວດກາຈຸດປະຕູນໍ້າທີ່ມີຄວາມສ່ຽງ ທີ່ນໍ້າຈະໄຫຼເຂົ້າ ແລະ ຫາວິທີ ປ້ອງກັນ (ເພີ່ມກະເປົາຊາຍປ້ອງກັນ, ເພີ່ມຈັກດູດນໍ້າ) ຮັບປະກັນການດູດນໍ້າອອກ ຕະຫຼອດ 24 ຊົ່ວໂມງ ເພື່ອບໍ່ ໃຫ້ນໍ້າຖ້ວມ.
ໃຫ້ພະແນກໂຍທາທິການ ແລະ ຂົນສົ່ງ ສົມທົບກັບບັນດາເມືອງ ກໍານົດຈຸດບ່ອນທີ່ນໍ້າຈະໄຫຼເຂົ້າ, ຄາດ ຄະເນຈະໃຊ້ກະເປົາຊາຍ, ແຮງງານ ໃນແຕ່ລະຈຸດ ເພື່ອປ້ອງກັນບໍ່ໃຫ້ເກີດມີສະພາບນໍ້າຖ້ວມ, ອັ່ງ-ຂັງ ໃນຕົວເມືອງ.
ໃຫ້ບັນດາທ່ານເຈົ້າເມືອງ, ນາຍບ້ານ ທົ່ວນະຄອນຫຼວງວຽງຈັນ ເປັນເຈົ້າການ ແຈ້ງໃຫ້ພໍ່ແມ່ປະຊາຊົນ ທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີສະຕິລະວັງຕົວ ແລະ ກຽມພ້ອມຮອບດ້ານ ໂດຍສະເພາະ ແມ່ນບັນດາ ບ້ານທີ່ມີ ຄວາມສ່ຽງ ພ້ອມທັງກະກຽມຍົກຍ້າຍ ພາຫະນະ, ເຄື່ອງຂອງ, ສັດລ້ຽງ ແລະ ຊັບສິນສໍາຄັນ ໄປໄວ້ບ່ອນ ທີ່ສູງ ແລະ ມີຄວາມປອດໄພ.
ໃຫ້ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່ ນະຄອນຫຼວງວຽງຈັນ ເປັນເຈົ້າການໃນການປະສານສົມທົບກັບສູນກາງ ໃນການສະໜອງຂໍ້ມູນການປ່ອຍນໍ້າຈາກ ບັນດາເຂື່ອນ, ລະດັບນໍ້າ ແລະ ແຈ້ງຂ່າວພະຍາກອນອາກາດ ໃຫ້ທົ່ວສັງຄົມ ໄດ້ຮັບຊາບ ໃນແຕ່ລະຊົ່ວໂມງ.
ໃຫ້ພະແນກສາທາລະນະສຸກ ກະກຽມແຜນການເຄື່ອນຍ້າຍຄົນເຈັບຈາກໂຮງໝໍເມືອງ ແລະ ໂຮງໝໍຊຸມ ຊົນທີ່ຢູ່ເຂດຕໍ່າ ໄປຢູ່ໂຮງໝໍສູນກາງ ທີ່ມີຕຶກອາຄານສູງຫຼາຍຊັ້ນ ແລະ ໃຫ້ກະກຽມຢາປິ່ນປົວ ຜູ້ທີ່ຖືກບາດເຈັບ ຕ່າງໆ.
ໃຫ້ພະແນກການເງິນ ກະກຽມງົບປະມານສຸກເສີນ ເພື່ອຮັບໃຊ້ໃຫ້ແກ່ວຽກງານປ້ອງກັນ ແລະ ຄວບຄຸມ ໄພພິບັດ ໃຫ້ທັນກັບສະພາບການ.
ດ້ານກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນໄພນໍ້າຖ້ວມ ໃນລະຫວ່າງວັນທີ 13-16 ກັນຍາວ່າ: ລະດັບນໍ້າຂອງຢູ່ນະຄອນຫຼວງວຽງຈັນ(ສະຖານີຫຼັກ4) ເວລາ10:00ໂມງວັນທີ 13 ກັນຍາ ແມ່ນ12,68ແມັດ (ເຂດອັນຕະລາຍ12,50ແມັດ) ແລະ ຄາດະເນວ່າລະດັບນໍ້າຂອງຍັງຈະສືບຕໍ່ເພີ່ມຂຶ້ນເປັນ13,08ແມັດໃນວັນທີ14ກັນຍາ ແລະ 13,25ແມັດໃນວັນທີ 15 ກັນຍາ.
