ການຕໍ່າຫູກທໍໄໝທີ່ເປັນເອກະລັກຂອງເຜົ່າລື້ ບໍ່ວ່າຈະເປັນສິ້ນ, ຜ້າບ່ຽງ, ຖົງ, ເສື້ອ ເຊິ່ງນອກຈາກຊ່ວຍຊຸກຍູ້ສົ່ງເສີມອະນຸລັກຮັກສາຮີດຄອງປະເພນີ ທີ່ປູ່ຍ່າຕາຍາຍສືບທອດກັນມາແລ້ວ ສິ່ງດັ່ງກ່າວຍັງຊ່ວຍສ້າງຄວາມໝັ້ນຄົງໃຫ້ແກ່ການສ້າງລາຍຮັບເຂົ້າຄອບຄົວ.
ດັ່ງຄອບຄົວຂອງ ນາງ ພີນ ປັນຍາທອງ ອາຍຸ 40 ປີ ຢູ່ບ້ານໃໝ່ໜອງຊາງ ເມືອງຊຽງຮ່ອນ ແຂວງໄຊຍະບູລີ ເຊິ່ງໄດ້ເລົ່າສູ່ຜູ້ສື່ຂ່າວຟັງວ່າ: ຄອບຄົວມີນໍາກັນ 4 ຄົນ ມີແຮງງານຕົ້ນຕໍ 1 ຄົນ ກ່ອນຈະມາເຖິງຈຸດນີ້ໄດ້ນັ້ນ ໃນເມື່ອກ່ອນຄອບຄົວກໍໄດ້ເຮັດໄຮ່ໄຖນາປົກກະຕິຕາມຄົນທົ່ວໆໄປ ຊີວິດການເປັນຢູ່ໃນໄລຍະນັ້ນ ກໍພໍກຸ້ມຢູ່ກຸ້ມກິນໄປແຕ່ລະວັນ.
ເພື່ອເປັນການຊອກຫາລາຍໄດ້ຊ່ວຍຜູ້ເປັນສາມີ ສາມີເປັນຄູສອນຢູ່ເມືອງຊຽງຮ່ອນ ຕົນເອງກໍເລີຍປຶກສາກັບຄອບຄົວ ແລະ ຜູ້ເປັນແມ່ເຖົ້າ ໃນເວລານັ້ນແມ່ເຖົ້າເພິ່ນຕໍ່າຫູກທໍໄໝຫາລາຍໄດ້ເຂົ້າຄອບຄົວໄດ້ດີ. ຮອດປີ 2018 ຕົນເອງກໍເລີຍເລີ່ມຕົ້ນຕໍ່າຫູກທໍໄໝສືບທອດຂອງຜູ້ເປັນແມ່ ຕໍ່າສິ້ນ, ຕໍ່າແຜ່ນແພເສື້ອ, ຜ້າບ່ຽງ, ຖົງ, ຍ້ອມສີເປືອກດູ່ລາຍລື້ ເຮັດເປັນແບບຄອບຄົວ ເຫັນວ່າມີລາຍໄດ້ເຂົ້າໃນຄອບຄົວດີ ແລະ ເປັນສິ່ງຕ້ອງການຂອງສັງຄົມຫຼາຍຂຶ້ນ ບາງໄລຍະກໍບໍ່ພຽງພໍກັບຄວາມຕ້ອງການຂອງລູກຄ້າ.
ເມື່ອເປັນເຊັ່ນນັ້ນ ຕົນເອງເລີຍເພີ່ມກີ່ຕໍ່າຫູກຂຶ້ນໃນແຕ່ລະປີ ໂດຍສ້າງໃຫ້ເປັນສາຂາ ເຮົາເປັນຜູ້ສະໜອງກີ່, ເຄືອຫູກ, ຝ້າຍ ແລະ ລວດລາຍຕ່າງໆ ເປັນຜູ້ກໍານົດໃນຄາລາຕໍ່າຜືນໜຶ່ງ ຈະຕົກຢູ່ 2 ແສນ ຫາ 2 ແສນ 50 ພັນກີບ ຂຶ້ນກັບລວດລາຍຍາກ ຫຼື ງ່າຍ, ຂະໜາດຜືນຜ້າ 180 x 110 ເຊັນ.
ມາຮອດປັດຈຸບັນນີ້ ມີກີ່ຕໍ່າຫູກທັງໝົດ 100 ກີ່ ຢູ່ພາຍໃນເມືອງ ແລະ ແຂວງອຸດົມໄຊ ແຕ່ລະເດືອນແມ່ນຈະໄດ້ຜ້າທີ່ສັ່ງມາ 50 ຜືນ. ການຂາຍຜະລິດຕະພັນຂອງເຮົາແມ່ນຂຶ້ນກັບລວດລາຍ ຖ້າລວດລາຍທີ່ຍາກ ແມ່ນລາຄາຈະຢູ່ໃນ 5 ແສນກີບ ຖ້າລວດລາຍທໍາມະດາຈະຢູ່ໃນລະດັບ 4 ແສນກີບຕໍ່ຜືນ. ການຂາຍແມ່ນລູກຄ້າຈະມາເລືອກຊື້ຢູ່ກັບທີ່ຮ້ານ ບາງຄັ້ງລູກຄ້າເອົາຫຼາຍຢູ່ຕ່າງເມືອງຕ່າງແຂວງ ພວກເຮົາແມ່ນຈະໄປສົ່ງໃຫ້ລູກຄ້າກັບທີ່, ບາງຄັ້ງກໍຂາຍທາງອອນລາຍໄລຟສົດ ແຕ່ລະເດືອນສົ່ງອອກ 30 ຜືນ ສັງລວມແລ້ວການຂາຍເຄື່ອງບໍ່ຫຼຸດ 30 ຜືນ ເມື່ອສັງລວມລາຍຮັບປີໜຶ່ງ ຈະໄດ້ 150 ລ້ານກີບ.
ສິ່ງດັ່ງກ່າວໄດ້ຢັ້ງຢືນວ່າ ປັດຈຸບັນຄອບຄົວຂອງຂ້າພະເຈົ້າດີຂຶ້ນກວ່າແຕ່ກ່ອນ ມີເງິນຊື້ພາຫະນະຮັບໃຊ້ຄອບຄົວ, ມີເງິນແຮໄວ້ໃຊ້ຍາມຈໍາເປັນ ແຕ່ສິ່ງສໍາຄັນ ແລະ ພາກພູມໃຈທີ່ສຸດຄື ໄດ້ຖືກຮັບຮອງໃຊ້ກາໝາຍໜຶ່ງເມືອງ ໜຶ່ງຜະລິດຕະພັນແຫ່ງຊາດ ກຸ່ມຫັດຖະກໍາຕໍ່າແຜ່ນແພຜ້າຝ້າຍທໍາມະຊາດ ຍ້ອມສີເປືອກດູ່ລາຍລື້ ບ້ານໃໝ່ໜອງຊາງ ເມືອງຊຽງຮ່ອນ ເລກທີ 0232/ກສຄອກ ລົງວັນທີ 1 ມິຖຸນາ 2020.
ຂ່າວ: ບຸນທີ
