ທີມບານເຕະ ມະຫາວິທະຍາໄລ ສຸພານຸວົງ ສາມາດຄວ້າແຊັມໃນການແຂ່ງຂັນກີລາບານເຕະ ງານມະໂຫລານກິລາຄັ້ງທີ 5 ຂອງນັກສຶກສາ ມະຫາວິທະຍາໄລ ລ້ານຊ້າງ-ແມ່ນ້ຳຂອງ ຫຼື “ງານກິລາມິດຕະພາບ ແລະ ແລກປ່ຽນວັດທະນະທຳ ນັກສຶກສາ ວິທະຍາໄລ ອາຊີໃຕ້ ແລະ ອາຊີຕາເວັນອອກສ່ຽງໃຕ້ ຄັ້ງທີ 7 – ຄຸນໝິງ ສປ ຈີນ” (5 th Lancanng – Mekong college students ‘Goodwill games and 7th South and Southeast Asia College Student Culture Sport Week – Kunming”) ໄດ້ຈັດຂື້ນ ລະຫວ່າງວັນທີ 2 – 10 ກັນຍາ 2024, ທີ່ ຄຸນໝິງ ສປ ຈີນ.
ມະຫາວິທະຍາໄລ ສຸພານຸວົງ ໄດ້ສົ່ງຄະນະນຳ ຄູຝຶກ ແລະນັກກິລາບານເຕະ ເຂົ້າຮ່ວມທັງຫມົດ 30 ຄົນ, ໂດຍຈັດຢູ່ສາຍ B ຮ່ວມກັບ ມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຄຸນໝິງ 2 ສປ ຈີນ ແລະມະຫາວິທະຍາໄລ ການຄ້າສາກົນ ສສ ຫວຽດນາມ, ຜົນການແຂ່ງຂັນໃນຮອບຄັດເລືອກ ນັດທີ 1 ສາມາດເອົາຊະນະ ມະຫາວິທະຍາໄລ ການຄ້າສາກົນ ສສ ຫວຽດນາມ 2 – 0, ນັດທີ 2 ສາມາດເອົາຊະນະ ມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຄຸນໝິງ 2 ສປ ຈີນ 3 – 0, ຜ່ານເຂົ້າຮອບ 8 ທີມໂດຍເປັນທີ 1 ໃນສາຍມີ 6 ຄະແນນ
ສຳລັບໃນຮອບ 8 ທີມ ໄດ້ແຂ່ງຂັນກັບ ມະຫາວິທະຍາໄລ ອູຫັນ ສປ ຈີນ ສາມາດເກັບໄຊຊະນະອີກ 2 – 0, ຜ່ານເຂົ້າຮອບຮອງຊະນະເລີດ ໂດຍແຂ່ງຂັນກັບ ມະຫາວິທະຍາໄລ ວິທະຍາສາດ ແລະ ເຕັກໂນໂລຊີ ຄຸນໝິງ 1 ສປ ຈີນ ສາມາດເອົາຊະນະອີກ 2 ປະຕູຕໍ່ 1 ຜ່ານເຂົ້າຮອບຊິງຊະນະເລີດ ພົບກັບ ມະຫາວິທະຍາໄລ ອຸບົນ ລາດຊະທານີ ຣາຊາອານາຈັກໄທ ຜ່ານການແຂ່ງຂັນ ມະຫາວິທະຍາໄລ ສຸພານຸວົງ ສາມາດເອົາຊະນະ ມະຫາວິທະຍາໄລ ອຸບົນ ລາດຊະທານີ 1-0, ສ້າງປະຫວັດສາດຍາດໄດ້ແຊ້ມໃນການແຂ່ງຂັນ ລາຍການນີ້, ທັງນຳເອົາລາງວັນກັບຄືນສູ່ແຂວງຫຼວງພະບາງ ໃນຕອນແລງຂອງວັນທີ່ 9 ກັນຍາ 2024
ຂ່າວຈາກ: ນັກຂ່າວ ສະຖານີວິທະຍຸ ແຂວງຫຼວງພະບາງ
