ກະຊວງອຸດສາຫະກໍາ ແລະ ການຄ້າ(ອຄ) ຈັດພິທີ ເປີດໂຄງການສົ່ງເສີມການຄ້າທີ່ຄຳນຶງເຖິງບົດບາດຍິງ-ຊາຍ ໃນກະຊວງ ອຄ ຂຶ້ນໃນວັນທີ 9 ກັນຍາ 2024 ທີ່ໂຮງແຮມ ຄຣາວພຣາຊາ ເປັນປະທານຂອງທ່ານ ນາງ ຈັນສຸກ ແສງພະຈັນ ຮອງ ລັດຖະມົນຕີກະຊວງ ອຄ, ທ່ານ ນາງ Benita Sommerville ຮອງເອກອັກຄະລັດຖະທູດອົດສະຕາລີ ປະຈຳ ສປປ ລາວ, ທ່ານ Adrian Gilbert ຫົວໜ້າຝ່າຍປະສານງານຂອງໂຄງການການຄ້າເພື່ອການພັດທະນາພາກພື້ນ (RT4D) ມີຜູ້ຕາງໜ້າ ຈາກອົງການສະຫະປະຊາຊາດ ປະຈໍາ ສປປ ລາວ, ທະນາຄານໂລກ,ສະຖານ ທູດອິນໂດເນເຊຍ ແລະ ອົງການ ກອຍກາ ປະຈໍາ ສ ປປ ລາວ, ພະແນກ ອຄ ແຂວງຫຼວງນໍ້າທາ, ແຂວງສະຫວັນນະເຂດ, ສຄອຊ ແລະ ພາກທຸລະກິດເຂົ້າຮ່ວມ.
ໂຄງການສົ່ງເສີມການສ້າງຄວາມເຂັ້ມແຂງບົດບາດຍິງ-ຊາຍໃນໃນກະຊວງອຸດສາຫະກໍາ ແລະ ການຄ້າ ( Enhancing Gender Responsive Trade in the Ministry of industry and commerce, Lao PDR-TGEI) ຫຼື ເອີ້ນຫຍໍ້ວ່າໂຄງການ: TGEI ໄດ້ຮັບທຶນສະໜັບສະໜູນ ຈາກລັດຖະບານອົດສະຕາລີ ຫຼື Regional Trade for Development (RT4D) ແລະ The Trade and Gender Equality Incubator(TGEI) ໃນໄລຍະການຈັດຕັ້ງປະຕິບັດໂຄງການ 3 ປີ ເລີ່ມແຕ່ທ້າຍປີ 2024-2027.
ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງ ອຄ ກ່າວວ່າ: ໂຄງການ TGEI ແມ່ນມີຄວາມສຳຄັນ ສໍາລັບຂະແໜງອຸດສາຫະກໍາ ແລະ ການຄ້າ ຂອງພວກເຮົາ ໃນການປະກອບສ່ວນ ຊຸກຍູ້ສົ່ງເສີມ ນະໂຍບາຍການສ້າງຄວາມເຂັ້ມແຂງ ແລະ ຄວາມສະເໝີພາບ ລະຫວ່າງເພດ ລວມທັງການສ້າງສະພາບແວດລ້ອມການເຮັດວຽກທີ່ດີ ທີ່ມີສ່ວນຮ່ວມ ແລະ ການປະກອບສ່ວນ ຂອງຫຼາກຫຼາຍປະເພດຄົນ.
ພາຍຫຼັງພິທີເປີດໂຄງການ,ບັນດາທ່ານນັກສໍາມະນາກອນຍັງຈະໄດ້ສືບຕໍ່ເຂົ້າຮ່ວມການຝຶກອົບຮົບວຽກງານຄວາມສະເໜີພາບດ້ານເພດ ແລະ ຄວາມຫຼາກຫຼາຍ.
ສະນັ້ນ, ຂ້າພະເຈົ້າຈຶ່ງຂໍຮຽກຮ້ອງໃຫ້ນັກສຳມະນາກອນທຸກທ່ານ, ຈົ່ງພ້ອມກັນເອົາໃສ່ໃຈ ຕັ້ງໜ້າໃນການຮຽນຮູ້ ແລະ ຍາດແຍ່ງໂອ ກາດເພື່ອແລກປ່ຽນບົດຮຽນກັບບັນດານັກວິທະຍາກອນ ແລະຜູ້ເຂົ້າຮ່ວມດ້ວຍກັນ
ເພື່ອນຳເອົາຄວາມຮູ້ ກັບໄປຊຸກຍູ້ສົ່ງເສີມ ແລະ ພັດທະນາຄວາມກ້າວໜ້າຂອງແມ່ຍິງ ແລະ ຄວາມຫຼາກຫຼາຍໃນອົງກອນຂອງທ່ານ ເພື່ອໃຫ້ທຸກປະເພດຄົນໄດ້ມີສ່ວນຮ່ວມໃນການປະຕິບັດໜ້າທີ່ວຽກງານ ໃຫ້ເປັນທີ່ຮັບຮູ້ ແລະ ຍອມຮັບ ຂອງສັງຄົມກໍຄືອົງກອນຂອງທ່ານເອງ.
