ຂ່າວໃຫ້ຮູ້ວ່າ ຮຸນໄດ (Hyundai) ບໍລິສັດຜະລິດລົດຊື່ດັ່ງຈາກ ສ.ເກົາຫຼີ ປະກາດໄຟຂຽວເລີ່ມການຜະລິດລົດພະລັງງານໄຣໂດຣເຈນ ຢ່າງເປັນທາງການໂດຍເປັນການຕໍ່ຍອດຈາກແນວຄິດລົດນໍາໃຊ້ພະລັງງານໄຣໂດຣເຈນ (N Vision 74) ຫຼື (N74) ເພື່ອຕອບໂຈດລົດພະລັງງານໃໝ່ ທີ່ໃສ່ໃຈເລື່ອງສິ່ງແວດລ້ອມຍິ່ງຂຶ້ນ.
ເວັບໄຊ (Interesting Engineering) ເຜີຍວ່າຂໍ້ມູນນີ້ ມາຈາກງານ (Investor Day) ຫຼື ງານປະຊຸມພົບປະຂອງຜູ້ບໍລິຫານລະດັບສູງຂອງບໍລິສັດກັບນັກລົງທຶນ ເຊິ່ງໃນງານດັ່ງກ່າວ ຮຸນໄດ ໄດ້ນໍາສະເໜີກ່ຽວກັບແຜນພັດທະນາລົດໄຟຟ້າລຸ້ນໃໝ່ 21 ລຸ້ນ ລວມທັງ (N Vision 74) ທີ່ຄາດວ່າຈະອອກມາໃຫ້ເຫັນຮູບຮ່າງພາຍໃນປີ 2030.
ແນວໃດກໍຕາມ ບໍລິສັດຍັງບໍ່ໄດ້ເຜີຍພາບໜ້າຕາແທ້ຂອງລົດລຸ້ນທີ່ຈະຜະລິດອອກມາ ເນື່ອງຈາກຍັງຢູ່ໃນຊ້ວງການພັດທະນາ ແລະ ອາດຈະມີການປ່ຽນແປງໄປຈາກລົດຕົ້ນແບບ ຫາກເຂົ້າສູ່ການຜະລິດ ແລະ ວາງຂາຍແທ້.
ແຕ່ສໍາລັບຕົ້ນແບບຂອງລົດ ທີ່ເຄີຍເຜີຍອອກມານັ້ນ ຈະເປັນລົດແບບ 2 ບ່ອນນັ່ງທີ່ມີປະຕູແບບປີກນົກ ໂດຍມີຈຸດເດັ່ນຄືລະບົບແບບປັກອິນໄຣບຣິດ ພາຍໃນຕິດຕັ້ງເຊວເຊື້ອໄຟໄຣໂດຣເຈນ ແລະ ແບັດເຕີຣີຂະໜາດ 70 ກີໂລວັດ (kW) ໃຫ້ພະລະກໍາລັງສູງກວ່າ 775 ແຮງມ້າ ແລະ ສາມາດເລັ່ງເຖິງ 100 ກີໂລແມັດຕໍ່ຊົ່ວໂມງໄດ້ໃນ 3 ວິນາທີ.
ສ່ວນລາຍລະອຽດອື່ນໆ ຍັງບໍ່ໄດ້ເປີດເຜີຍອອກມາຢ່າງເປັນທາງການ ນອກຈາກຂໍ້ມູນເກົ່າຂອງລົດຕົ້ນແບບທີ່ເຄີຍເຜີຍວ່າຈະສາມາດເຮັດຄວາມໄວໄດ້ສູງເຖິງ 250 ກີໂລແມັດຕໍ່ຊົ່ວໂມງ ແລະ ໃຫ້ໄລຍະທາງການຂັບຂີ່ຢູ່ປະມານ 600 ກີໂລແມັດເຊິ່ງອາດຈະມີການປ່ຽນແປງ ໃນໄລຍະທີ່ມີການຜະລິດໂຕຈິງ.
ສໍາລັບແນວຄິດລົດລຸ້ນນີ້ເປັນຄວາມພະຍາຍາມຂອງບໍລິສັດ ທີ່ຕັ້ງເປົ້າໄປທີ່ລະບົບວນິເວດຂອງການໃຊ້ເຊື້ອໄຟໄຣໂດຣເຈນ ສໍາລັບການເຕີບໂຕຂອງອຸດສາຫະກໍາຍານຍົນ ໃນອະນາຄົດ
.
ຂໍ້ມູນຈາກ: https://tnnthailand.com/news/tech/175455/
