ວັນທີ 7 ກັນຍາ ກົມອຸຕຸນິຍົົມແລະອຸທົກກະສາດ ໄດ້ອອກແຈ້ງເຕືອນໄພ ພາຍຸໄຕ້ຝຸ່ນຢາກິ ສະບັບທີ 4 ວ່າ: ໃນເວລາ 10 ໂມງ 50 ຂອງວັນທີ 7 ກັນຍາ 2024 ພາຍຸໄຕ້ຝຸ່ນຢາກິ (Super Typhoon YAGI), ຊຶ່ງມີຈຸດສູນກາງໃນເສັ້ນຂະຫນານທີ 20 ອົງສາເໜືອ ແລະ ເສັ້ນແວງທີ່ 107.6 ອົງສາຕາເວັນອອກ ແລະ ມີ ລົມແຮງສຸດໃກ້ກັບຈຸດສູນກາງ 185 ກິໂລແມັດຕໍ່ຊົ່ວໂມງ ກໍາລັງເຄື່ອນ ທີ່ໄປທາງທິດຕາເວັນຕົກດ້ວຍຄວາມໄວ 15 ກິໂລແມັດຕໍ່ຊົ່ວໂມງ, ຄາດວ່າຈະເຄື່ອນທີ່ທີ່ຂຶ້ນຝັ່ງພາກເຫນືອຂອງ ສສ ຫວຽດນາມ ໃນ ຕອນແລງມື້ນີ້.
ຈາກນັ້ນ ຈະອ່ອນກໍາລັງລົງຕາມລໍາດັບກາຍເປັນພາຍຸດີເປຼຊັນ ແລະ ຄາດວ່າໃນຕອນເຊົ້າຂອງວັນທີ 8 ກັນຍາ 2024 ຈະເຄື່ອນທີ່ເຂົ້າ ພາກເໜືອ ຂອງສປປ ລາວ, ຊຶ່ງຈະເຮັດໃຫ້ ມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ທົ່ວໄປ ແລະ ຕົກ ໃນລະດັບປານກາງ ຫາ ຫນັກ ພ້ອມຈະມີລົມພັດແຮງຢູ່ບາງທ້ອງຖິ່ນ ເຊັ່ນ: ແຂວງ ຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ຫຼວງນໍ້າທາ, ຫຼວງພະບາງ, ໄຊຍະບູລີ, ນະຄອນຫຼວງວຽງຈັນ, ໄຊສົມບູນ, ວຽງຈັນ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດ.
ສໍາລັບແຂວງພາກໃຕ້ ຂອງ ສປປ ລາວ ແມ່ນຈະໄດ້ຮັບອິດທິພົນຈາກລົມມໍລະສຸມຕາເວັນຕົກສ່ຽງໃຕ້. ຊຶ່ງຈະ ເຮັດໃຫ້ ມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຢູ່ທົ່ວໄປ ແລະ ຕົກໃນລະດັບປານກາງ ຫາ ຫນັກ ພ້ອມຈະມີລົມພັດ ແຮງຢູ່ບາງທ້ອງຖິ່ນ ເຊັ່ນ: ສາລະວັນ, ຈໍາປາສັກ, ອັດຕະປື ແລະ ເຊກອງ ໃນໄລຍະວັນທີ 7 ຫາ 9 ກັນຍາ 2024 ນີ້.
ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງ ທ້ອງຖິ່ນ ແລະ ອົງການຈັດຕັ້ງທຸກພາກສ່ວນໃນແຕ່ລະພາກ ລວມທັງ ນະຄອນຫລວງວຽງຈັນ ຈົ່ງມີສະຕິລະມັດລະວັງ ແລະ ກຽມພ້ອມຮັບມືຕໍ່ ສະພາບຝົນຕົກໜັກຕິດຕໍ່ກັນຫລາຍວັນ ທີ່ຈະເຮັດໃຫ້ມີດິນເຈື່ອນ, ນໍ້າຖ້ວມຊຸ, ນໍ້າຖ້ວມຍຶ່ງ ແລະ ນໍ້າຖ້ວມອັ່ງໃນຕົວເມືອງ. ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.
