ໃນເຊົ້າມື້ນີ້ກໍ່ຄືວັນທີ 6 ກັນຍາ 2024 ທີ່ແຂວງສາລະວັນໄດ້ມີພິທີເປີດດ່ານສາກົນ ປາກຕາພານ ເມືອງລະຄອນເພັງ ແຂວງສາລະວັນ ໂດຍມີ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີ ກະຊວງການຕ່າງປະເທດ, ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຣາຊະອານາ ຈັກໄທ ປະຈໍາ ສປປ ລາວ, ທ່ານ ດາວວົງ ພອນແກ້ວ ເຈົ້າແຂວງສາລະວັນ, ພ້ອມດ້ວຍພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນ ຕະຫລອດຮອດປະ ຊາຊົນພາຍໃນເມືອງລະຄອນເພັງ ເຂົ້າຮ່ວມ.
ທ່ານ ດາວວົງ ພອນແກ້ວ ໄດ້ມີຄຳເຫັນໃນພິທີວ່າ: ການຍົກລະດັບຈາກດ່ານທ້ອງຖິ່ນປາກຕາພານ ເປັນດ່ານສາກົນປາກຕາພານ ເປັນເຫດການ ທີ່ມີຄວາມໝາຍຄວາມສໍາຄັນເປັນຢ່າງຍິ່ງ ເພາະວ່າຈຸດດັ່ງກ່າວ ມີທີ່ຕັ້ງຍຸດທະສາດ ທາງດ້ານການບໍລິການ ທາງຜ່ານ ແລະ ການຄ້າ ໃນລະດັບອະນຸພາກພື້ນ, ເປັນປະຕູເຊື່ອມໂຍງເສດຖະກິດ ລະຫວ່າງ 4 ແຂວງພາກໃຕ້, 1 ແຂວງພາກກາງຂອງລາວ ແລະຈະຊ່ວຍກະຕຸກຊຸກຍູ້ ການພັດທະນາເສດຖະກິດ- ສັງຄົມ ຂອງແຂວງ ໂດຍສະເພາະ ເພື່ອອໍານວຍຄວາມສະດວກ ໃຫ້ແກ່ການຄ້າ-ການລົງທຶນ ແລະ ການທ່ອງທ່ຽວ ຢູ່ພາຍໃນແຂວງສາລະວັນ, ທັງເປັນການສ້າງເງື່ອນໄຂອໍານວຍຄວາມສະດວກໃຫ້ປະຊາຊົນລາວ, ໄທ ແລະ ປະເທດທີ 3 ສາມາດເດີນທາງໄປມາຫາສູ່ ແລະ ເຂົ້າ ອອກ ຜ່ານດ່ານແຫ່ງນີ້ ໄປຫາປະເທດຫວຽດນາມ ໄດ້ຢ່າງສະດວກສະບາຍ.
ນອກຈາກນີ້, ອີງໃສ່ທີ່ຕັ້ງ ແລະ ຈຸດພິເສດ ຂອງດ່ານດັ່ງກ່າວ ຍັງເປັນເງື່ອນໄຂທີ່ສຳຄັນເພື່ອຮອງຮັບການກໍ່ສ້າງຂົວມິດຕະພາບລາວ-ໄທ ແຫ່ງທີ 6 ທີ່ມີແຜນຈະສ້າງໃນຕໍ່ໜ້າຕື່ມອີກ. ເຖິງວ່າ ການຍົກລະດັບດ່ານປາກຕາພານ ຂຶ້ນເປັນ ດ່ານສາກົນ ທີ່ເປັນທ່າແຮງ ແລະ ມີຜົນປະໂຫຍດຫລາຍດ້ານກໍຕາມ, ແຕ່ຍັງມີສິ່ງທ້າທາຍທີ່ຈະຕ້ອງສືບຕໍ່ເອົາໃຈໃສ່ເພີມທະວີຄວາມຮັບຜິດຊອບນໍາພາ-ຊີ້ນຳ ແລະ ຈັດຕັ້ງປະຕິບັດໃຫ້ມີຜົນສຳເລັດ ເປັນຕົ້ນ ການປະ ສານສົມທົບກັນລະຫວ່າງ ດ່ານສາກົນປາກຕາພານ ຂອງ ລາວ ກັບດ່ານສາກົນປາກແຊງ ຣາຊະອານາຈັກໄທ ໃນການພົວພັນປະສານງານ ແລະ ແລກປ່ຽນຂໍ້ມູນຂ່າວສານ; ການປັບປຸງພື້ນຖານໂຄງລ່າງ ໂດຍສະເພາະເສັ້ນທາງພາຍໃນດ່ານ ເພື່ອໃຫ້ສາມາດຮອງຮັບການສັນຈອນ ຂອງລົດບັນທຸກໃຫ້ມີຄວາມສະດວກສະບາຍ, ການບໍລິການ, ການປະກອບເຄື່ອງມື ແລະ ອຸປະກອນທີ່ທັນສະໄໝ ເພື່ອຮັບໃຊ້ເຂົ້າໃນວຽກງານກວດກາຄວາມເປັນລະບຽບຮຽບຮ້ອຍ ເຊັ່ນ: ເຄື່ອງສະແກນເນີ້, ຊິງຊັ່ງນໍ້າໜັກ, ການຄຸ້ມຄອງການຂົນສົ່ງທາງເຮືອບັກ ໃຫ້ຮັບປະກັນ ແລະ ການບໍລິການຂົນສົ່ງ ຈາກດ່ານຫາຕົວເມືອງ; ໃຫ້ທຸກພາກສ່ວນທີ່ກ່ຽວຂ້ອງ ຮ່ວມກັນສືບຕໍ່ເອົາໃຈໃສ່ຕິດຕາມ, ປັບປຸງ ແລະ ແກ້ໄຂໃຫ້ດີຂຶ້ນ.
ດ່ານສາກົນປາກຕາພານ ເມືອງລະຄອນເພັງ ແຂວງສາລະວັນ ຕັ້ງຢູ່ເຊິ່ງໜ້າກັບດ່ານ ຖາວອນປາກແຊງ, ອໍາເພີນາຕານ ຈັງຫວັດອຸບົນຣາຊະທານີ ຣາຊອານະຈັກໄທ, ເປັນຊາຍແດນທີ່ມີເສັ້ນທາງເຊື່ອມຕໍໍ່ກັນທາງນໍ້າ. ໃນປີ 1988 ລັດຖະບານລາວ ໄດ້ເຫັນດີອະນຸມັດໃຫ້ເປີດເປັນດ່ານຊາຍ ແດນກັບຣາຊະອານາຈັກໄທ ເພື່ອອໍານວຍຄວາມ ສະດວກໃນການໄປມາຫາສູ່ກັນ ແລະ ແລກປ່ຽນສິນຄ້າ ລະຫ່ວາງປະຊາຊົນຊາວເມືອງລະຄອນເພັງ ແຂວງສາລະວັນ ແລະ ອໍາເພີນາຕານ ຈັງຫວັດອຸບົນຣາຊະທານີ. ໃນເບື້ອງຕົ້ນການໄປມາຫາສູ່ກັນ ແລະ ແລກປ່ຽນຊື້-ຂາຍ ແມ່ນ ນໍາໃຊ້ເຮືອຂົນສົົ່ງຂະໜາດນ້ອຍເປັນຫລັກ, ໃຊ້ແຮງງານຄົນແບກຫາບ, ໃຊ້ສັດລໍາລຽງເຄື່ອງຂອງຂຶ້ນຝັງ ແລກປ່ຽນຊື້-ຂາຍ ນໍາກັນຕາມປະເພນີ.
ຜ່ານມາໄລຍະໜຶ່ງ ໂດຍເຫັນໄດ້ທ່າອ່ຽງການຂະຫຍາຍຕົວ ໂດຍສະເພາະໃນປີ 2010-2013 ດ່ານແຫ່ງນີ້ ໄດ້ຮັບອະນຸຍາດນໍາເຂົ້ານໍ້າມັນ, ສິນຄ້າກະສິກໍາ ເປັນຕົ້ນແມ່ນມັນຕົ້ນ, ຮອດປີ 2013 ລັດຖະ ບານລາວ ກໍຄື ກະຊວງການຕ່າງປະເທດ ໄດ້ອະນຸມັດໃຫ້ນໍາໃຊ້ໜັງສືຜ່ານແດນ ເພື່ອອຳນວຍຄວາມສະດວກໃຫ້ ປະ ຊາຊົນ, ພາຫະນະສອງປະເທດເຂົ້າ-ອອກ, ເລີ່ມແຕ່ປີ 2015 ເປັນຕົ້ນມາແຂວງສາລະວັນ ໄດ້ສຸມທຶນຮອນເຂົ້າໃນການຍົກລະດັບພື້ນຖານໂຄງລ່າງ ເປັນຕົ້ນ ອາຄານດ່ານ, ເສັ້ນທາງເຊື່ອມຕໍ່ຈາກເສັ້ນທາງເລກທີ 13 ໃຕ້ ເຂົ້າຫາດ່ານປາກຕາພານ ຄວາມຍາວ 17,5 ກິໂລແມັດ; ທາງລົງບັກເພື່ອເປີດການບໍລິການເຮືອບັກຂົນສົ່ງສິນຄ້າຂະໜາດໃຫຍ່, ສິ່ງອໍານວຍຄວາມສະດວກຕ່າງໆ ເພື່ອໃຫ້ມີຄວາມສະດວກໃນການພົວພັນຮ່ວມມືດ້ານການຄ້າ, ການລົງທຶນ ແລະ ການທ່ອງທ່ຽວ ຂອງສອງແຂວງສາລະວັນ-ຈັງຫວັດອຸບົນຣາຊະທານີ ກໍຄື ສປປ ລາວ-ຣາຊະອານາຈັກໄທ ແລະ ເພື່ອເປັນການຮອງຮັບໃຫ້ແກ່ການເປັນສະມາຊິກຂອງປະຊາຄົມເສດຖະກິດອາຊຽນ, ອົງການປົກຄອງແຂວງສາລະວັນ ຈຶ່ງໄດ້ສະເໜີເຖິງ ລັດຖະບານ ເພື່ອຂໍອະນຸມັດຍົກລະດັບດ່ານ ປະເພນີປາກຕາພານ ເມືອງລະຄອນເພັງ ແຂວງສາລະວັນ ເປັນດ່ານສາກົນ.
