ແຫລ່ງຂ່າວຈາກ ແຂວງອຸດົມໄຊ ໃຫ້ຮູ້ວ່າ: ກອງປະຊຸມປຶກສາຫາລື ວຽກງານຄຸ້ມຄອງຄວາມເປັນລະບຽບ 22 ບ້ານ ໃນເທສະບານ ແຂວງອຸດົມໄຊ ຈັດຂຶ້ນໃນວັນທີ 5 ກັນຍາ 2024 ທີ່ຫ້ອງວ່າການແຂວງ ໂດຍການເປັນປະທານຂອງ ທ່ານ ສົມຈິດ ປັນຍາສັກ ຮອງເຈົ້າແຂວງໆອຸດົມໄຊ, ທ່ານ ສຸດໃຈ ສຸດແສງເດືອນ ຫົວໜ້າອົງການພັດທະນາ ແລະ ບໍລິຫານຕົວເມືອງ ພ້ອມດ້ວຍພະແນກການທີ່ກ່ຽວຂ້ອງເຂົ້າຮ່ວມ.
ຈຸດປະສົງ ກໍເພື່ອເຮັດໃຫ້ເທສະບານຕົວເມືອງໆໄຊ ໄດ້ຮັບການຄຸ້ມຄອງ, ປົກປັກຮັກສາ, ພັດທະນາຢ່າງຕໍ່ເນື່ອງ ແລະ ຖືກຕ້ອງຕາມແນວທາງນະໂຍບາຍຂອງພັກ-ລັດ ວາງອອກແຕ່ລະໄລຍະ ເພື່ອກະກຽມຕ້ອນຮັບການດໍາເນີນກອງປະຊຸມໃຫຍ່ 3 ຂັ້ນ ຂອງພັກ ໃຫ້ເປັນຂະບວນການຟົດຟື້ນ, ເພື່ອເປັນບ່ອນອີງພື້ນຖານໃຫ້ຄະນະຊີ້ນໍາລວມ ໃນການເຄື່ອນໄຫວ ນໍາພາ-ຊີ້ນໍາ ຊຸກຍູ້, ຕິດຕາມ ແລະ ເປັນບ່ອນອີງໃຫ້ຄະນະຮັບຜິດຊອບພາກສະໜາມ ນໍາໄປຜັນຂະຫຍາຍເປັນແຜນອັນລະອຽດ
ມີໜ້າວຽກທີ່ຈະແກ້ໄຂ ໂດຍສະເພາະ ຮື້ຖອນຕູບນ້ອຍ, ການຕໍ່ເຕີມອາຄານ, ເງີບໜ້າບ້ານ-ເຮືອນທຸກປະເພດ ທີ່ກວມທາງຍ່າງ, ກວມຕົ້ນໄມ້ແຄມທາງ, ກວມເສົາໄຟຟ້າເຍືອງທາງ ຫລື ສິ່ງປຸກສ້າງ-ກໍ່ສ້າງອື່ນໆ ທີ່ບໍ່ເປັນລະບຽບຮຽບຮ້ອຍ, ແກ້ໄຂການຂາຍເຄື່ອງຊະຊາຍແຄມທາງ ແລະ ທາງຄົນຍ່າງ ເປັນຕົ້ນ ຂາຍເຄື່ອງນຸ່ງ, ຂາຍຂອງກິນສຸກ, ຂາຍຜັກ, ໜໍ່, ໝາກໄມ້, ຂາຍເຄື່ອງໃສ່ລົດລຽບແຄມທາງ, ຂາຍເຄື່ອງຍ່ອຍ, ຂາຍນໍ້າອ້ອຍ-ນໍ້າຫວານ-ນໍ້າປັ່ນ ແລະ ອື່ນໆ. ການຕັ້ງປ້າຍໂຄສະນາທຸກປະເພດ ທີ່ບໍ່ເປັນລະບຽບ, ຕັ້ງໃສ່ເຂດທີ່ລັດຫ້າມ ແລະ ປ້າຍທີ່ບໍ່ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງ, ຮ້ານຂາຍ ຫລື ສ້ອມແປງລົດທຸກຊະນິດທີ່ນໍາໃຊ້ສະຖານທີ່ສາທາລະນະເປັນບ່ອນດໍາເນີນກິດຈະການ ແລະ ຮ້ານສ້ອມແປງທີ່ສົ່ງຜົນກະທົບຕໍ່ສິ່ງແວດລ້ອມ ເຊັ່ນ: ການຖອກນໍ້າມັນໃສ່ຮ່ອງນໍ້າທີ່ໄຫລລົງສູ່ແຫລ່ງນໍ້າທຳມະຊາດ ມີຜົນກະທົບທາງສຽງ, ກິ່ນ ຕໍ່ບໍລິເວນອ້ອມຂ້າງ ຫລື ອື່ນໆ, ຮ້ານຂາຍ ຫລື ສ້ອມແປງໂທລະສັບ ທີ່ນໍາໃຊ້ສະຖານທີ່ສາທາລະນະເປັນບ່ອນດໍາເນີນກິດຈະການ, ຮ້ານອາຫານ, ຮ້ານບັນເທີງ, ຮ້ານເຝີ, ຮ້ານກິນດື່ມ ທີ່ໃຊ້ທາງຍ່າງເປັນບ່ອນດໍາເນີນກິດຈະການ, ມີສຽງລົບກວນ ແລະ ເປີດກາຍເວລາທີ່ກໍານົດ, ແກ້ໄຂການຈອດລົດທີ່ແອອັດ ເປັນຕົ້ນ ຈຸດໂຮງຮຽນ ແລະ ຈຸດຊຸມຊົນຕ່າງໆ ໃນຕົວເມືອງ, ການຕິດຕັ້ງສາຍສື່ສານ, ສາຍໄຟຟ້າຕ່າງໆທີ່ບໍ່ເປັນລະບົບລະບຽບ.
ຮູບແບບການຈັດຕັ້ງປະຕິບັດເບື້ອງຕົ້ນແມ່ນຈະໄດ້ເຜີຍແຜ່ແຜນການດັ່ງກາວໃຫ້ປະຊາຊົນໄດ້ຮັບຊາບ ພາຍໃນເດືອນກັນຍາ ແລະ ຮອດເດືອນ ຕຸລາ 2024 ແມ່ນຈະໄດ້ເລີ່ມຕົ້ນປະຕິບັດຕົວຈິງ ກໍຄື ການຮື້ຖອນສິ່ງກິດຂວາງຢ່າງເປັນທາງການ.
ຂ່າວ-ພາບ: ແສງອາທິດ
