ສູນຄົ້ນຄວ້າຈີນ ມະຫາວິທະຍາໄລແຫ່ງຊາດ (ມຊ) ໂດຍໄດ້ຮັບການຊີ້ນໍາຈາກສະຖານເອກອັກຄະລັດຖະທູດ ສປ ຈີນ ປະຈຳລາວ, ສຳນັກການສື່ສານພາສາຕ່າງປະເທດ ສປ ຈີນ (CICG) ໄດ້ຈັດກອງປະຊຸມແລກປ່ຽນການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນພາຍໃຕ້ຫົວຂໍ້ ການເປີດປະຕູສູ່ໂລກພາຍນອກທີ່ມີຄຸນນະພາບສູງ ເພື່ອສ້າງຄູ່ຮ່ວມຊາຕາກຳລາວ-ຈີນ ຂຶ້ນໃນວັນທີ 5 ກັນຍານີ້ ທີ່ນະຄອນ ຫຼວງວຽງຈັນ ສປປ ລາວ ໂດຍການເປັນກຽດເຂົ້າຮ່ວມຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ), ທ່ານນາງ ຟາງຫົງ ເອກອັກຄະລັດຖະທູດ ສປ ຈີນ ປະຈໍາ ລາວ, ທ່ານ ຕູ້ຈ້ານຢວນ ຫົວໜ້າສໍານັກການສື່ສານຕ່າງປະເທດ ສປ ຈີນ (CICG), ທ່ານ ຢາວປິ່ນ ປະທານສະພາການຄ້າຊາວຈີນຕ່າງດ້າວ, ມີນັກທຸລະກິດລາວ-ຈີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ມະໄລທອງ ກົມມະສິດ ກ່າວວ່າ: ການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ ໄດ້ພັດທະນາຢ່າງວ່ອງໄວ ແລະ ມີຄຸນນະພາບ ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງລາວ, ການກໍ່ສ້າງໂຄງການທາງລົດໄຟລາວ-ຈີນໄດ້ກາຍເປັນເງື່ອນໄຂໃໝ່, ເປັນຊ່ອງທາງທີ່ສ້າງຄວາມສະດວກ, ເພີ່ມຄວາມວ່ອງໄວ, ຫຼຸດຕົ້ນທຶນການຂົນສົ່ງ ແລະ ໄປມາຫາສູ່ທັງເປັນສັນຍາລັກການຮ່ວມມືແບບພິເສດລະຫວ່າງລາວ-ຈີນ ທີ່ກໍາລັງເລັ່ງການຫັນປ່ຽນໂຄງສ້າງເສດຖະກິດຂອງ ສປປ ລາວ ໃຫ້ເຊື່ອມໂຍງ ແລະ ເຊື່ອມຈອດກັບອາຊຽນ ແລະ ສປ ຈີນ ໃຫ້ໄວຂຶ້ນ ແລະ ຈະປ່ຽນໂສມໜ້າຂອງການພັດທະນາຂອງ ສປປ ລາວ ໃນອະນາຄົດ.
ກອງປະຊຸມຄັ້ງນີ້, ເປັນໂອກາດໃຫ້ສອງຝ່າຍໄດ້ປຶກສາຫາລືກ່ຽວກັບຊ່ອງທາງການຮ່ວມມືອັນໃໝ່ ໃນການພັດທະນາເສດຖະກິດ-ການຄ້າ ທັງມີຄວາມໝາຍຄວາມສໍາຄັນຕໍ່ການສົ່ງເສີມການກໍ່ສ້າງຄູ່ຮ່ວມຊາຕາກໍາລາວ-ຈີນ, ການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ ມີອະນາຄົດທີ່ສົດໃສ.
ທ່ານ ມະໄລທອງ ກົມມະສິດ ກ່າວເນັ້ນໜັກວ່າ: ພວກເຮົາມີຄວາມຍິນດີທີ່ຈະຮ່ວມກັບຝ່າຍຈີນ ຜັນຂະຫຍາຍ ແລະ ປະຕິບັດທິດນໍາຂອງການນໍາຂັ້ນສູງຂອງສອງປະເທດ, ເພີ່ມການຕິດຕໍ່ປະສານງານເພື່ອຊຸກຍູ້ການຈັດຕັ້ງປະຕິບັດແຜນກໍ່ສ້າງຄູ່ຮ່ວມຊາຕາກໍາລາວ-ຈີນສະບັບໃໝ່ ແລະ ຂະຫຍາຍການຮ່ວມມືໃຫ້ກວ້າງຂວາງ ແລະ ຮອບດ້ານ, ເພື່ອຜັນຂະຫຍາຍແນວຄິດຈິດໃຈທີ່ສໍາຄັນຂອງການນໍາສູງສຸດຂອງສອງປະເທດໃຫ້ມີຜົນສໍາເລັດ ແລະ ເປັນຮູບປະທຳ, ສົ່ງເສີມການສ້າງຄູ່ຮ່ວມຊາຕາກໍາລາວ-ຈີນໃຫ້ກ້າວຂຶ້ນສູ່ລະດັບໃໝ່; ຈະສືບຕໍ່ສົ່ງເສີມການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ, ຊຸກຍູ້ໃຫ້ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງຈີນໄດ້ເຊື່ອມຕໍ່ກັບຍຸດທະສາດຂອງລາວ ແລະ ຂອງອາຊຽນທີ່ຫັນຈາກປະເທດທີ່ບໍ່ມີທາງອອກສູ່ທະເລເປັນປະເທດທີ່ເຊື່ອມໂຍງ ແລະ ເຊື່ອມຈອດທາງບົກ, ຊຸກຍູ້ການກໍ່ສ້າງແລວເສດຖະກິດລາວ-ຈີນ, ສົ່ງເສີມໃຫ້ລາວໃຫ້ກາຍເປັນປະຕູ ແລະ ເປັນຂົວຕໍ່ໃຫຍ່ໜຶ່ງທີ່ເຊື່ອມຈີນ ແລະ ອາ ຊຽນ. ພວກເຮົາຄວນພັດທະນາຕາມແລວເສດຖະກິດ ຕິດພັນກັບການນໍາໃຊ້ທ່າແຮງຂອງເສັ້ນທາງລົດໄຟລາວ-ຈີນ, ສ້າງພື້ນຖານໂຄງລ່າງ ເປັນຕົ້ນໂຄງການທາງຫຼວງລະຫວ່າງລາວ-ຈີນໃຫ້ມີຄວາມຄືບໜ້າຢ່າງຊັດເຈນ ເພື່ອຍົກລະດັບການເຊື່ອມໂຍງ-ເຊື່ອມຈອດລະຫວ່າງລາວ-ຈີນ ແລະ ລະຫວ່າງຈີນ-ອາຊຽນ, ສ້າງໂຄງການທາງລົດໄຟລາວ-ຈີນໃຫ້ເປັນສາຍເລືອດໃຫຍ່ ເພື່ອອໍານວຍຄວາມສະດວກໃຫ້ແກ່ການຂົນສົ່ງ, ການຄ້າ, ການລົງທຶນ, ການຜະລິດ, ການທ່ອງທ່ຽວ ແລະ ການບໍລິການ; ຍິນດີຕ້ອນຮັບບັນດາວິສາຫະກິດຂອງຈີນໄປລົງທຶນພັດທະນາຢູ່ລາວ, ການພັດທະນາພື້ນຖານໂຄງລ່າງ, ການພັດທະນາພະລັງງານ, ການຜະລິດ, ການທ່ອງທ່ຽວ ແລະ ບໍລິການ ເພື່ອຜົນປະໂຫຍດຂອງສອງຝ່າຍ ແລະ ຈະຕັ້ງໜ້າສົ່ງເສີມການຮ່ວມມືລະຫວ່າງວິສາຫະກິດລາວ ແລະ ວິສາຫະກິດຈີນ ເພື່ອຮ່ວມກັນບຸກເບີກຕະຫຼາດສາກົນ ພ້ອມຫວັງວ່າຝ່າຍຈີນຈະເພີ່ມການແລກປ່ຽນ ແລະ ຖອດຖອນບົດຮຽນທາງດ້ານລະບຽບການ ແລະ ນະໂຍບາຍກັບຝ່າຍລາວ, ສ້າງກົນໄກການປະສານງານທີ່ເປັນເອກະພາບ ເພື່ອອໍານວຍຄວາມສະດວກໃນການຮ່ວມມືລະຫວ່າງວິສາຫະກິດຂອງສອງຝ່າຍ, ສົ່ງເສີມໃຫ້ການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ ໃຫ້ເຕີບໃຫຍ່ຂະຫຍາຍໂຕຢ່າງແຂງແຮງ ແລະ ປະກອບສ່ວນໃຫ້ແກ່ການພັດທະນາແບບຍືນຍົງຂອງ 2 ປະເທດ; ໃນປີ 2024 ນີ້, ສປປ ລາວ ເປັນປະທານອາຊຽນພາຍໃຕ້ຄໍາຂວັນ: “Enhancing Connectivity and Resilience ”ຫຼື “ ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ກະຊວງ ອຄ ໃນນາມເປັນປະທານຂອງເສົາຄໍ້າເສດຖະກິດອາຊຽນ ກໍໄດ້ຜັກດັນ ແລະ ໄດ້ຮັບການສະໜັບສະໜູນຈາກປະເທດສະມາ ຊິກໃນການຈັດຕັ້ງປະຕິບັດ 14 ບຸລິມະສິດທາງດ້ານເສດຖະກິດອາຊຽນ ຊຶ່ງປະກອບດ້ວຍສາມກຸ່ມຍຸດທະສາດຄື: ການເຊື່ອມໂຍງ ແລະ ເຊື່ອມຈອດດ້ານເສດຖະກິດ, ການສ້າງອະນາຄົດແບບຍືນຍົງ ແລະ ທຸກພາກສ່ວນມີສ່ວນຮ່ວມ ແລະ ການຫັນປ່ຽນເທື່ອລະກ້າວໄປສູ່ດີຈີຕອນໃນອະນາຄົດ. ໃນນັ້ນ, ບຸລິມະສິດທີ່ສໍາຄັນ ແລະ ອາດເປັນໂອກາດໃຫ້ລາວ ແລະ ຈີນໃນການຮ່ວມມື ລວມເຖິງການເຈລະຈາຍົກລະດັບສັນຍາການຄ້າເສລີອາຊຽນ-ສປ ຈີນ, ຖະແຫຼງການອາຊຽນວ່າດ້ວຍການເພີ່ມທະວີການເຊື່ອມຈອດຕ່ອງໂສ້ການສະໜອງ, ແຜນປະຕິບັດງານອາຊຽນວ່າດ້ວຍກະສິກຳແບບຍືນຍົງ, ແຜນດໍາເນີນງານກ່ຽວກັບມາດຕະຖານການຄ້າດີຈີຕອນອາຊຽນ ແລະ ແຜນວຽກບຸລິມະສິດອື່ນໆ. ລວມທັງການຈັດຕັ້ງປະຕິບັດສັນຍາຄູ່ຮ່ວມເສດຖະກິດຮອບດ້ານລະດັບພາກພື້ນ ຫຼື RCEP (Regional Comprehensive Economic Partnership) ແລະ ສະເໜີໃຫ້ບັນດາທ່ານສຶກສາບຸລິມະສິດດັ່ງກ່າວ ເພື່ອເປັນພື້ນຖານໃຫ້ແກ່ການພັດທະນາການຮ່ວມມືລະ ຫວ່າງ ສປ ຈີນ ແລະ ລາວ, ລະຫວ່າງ ສປ ຈີນ ແລະ ອາຊຽນ ທັງໃນປັດຈຸບັນ ແລະ ອະນາຄົດ; ກະ ຊວງ ອຄ ມີຄວາມຍິນດີທີ່ຈະເພີ່ມການຮ່ວມມື ແລະ ແລກປ່ຽນກັບບັນດາອົງການສື່ມວນຊົນ ແລະ ອົງການ ຈັດຕັ້ງດ້ານຄັງປັນຍາຂອງສອງປະເທດລາວ-ຈີນ. ໃນນັ້ນ, ລວມມີສໍານັກການສື່ສານຕ່າງປະເທດ ສປ ຈີນ (CICG), ຜ່ານການໂຄສະນາຂອງບັນດາສື່ມວນຊົນ, ການສຳມະນາລະຫວ່າງຄັງປັນຍາສອງປະເທດ ກໍຄືການແລກປ່ຽນກັນດ້ານວັດທະນະທໍາ-ສັງຄົມ ແລະ ຈະເຕົ້າໂຮມຄວາມຄິດຄວາມເຫັນຕ່າງໆກ່ຽວກັບການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນ, ເພື່ອສ້າງສະພາບແວດລ້ອມທີ່ດີໃຫ້ການຮ່ວມມືດ້ານເສດຖະກິດ-ການຄ້າລະຫວ່າງລາວ-ຈີນໄດ້ພັດທະນາຢ່າງມີຄຸນນະພາບສູງ. ກອງປະຊຸມໃນຄັ້ງນີ້, ຈະນໍາເອົາຜົນປະໂຫຍດສູ່ປະຊາຊົນສອງຊາດໄດ້ຫຼາຍຂຶ້ນກວ່າເກົ່າ ທັງປະກອບສ່ວນອັນໃຫຍ່ຫຼວງເຂົ້າໃນການຮັກສາສັນຕິພາບ, ການພັດທະນາ ແລະ ຄວາມຈະເລີນຮຸ່ງເຮືອງໃນພາກພື້ນ.
ກອງປະຊຸມໄດ້ຮັບການສະໜັບສະໜູນຈາກສະພາການຄ້າຊາວຈີນຕ່າງດ້າວປະຈໍາລາວ, ສູນໂຄສະນາອາຊີ-ປາຊີຟິກຂອງສຳນັກການສື່ສານພາສາຕ່າງປະເທດຈີນ, ສໍານັກພິມ ແລະ ຈໍາໜ່າຍຂອງສຳນັກການສື່ສານພາສາຕ່າງປະເທດຈີນ ແລະ ຄັງປັນຍາແຫ່ງອາຊາ-ປາຊີຟິກ.
ຂໍ້ມູນ: ປະຊາຊົນ
