ກອງປະຊຸມວຽກງານຂົນສົ່ງທາງບົກ ລະຫວ່າງ ລາວ – ໄທ ປະຈຳປີ 2024 ມີຂຶ້ນໃນວັນທີ 5 ກັນຍາ 2024 ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ ( ຍທຂ ) ສປປ ລາວ, ທ່ານ ຈິຣຸດ ວິສານຈິດ ອະທິບໍດີກົມການຂົນສົ່ງທາງບົກ ຣາຊະອານາຈັກໄທ.
ກອງປະຊຸມ ແມ່ນໄດ້ຫາລືກ່ຽວກັບວຽກງານ ດັ່ງນີ້:
1). ການຂົນສົ່ງຜູ້ໂດຍສານ: ລາຍງານຜົນການແລ່ນລົດໂດຍສານປະຈຳທາງ ລະຫວ່າງ ລາວ – ໄທ; ລາຍງານຜົນການຈັດຕັ້ງປະຕິບັດກອງປະຊຸມວິຊາການ; ການສະເໜີຫຼັກການໃນການກຳນົດອັດຕາຄ່າໂດຍສານ; ການສະເໜີແນວທາງການເກັບກຳ ແລະ ວິເຄາະຂໍ້ມູນກ່ຽວກັບການແລ່ນລົດໂດຍສານປະຈຳທາງລະຫວ່າງປະເທດແບບໃໝ່.
2). ການຂົນສົ່ງສິນຄ້າ: ລາຍງານວິຊາການຂົນສົ່ງສິນຄ້າ; ມາດຕະການດ້ານການຂົນສົ່ງມສິນຄ້າຂ້າມແດນ ແລະ ຜ່ານແດນຂອງ ສປປ ລາວ; ການເປີດໃຊ້ພື້ນທີ່ຄວບຄຸມຮ່ວມກັນ ( Common Control Area: CCA ).
3). ການປະຊຸມວິຊາການ ເພື່ອພິຈາລະນາຮ່າງສັນຍາ ວ່າດ້ວຍການຂົນສົ່ງທາງບົກ ລາວ – ໄທ.
4). ຄວາມຄືບໜ້າການກໍ່ສ້າງຂົວແຫ່ງທີ 5.
5). ຄວາມຄືບໜ້າການກໍ່ສ້າງຂົວມິດຕະພາບ ລາວ – ໄທ ແຫ່ງທີ 5.
6). ກອງປະຊຸມຈະມີການກຳນົດວັນ ແລະ ສຳລັບຈັດກອງປະຊຸມຄັ້ງຕໍ່ໄປ.
ທ່ານ ບຸນຕາ ອ່ອນນາວົງ ຫົວໜ້າກົມຂົນສົ່ງ ກ່າວບາງຕອນວ່າ: ກອງປະຊຸມຄັ້ງນີ້ ແມ່ນມີຄວາມໝາຍສຳຄັນຕໍ່ການພັດທະນາວຽກງານການເຊື່ອມໂຍງ – ເຊື່ອມຈອດ ລະບົບການຄົມມະນາຄົມຂົນສົ່ງ ລະຫວ່າງປະເທດ ເວົ້າລວມ, ເວົ້າສະເພາະແມ່ນວຽກງານການຂົນສົ່ງຜູ້ໂດຍສານ ແລະ ການຂົນສົ່ງສິນຄ້າ ລະຫວ່າງ 2 ປະເທດ ເນື່ອງຈາກທັງ 2 ປະເທດ ແມ່ນເປັນປະເທດໃກ້ຄຽງ ແລະ ມີສາຍພົວພັນກັນມາແຕ່ດົນນານ. ຜ່ານມາລັດຖະບານ ແລະ ກະຊວງໂຍທາ ທັງ 2 ຝ່າຍ ກໍໄດ້ມີການຊຸກຍູ້ສົ່ງເສີມວຽກງານດັ່ງກ່າວໃຫ້ມີຄວາມສະດວກ ແນໃສ່ຮັບປະກັນການນຳເຂົ້າ ແລະ ສົ່ງອອກສິນຄ້າລະ ຫວ່າງປະເທດ.
ທ່ານ ຈິຣຸດ ວິສານຈິດ ອະທິບໍດີກົມການຂົນສົ່ງທາງບົກ ຣາຊະອານາຈັກໄທ ກ່າວບາງຕອນວ່າ: ຜ່ານມາການຊຸກຍູ້ສົ່ງເສີມວຽກງານການຂົນສົ່ງທາງບົກ ໃຫ້ມີ ຄວາມສະດວກ ລະຫວ່າງ ສປປ ລາວ ແລະ ຣາຊະອານາຈັກໄທ ແມ່ນພວກເຮົາໄດ້ຈັດກອງປະຊຸມຮ່ວມກັນເລື້ອຍໆ.
ຫຼ້າສຸດໃນວັນທີ 4 ກັນຍາ 2024 ທີ່ເດີນທາງມາຮ່ວມກອງປະຊຸມຄັ້ງນີ້ ຂ້າພະເຈົ້າກໍໄດ້ທົດລອງນັ່ງລົດໄຟ ລາວ – ໄທ ຈາກບາງກອກປະເທດໄທ ມາສະຖານີຄຳສະຫວາດ ກໍເຫັນວ່າມີຄວາມສະດວກສະບາຍຫຼາຍຢ່າງ ເຊິ່ງນີ້ກໍແມ່ນໝາກຜົນຂອງການຮ່ວມມືຂອງ 2 ປະເທດ ທີ່ເປັນການເພີ່ມທາງເລືອກໃໝ່ໃນການຂົນສົ່ງທາງບົກໃຫ້ແກ່ບັນດາຜູ້ໂດຍສານ, ພາກທຸລະກິດ ແລະ ການຂົນສົ່ງ.
