ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ວຽກງານການເງິນ ໂດຍສະເພາະແມ່ນການເກັບລາຍຮັບເຂົ້າງົບປະມານ ປະຈໍາປີ 2024 ຢູ່ດ່ານຊາຍແດນສາກົນວັງເຕົ່າ ເມືອງໂພນທອງ ແຂວງຈໍາປາສັກ ໃນວັນ 2 ກັນຍາ 2024.
ໃຫ້ການຕ້ອນຮັບ ແລະ ຮ່ວມເຮັດວຽກ ໂດຍທ່ານ ພັນໂທ ສີຜາ ຂຸນພົນພັກດີ ຫົວໜ້າຄະນະຄຸ້ມຄອງດ່ານຊາຍແດນສາກົນວັງເຕົ່າ, ມີທ່ານ ສຸກກະເສີມ ສີຫາວົງ ຫົວໜ້າພະແນກການເງິນແຂວງ ພ້ອມຂະແໜງການທີ່ກ່ຽວຂ້ອງເຂົ້າຮ່ວມ.
ທ່ານຫົວໜ້າຄະນະຄຸ້ມຄອງດ່ານຊາຍແດນສາກົນວັງເຕົ່າ ໄດ້ລາຍງານສະພາບການນໍາພາ – ຊີ້ນໍາການຈັດຕັ້ງປະຕິບັດວຽກງານແຕ່ລະດ້ານ ໂດຍຍົກໃຫ້ເຫັນສະພາບລວມຈຸດພິເສດ, ທີ່ຕັ້ງ, ດ້ານໂຄງປະກອບການຈັດຕັ້ງດ່ານຊາຍແດນສາກົນວັງເຕົ່າ, ການນໍາພາຈັດຕັ້ງປະຕິບັດວຽກງານແຕ່ລະດ້ານ ນັບແຕ່ວຽກງານສຶກສາອົບຮົມການເມືອງ – ແນວຄິດ, ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ວຽກງານປັບປຸງລະບຽບການຄຸ້ມຄອງດ່ານ, ການເຄື່ອນໄຫວວຽກງານວິຊາສະເພາະຂອງແຕ່ລະຂະແໜງການ, ວຽກງານຂອງຄະນະກໍາມະການ ຄະນະຄຸ້ມຄອງດ່ານຊາຍແດນສາກົນວັງເຕົ່າ ປະກອບມີ: ໜ່ວຍງານກັກກັນພືດ – ກັກກັນສັດ, ອາຫານ ແລະ ຢາ, ຄວບຄຸມພະຍາດລະບາດ ແລະ ພົວພັນຊາຍແດນ. ພ້ອມນີ້, ຍັງຜ່ານທິດທາງແຜນການໃນຕໍ່ໜ້າຕື່ມອີກ.
ທ່ານ ພູຊ່ອງ ສົມຄິດ ຫົວໜ້າດ່ານພາສີສາກົນວັງເຕົ່າ ແລະ ທ່າບົກວັງເຕົ່າ ໄດ້ລາຍງານວ່າ: ຈັດຕັ້ງປະຕິບັດຈັດເກັບລາຍຮັບໃນ 8 ເດືອນ ປີ 2024 ໄດ້ທັງໝົດ 1.018 ຕື້ກີບ, ທຽບໃສ່ແຜນການປີປະຕິບັດໄດ້ 75,48%, ທຽບໃສ່ໄລຍະດຽວຂອງປີກ່ອນ ເພີ່ມຂຶ້ນ 29,68%. ຄາດຄະເນໝົດປີຈະຈັດເກັບລາຍຮັບໄດ້ 1.475 ຕື້ກີບ ເທົ່າກັບ 109,22%.
ຕອນທ້າຍ, ທ່ານລັດຖະມົນຕີກະຊວງການເງິນ ກໍມີຄໍາເຫັນໂອ້ລົມ ໂດຍເນັ້ນໜັກໃຫ້ຄະນະພັກ – ຄະນະຄຸ້ມຄອງດ່ານຊາຍແດນສາກົນວັງເຕົ່າ ສືບຕໍ່ເອົາໃຈໃສ່ປະຕິບັດໜ້າທີ່ການເມືອງທີ່ໄດ້ຮັບມອບໝາຍໃຫ້ມີຜົນສໍາເລັດ, ມີການແບ່ງງານ, ແບ່ງ ຄວາມຮັບຜິດຊອບຢ່າງລະອຽດຈະແຈ້ງ, ມີການສະຫຼຸບ, ມີການກວດກາ, ຕີລາຄາປະເມີນຜົນການນໍາພາ – ຊີ້ນໍາຢ່າງເປັນປົກກະຕິ ແລະ ຕໍ່ເນື່ອງ.
[ ຂ່າວ – ຮູບ: ທູນທອງໃຈ ]
