ການປູກ – ການລ້ຽງ ແມ່ນໜຶ່ງໃນອາຊີບທີ່ສ້າງລາຍຮັບເຂົ້າໃນຄອບຄົວ ເຮັດໃຫ້ຄອບຄົວມີຊີວິດການເປັນຢູ່ດີຂຶ້ນ ແລະ ສາມາດຫຼຸດພົ້ນອອກຈາກ ຄວາມທຸກຍາກໄດ້ເທື່ອລະກ້າວ ຕາມແນວທາງນະໂຍບາຍຂອງພັກ – ລັດວາງອອກ ດ້ານການສ້າງເສດຖະກິດເອກະລາດໃນໄລຍະໃໝ່, ຜະລິດຫຼາຍເພື່ອກາຍເປັນສິນຄ້າສ້າງລາຍຮັບເຂົ້າຄອບຄົວ ເຮັດໃຫ້ຄອບຄົວກຸ້ມຢູ່ກຸ້ມກິນ ສາມາດເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ດັ່ງຄອບຄົວຂອງ ທ່ານ ທອງຊ່ຽນ ວິໄລສິດ ອາຊີບປະຊາຊົນຢູ່ບ້ານດອນຕູມ ເມືອງນານ ແຂວງ ຫຼວງພະບາງ ແມ່ນໜຶ່ງໃນຄອບຄົວຕົວແບບໃນການຜະລິດເຂົ້າ ຕາມທ່າແຮງທີ່ມີ ເພື່ອຂາຍເປັນສິນຄ້າ.
ພາຍໃນຄອບຄົວມີສະມາຊິກທັງໝົດ 6 ຄົນ. ໃນນີ້, ແຮງງານຕົວຈິງມີ 2 ຄົນ ເຊິ່ງເປັນອີກໜຶ່ງຄອບຄົວທີ່ມີຄວາມດຸໝັ່ນຂະຫຍັນພຽນ ໂດຍໄດ້ຫັນເອົາການປູກເຂົ້າເປັນອາຊີບຕົ້ນຕໍ ເພື່ອຕອບສະໜອງການບໍລິໂພກຕາມທ້ອງຕະຫຼາດ.
ທ່ານ ທອງຊ່ຽນ ວິໄລສິດ ໃຫ້ຮູ້ວ່າ: ໃນຄອບຄົວມີເນື້ອທີ່ນາທັງໝົດ 1 ເຮັກຕາເຄິ່ງ ສາມາດຜະລິດເຂົ້າໄດ້ທັງສອງລະດູ ຄື: ນາປີ ແລະ ນາແຊງ. ຜົນຜະລິດໄດ້ທັງໝົດ 10 ໂຕນຕໍ່ລະດູ, ສະເລ່ຍລາຍຮັບຈາກການຂາຍເຂົ້າທັງໝົດ 160 ລ້ານກີບຕໍ່ປີ, ໃນເບື້ອງຕົ້ນການປູກເຂົ້າແມ່ນປູກແບບປະຖົມປະຖານຕາມທໍາມະຊາດ ແຕ່ພາຍຫຼັງຫັນເອົາເຕັກນິກວິທີການແບບໃໝ່ເຂົ້າໃນການຜະລິດ ໂດຍໄດ້ນໍາໃຊ້ເຄື່ອງຈັກໃນການປັກດໍາ ( ເຊິ່ງໄດ້ປັກດໍາໃນໄລຍະຕົ້ນເດືອນກໍລະກົດຂອງທຸກປີ ) ພາຍຫຼັງປັກດໍາໄດ້ປະມານ 1 ອາທິດ ໄດ້ຫວ່ານປຸ໋ຍໃນຮອບທໍາອິດ ເພື່ອກະຕຸ້ນການຈະເລີນເຕີບໂຕຂອງຕົ້ນເຂົ້າ ພ້ອມທັງບົວລະບັດຮັກສາຕົ້ນເຂົ້າ ບໍ່ໃຫ້ສັດຕູພືດທໍາລາຍ ຈາກນັ້ນອີກປະມານ 1 ເດືອນໄດ້ຫວ່ານປຸ໋ຍໃນຮອບທີ່ສອງ.
ທ່ານ ທອງຊ່ຽນ ວິໄລສິດ ໃຫ້ຮູ້ຕື່ມວ່າ: ມາເຖິງປັດຈຸບັນໃນຄອບຄົວ ສາມາດສ້າງລາຍຮັບທີ່ໝັ້ນທ່ຽງ ແລະ ກາຍເປັນຄອບຄົວຕົວແບບ, ສະແດງອອກມີເຮືອນຢູ່ຖາວອນໜຶ່ງຫຼັງ, ມີລົດ ໃຫຍ່ໜຶ່ງຄັນ ແລະ ໄດ້ສົ່ງລູກໄປຮຽນຕໍ່ວິຊາຊີບຈົນຈົບ.
ໂອກາດນີ້, ທ່ານໄດ້ເຊີນຊວນຜູ້ທີ່ມີເງື່ອນໄຂໃຫ້ຫັນມາສ້າງເສດຖະກິດເປັນຂອງຕົນເອງ ເພື່ອສ້າງລາຍຮັບເຂົ້າຄອບຄົວ ແລະ ເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ.
[ ຂ່າວໂດຍ: ຫຸມແພງ ສີດາໄລ]
