ຄອບຄົວຂອງ ທ່ານ ເບຼ່ຍດູ່ ຮາ ອາຍຸ 32 ປີ ເຜົ່າມົ້ງປະຊາຊົນບ້ານຜາບ່ອງ ເມືອງຄອບ ແຂວງໄຊຍະບູລີ ໄດ້ເວົ້າສູ່ຟັງວ່າ: ພາຍໃນຄອບຄົວມີນໍາກັນທັງໝົດ 4 ຄົນ ແຕ່ມີແຮງງານຕົ້ນຕໍ 2 ຄົນ.
ໃນເມື່ອກ່ອນຄອບຄົວແມ່ນຢຶດຖືອາຊີບເຮັດໄຮ່ ປູກເຂົ້າ ແລະ ລ້ຽງສັດໃຫຍ່ ປະເພດງົວຈໍານວນໜຶ່ງ ແຕ່ໃນໄລຍະນັ້ນກໍຖືວ່າຄອບຄົວແມ່ນພໍແຕ່ກຸ້ມກິນ ບາງຊ່ວງກໍຂາດເຂີນເອົາແຕ່ດິນຟ້າອາກາດ ຖ້າຖືກໄລຍະຟ້າຝົນອໍານວຍຜົນຜະລິດກໍໄດ້ຫຼາຍ ຖ້າຝົນຟ້າບໍ່ອໍານວຍດີ ກໍເຮັດໃຫ້ຜົນຜະລິດບໍ່ໄດ້ຮັບຜົນເຕັມເມັດເຕັມໜ່ວຍ, ຍ້ອນແນວນັ້ນຕົນເອງ ແລະ ຄອບຄົວ ຈຶ່ງໄດ້ປຶກສາກັນເພື່ອຊອກຫາທາງອອກ ເລີຍຕັດສິນໃຈຫັນມາປູກຢາງພາລາໃນປີ 2006 ໃນເນື້ອທີ່ 16 ເຮັກຕາ ມີເບ້ຍຢາງພາລາ 8.000 ເບ້ຍ ປູກໄລຍະ 3 x 7 ແມັດ ລົງທຶນເບື້ອງຕົ້ນ 200 ລ້ານກີບ ເປັນເວລາ 8 ປີ ຮອດປີ 2015 ກໍໄດ້ປາດນໍ້າຢາງ ແລະ ສາມາດສ້າງລາຍຮັບເຂົ້າໃນຄອບຄົວຕອນນັ້ນໄດ້ 100 ກວ່າລ້ານກີບຕໍ່ປີ.
ຕົກມາຮອດປີ 2017 ລາຍຮັບໃນການຂາຍນໍ້າຢາງເພີ່ມຂຶ້ນ ໄດ້ທັງໝົດ 200 ລ້ານກວ່າກີບ ແລະ ຮອດປີ 2021 ຂາຍນໍ້າຢາງໄດ້ 900 ລ້ານກວ່າກີບ ໃນລາຄາຂາຍໂຕນລະ 12 ລ້ານກີບ ຍ້ອນຕົ້ນຢາງມີອາຍຸເຕັມສ່ວນທີ່ໃຫ້ນໍ້າຢາງຫຼາຍ ສ່ວນການປາດແມ່ນໄດ້ຈ້າງຄົນປາດຢາງໃຫ້ ໂດຍຄ່າຈ້າງຫານເຄິ່ງກັນອາທິດໜຶ່ງປາດເທື່ອໜຶ່ງ ເມື່ອເຫັນວ່າໃນແຕ່ລະປີລາຍຮັບມີການເພີ່ມຂຶ້ນ ຄອບຄົວຂອງຂ້າພະເຈົ້າຈຶ່ງໄດ້ລົງທຶນຊື້ດິນຕື່ມອີກ 16 ເຮັກຕາ ແລ້ວປູກຢາງ 8.000 ເບ້ຍ ປັດຈຸບັນພວມຈະເລີນເຕີບໂຕງາມດີ ແຕ່ຍັງບໍ່ທັນໃຫ້ຜົນຜະລິດເທື່ອ ຄາດວ່າປີ 2029 ອາດຈະໄດ້ຮັບຜົນຜະລິດ.
ນອກຈາກປູກຢາງພາລາແລ້ວ ຄອບຄົວຍັງໄດ້ລ້ຽງງົວເພື່ອເປັນສິນຄ້າ ໃນປີ 2017 ໄດ້ລ້ຽງງົວໃນຈໍານວນ 35 ໂຕ ລ້ຽງໄດ້ 5 ປີ ຂາຍອອກໄດ້ເງິນ 130 ລ້ານກີບ ແລະ ມາຮອດປີ 2021 ຄອບຄົວໄດ້ຊື້ງົວມາລ້ຽງເພີ່ມຕື່ມ 80 ໂຕ ເພາະວ່າລາຍໄດ້ໃນການຂາຍງົວແມ່ນດີ ເຊິ່ງມາຮອດປັດຈຸບັນມີງົວທັງໝົດ 100 ໂຕ, ມີຕົ້ນຢາງພາລາທັງໝົດ 15.000 ກວ່າຕົ້ນ ສັງລວມແລ້ວການປູກຢາງພາລາ ແລະ ລ້ຽງງົວສາມາດສ້າງລາຍຮັບໃຫ້ແກ່ຄອບຄົວປີໜຶ່ງ ໄດ້ 1 ຕື້ 30 ລ້ານກວ່າກີບ ຖ້າສະເລ່ຍໃສ່ຫົວຄົນພາຍໃນຄອບຄົວໄດ້ 128 ລ້ານກວ່າກີບຕໍ່ຄົນຕໍ່ປີ ປັດຈຸບັນນີ້ຄອບຄົວແມ່ນມີເສດຖະກິດດີຂຶ້ນ ມີພື້ນຖານທີ່ແໜ້ນໜາ ລາຍຮັບທີ່ໝັ້ນຄົງ.
ທ່ານຍັງກ່າວຕື່ມວ່າ: ໃນຕໍ່ໜ້າຄອບຄົວແມ່ນຈະສືບຕໍ່ບົວລະບັດຮັກສາສວນຢາງ ປາດຢາງພາລາໂຕເກົ່າໃຫ້ເປັນປົກກະຕິ ແລະ ບົວລະບັດຮັກສາຕົ້ນຢາງທີ່ປູກໃໝ່ໃຫ້ໄດ້ປາດປີ 2029 ແລະ ສືບຕໍ່ກິດຈະກໍາລ້ຽງງົວໃຫ້ຫຼາຍ ເພື່ອຂະຫຍາຍກາຍເປັນການລ້ຽງແບບເປັນຟາມ ແລະ ປູກຫຍ້າລ້ຽງ.
[ ຮຽບຮຽງໂດຍ: ພຸດຕີ້ ]
