ໄລຍະນີ້ກໍໃກ້ຈະໝົດລະດູຝົນແລ້ວ ຈຶ່ງເໝາະແກ່ການກຽມປູກຜັກສວນຄົວໄວ້ກິນເອງ, ທັງນີ້ກໍເພື່ອເປັນການຊ່ວຍປະຢັດລາຍຈ່າຍໃນໄລຍະທີ່ເສດຖະກິດມີຄວາມຫຍຸ້ງຍາກແບບນີ້.
ມື້ນີ້ຈະມາແນະນຳວິທີປູກຜັກກາດຊອມໄວ້ກິນເອງພາຍໃນຄອບຄົວ ຫຼື ຈະປູກໄວ້ຂາຍກໍດີ.
ທຳອິດແມ່ນຂຸດດິນໃຫ້ເປັນຮູບໜານຕາມເນື້ອທີ່ດິນ, ຈາກນັ້ນກໍຕາກດິນໄວ້ປະມານອາທິດໜຶ່ງ ແລ້ວຊັບໃຫ້ລະອຽດພ້ອມນຳຂີ້ແກບຈູດ ທີ່ປະສົມກັບຝຸ່ນຄອກ ( ຂີ້ງົວ – ຄວາຍ, ຂີ້ໝູ, ຂີ້ເປັດ, ຂີ້ໄກ່ ) ປະສົມກັບດິນແລ້ວຕີເປັນໜານ ໂດຍແບ່ງໜານຈະຫວ່ານເບ້ຍ ແລະ ໜານປູກ.
ໜານທີ່ຈະນຳແນວພັນ ( ແກ່ນຜັກກາດ ) ໃຫ້ຫົດນໍ້າກ່ອນ, ຈາກນັ້ນກໍນຳແນວພັນຫວ່ານລົງໄປໃຫ້ຖີ່ ແລ້ວກໍນຳເຟືອງມາປົກໄວ້ ຫົດນໍ້າປົກກະຕິເຊົ້າ – ແລງ ຈົນ ກວ່າເບ້ຍຜັກກາດຊອມຈະໃຫຍ່ ມີຄວາມສູງ 10 – 15 ຊັງຕີແມັດ, ຈາກນັ້ນກໍຍ້າຍລົງໄປບົງ ຫຼື ປູກເປັນແຖວ ຫ່າງກັນປະມານ 10 ຊັງຕີແມັດ ຫຼັງບົງແລ້ວໃຫ້ນຳເຟືອງ ຫຼື ຜ້າມາປົກດ້ານເທິງ ເພື່ອບໍ່ໃຫ້ຕາຍແດດ, ຈາກນັ້ນກໍຫົດນໍ້າເຊົ້າ – ແລງ.
ຫຼັງປູກໄປໄດ້ 20 – 25 ມື້ ໃຫ້ໃສ່ປຸ໋ຍກໍໄດ້ ໂດຍໃຊ້ປຸ໋ຍຢູເຣຍ ສູດ ( 46-0-0 ) ຖ້າບໍ່ຢາກໃສ່ກໍໄດ້ ແຕ່ໃຫ້ເພີ່ມຝຸ່ນຄອກໃສ່ ພ້ອມທັງຫຼົກຫຍ້າໃຫ້ກ້ຽງ ປະມານ 45 – 50 ມື້ ຜັກກາດຊອມກໍໃຫຍ່ສາມາດເກັບກິນໄດ້ ຫຼື ຈະປະດົນກວ່ານັ້ນກໍໄດ້.
ສຳລັບຜັກກາດຊອມ ເວລາເກັບສາມາດຫັກເອົາຈາກເຫງົ້າຂຶ້ນມາ ປະຂໍ້ໃບໄວ້ປະມານ 2 – 3 ຂໍ້ ຖ້າສືບຕໍ່ຫົດນໍ້າ ໃສ່ຝຸ່ນ ຕົ້ນຜັກກາດຊອມກໍຈະແຕກໜໍ່ຈໍ່ໃບອອກມາໃຫ້ເກັບກິນໄດ້ອີກ ເທົ່ານີ້ທ່ານກໍສາມາດປະຢັດລາຍຈ່າຍໃນການຊື້ຜັກກາດມາກິນພາຍໃນຄອບຄົວ ແລະ ຜັກກາດຊອມສາມາດເຮັດກິນໄດ້ຫຼາຍເມນູອີກດ້ວຍ.
