ໝາກພ້າວນໍ້າຫອມ ເປັນພືດເສດຖະກິດໜຶ່ງ ທີ່ໃຫ້ຜົນຍາວນານ 7 – 10 ປີ ຫາກປູກປະແບບທຳມະຊາດກໍຈະໃຫ້ຜົນຫຼາຍ 10 ປີ ແຕ່ຫາກຈະປູກແບບສ້າງເສດຖະກິດ ຫຼື ປ້ອນຕະຫຼາດແມ່ນຕ້ອງເຮັດໃຫ້ຖືກຕ້ອງຕາມວິທີ, ທີ່ສຳຄັນເປັນໝາກໄມ້ຊະນິດໜຶ່ງທີ່ຕະຫຼາດຕ້ອງການຈຳນວນຫຼາຍ, ທັງສາມາດນຳໄປແປຮູບໄດ້ຫຼາຍແບບ ເນື່ອງຈາກສາມາດບໍລິໂພກໄດ້ທັງໜ່ວຍອ່ອນ, ແກ່ ແລະ ທີ່ສຳຄັນສາມາດເກັບມ້ຽນໄວ້ດົນໄດ້.
ພື້ນທີ່ປູກຄວນຢູ່ກາງແຈ້ງ, ໃກ້ກັບແຫຼ່ງນໍ້າ ແລະ ມີການລະບາຍນໍ້າໄດ້ດີ, ບໍ່ເປັນແຫຼ່ງທີ່ເຄີຍມີພະຍາດ ຫຼື ແມງໄມ້ລະບາດມາກ່ອນ, ດິນຄວນເປັນດິນຊາຍຫຍາບ, ຄວນກຳຈັດຫຍ້າ ຫຼື ຕົ້ນໄມ້ນ້ອຍໆທີ່ບໍ່ແມ່ນພືດປູກອອກ ຫາກດິນແຂງເກີນໄປໃຫ້ໄຖຫຸດກ່ອນ ໂດຍເລິກປະມານ 15 – 20 ຊັງຕີແມັດ, ແປງຄວນກວ້າງປະມານ 2,5 ແມັດ ຍາວຕາມຄວາມຕ້ອງການ ເວັ້ນໄລຍະຫ່າງແປງ 50 ຊັງຕີແມັດ.
■ ການກຽມຂຸມ: ຄວນກຽມໄລຍະທ້າຍເດືອນພຶດສະພາ ຫາ ຕົ້ນເດືອນມິຖຸນາ ຫາກດິນບໍ່ຄ່ອຍມີຄວາມສົມບູນ ໃຫ້ຂຸດຂຸມກວ້າງ 80x80x70 ຊັງຕີແມັດ, ຫາກດິນອຸດົມສົມບູນ ປະມານ 50x50x50 ຊັງຕີແມັດໄດ້ ແລ້ວປະສົມຝຸ່ນຄອກ ຫຼື ແກບຂາວ ກັບ ແກບດຳຮອງພື້ນ, ຈາກນັ້ນກໍເລືອກພັນໝາກພ້າວທີ່ຈະເອົາມາປູກ ແລ້ວຕັດຮາກເດີມອອກ ກ່ອນຈະລົງປູກ ໂດຍປູກໃຫ້ຈົ່ງໜໍ່ພ້າວໂພ່ຂຶ້ນຈາກດິນ ປະມານ 1/3 ຂອງໜ່ວຍແລ້ວປົກດິນໃຫ້ແໜ້ນໆ.
ຫຼັງຈາກປູກໄດ້ 4 ເດືອນ ສາມາດເລີ່ມໃຫ້ປຸ໋ຍເທື່ອທຳອິດໄດ້ ໂດຍໃຊ້ປຸ໋ຍສູດ 13-13-21 ແລະ ສູດ 12-12-17-2 ອັດຕາຕົ້ນລະກິໂລ ຮ່ວມແມັກນີຊຽມຊັລເຟດ 200 ກຣາມ ຄັ້ງທີ 2 ໃສ່ໃນອັດຕາເດີມໃນຊ່ວງປາຍຝົນ ( ຕຸລາ ) ພ້ອມໃຫ້ໃສ່ປຸ໋ຍອິນຊີ ຫຼື ມູນສັດ ເພື່ອຊ່ວຍໃນການປັບປຸງດິນໃຫ້ມີຄຸນນະພາບ.
■ ການໃຫ້ນໍ້າ: ຫາກປູກໃນແປງ ຫຼື ໜານ ທີ່ຍົກຮ່ອງ ( ຄູນໍ້າດ້ານຂ້າງ ) ໃຫ້ນໍ້າເທົ່າກັບພືດພັກທົ່ວໄປໄດ້ ເພາະຮາກຕົ້ນໝາກພ້າວຈະແຜ່ ແລະ ຢັ່ງລົງພື້ນດິນດູດຊຶມນໍ້າເອງ ເຮັດໃຫ້ຕົ້ນພ້າວຈະເລີນເຕີບໂຕດີ, ເປັນໝາກດົກ, ຫາກປູກໃນພື້ນທີ່ດິນທົ່ວໄປ ກໍໃຫ້ຫົດນໍ້າໂດຍຮັກສາ ຄວາມຊຸ່ມຂອງໜ້າດິນໄວ້.
ພໍໄດ້ປີປາຍ ຫາ 2 ປີ ກໍຈະເລີ່ມອອກແຊງດອກ ເຊິ່ງໄລຍະທຳອິດຈະອອກໜ້ອຍ ສ່ວນປີຕໍ່ໄປຈະເລີ່ມອອກຫຼາຍແຊງຂຶ້ນ ເຊິ່ງແຊງຈະໃຫ້ຂະໜາດ ແລະ ຄວາມສົມບູນແກ່ໝາກພ້າວໄດ້ 1 ແຊງ ຄວນຈະມີລູກ 10 – 18 ໜ່ວຍ ຫາກແຊງໃດທີ່ອອກໝາກຫຼາຍເກີນເຮົາກໍຕັດອອກໄດ້ ( ໝາກພ້າວໜ່ວຍຈະນ້ອຍ ແມ່ນຂຶ້ນກັບສະພາບດິນ, ແຫຼ່ງນໍ້າ, ສະພາບອາກາດ ແລະ ການຮັກສາ ).
[Kasetorganic]
