ລາຄານໍ້າມັນດິບໃນຕະຫຼາດໂລກຫຼຸດລົງຫຼາຍເຖິງ 3,21 ໂດລາ ສູ່ລະດັບຕໍ່າສຸດໃນຮອບ 9 ເດືອນ ໂດຍສັນຍານໍ້າມັນດິບ ເວັດເທັກຊັດ ( WTI ) ງວດສົ່ງມອບເດືອນຕຸລາປິດຕະຫຼາດໃນວັນພຸດທີ 3 ກັນຍາ ຫຼຸດລົງ 3,21 ໂດລາ ຫຼື 4,36% ປິດທີ່ 70,34 ໂດລາສະຫະລັດຕໍ່ບາເຣລ. ສ່ວນສັນຍານໍ້າມັນດິບ ເບຣນ ( BRENT ) ສົ່ງມອບເດືອນພະຈິກ ຫຼຸດລົງ 3,77 ໂດລາ ຫຼື 4,86% ປິດທີ່ 73,75 ໂດລາສະຫະລັດຕໍ່ບາເຣລ.
ລາຄານໍ້າມັນດິບເວັດເທັກຊັດ ແລະ ເບຣນ ລ້ວນແຕ່ປິດທີ່ລະດັບຕໍ່າສຸດ ນັບຕັ້ງແຕ່ເດືອນທັນວາ ປີ 2023.
ລາຄານໍ້າມັນດິບ ຖືກກົດດັນຈາກຂ່າວທີ່ປະເທດຜູ້ສົ່ງອອກນໍ້າມັນ ແລະ ຊາດພັນທະມິດ ໂອເປັກບວກ ກຽມເດີນໜ້າແຜນເພີ່ມກຳລັງການຜະລິດລວມ 180.000 ບາເຣລຕໍ່ວັນ ໂດຍເລີ່ມແຕ່ເດືອນຕຸລາ ເຊິ່ງການຕັດສິນໃຈດັ່ງກ່າວມີຂຶ້ນຫຼັງຈາກທີ່ ລີເບຍ ຫຼຸດກຳລັງການຜະລິດລົງ ຈາກບັນຫາພາຍໃນປະເທດ.
ນອກຈາກນີ້, ຕະຫຼາດຍັງກັງວົນຕົວເລກເສດຖະກິດຂອງຈີນ ທີ່ອາດກະທົບຕໍ່ຄວາມຕ້ອງການນໍ້າມັນດິບ ຫຼັງດັດຊະນີການຜະລິດເດືອນສິງຫາ ຫຼຸດລົງຕໍ່າສຸດໃນຮອບ 6 ເດືອນ.
