ທ່ານ ເຊີຣີຟ ເອລ – ເຊີຣບີນີ ລັດຖະມົນຕີ ກະຊວງການເຄຫະ ຂອງ ເອຢິບ ໄດ້ເຂົ້າຮ່ວມໃນພິທີວາງສີລາລືກໂຄງການອຸດສາຫະກຳສີຂຽວແຫ່ງທຳອິດ ຂອງເອຢິບ ເຊິ່ງຕັ້ງຢູ່ໃນເຂດອຸດສາຫະກຳຂອງເມືອງນີວອາລາເມນ ແຄມທະເລ ເມດີເຕເຣນຽນ ໂດຍມີພື້ນທີ່ຫຼາຍກວ່າ 400.000 ຕາລາງແມັດ ແລະ ມີການລົງທຶນ ລວມມີ 1,2 ຕື້ປອນເອຢິບ.
ບົດລາຍງານລະບຸວ່າ: ໂຄງການໄລຍະທຳອິດ ປະກອບດ້ວຍການສ້າງໂຮງງານຫຼັກ 3 ແຫ່ງ ແລະ ສິ່ງອຳນວຍຄວາມສະດວກໃນການສະໜັບສະໜູນເພີ່ມຕື່ມ ໂດຍການຜະລິດຈະເລີ່ມຂຶ້ນໃນໄຕມາດ 2 ( ເດືອນເມສາ – ເດືອນມິຖຸນາ ) ຂອງປີ 2025 ແລະ ຈະໃຊ້ສ່ວນປະກອບຫຼັກ 60 – 70% ພາຍໃນປະເທດ.
ໂຄງການອຸດສາຫະກຳສີຂຽວນີ້ ຄາດວ່າຈະສາມາດສ້າງວຽກເຮັດງານທຳ 2.000 ຕຳແໜ່ງ ໂດຍລັດຖະບານເອຢິບ ໄດ້ຕັ້ງເປົ້າໝາຍໃຊ້ໂຄງການເປັນຕົ້ນແບບ ເພື່ອດຶງດູດການລົງທຶນຈາກຕ່າງປະເທດໃນຂົງເຂດອຸດສາຫະກຳທີ່ກ່ຽວຂ້ອງກັບການຜະລິດອຸປະກອນໂລຫະ ແລະ ເພື່ອສືບຕໍ່ພັດທະນາເຕັກໂນໂລຊີໃນເອຢິບ.
