ຕາມຂ່າວຈາກ ຊີອາໄອ ໃຫ້ຮູ້ວ່າ: ທ່ານ ນາງ ເດວມາ ໂຣເຊຟ ຜູ້ວ່າການທະນາຄານພັດທະນາໃໝ່ ປະເທດບຣິກ ໄດ້ຢືນຢັນຢູ່ນະຄອນຫຼວງ ເຄັບທາວ ປະເທດອາຟຣິກາໃຕ້ ເມື່ອບໍ່ດົນມານີ້ວ່າ: ທະນາຄານພັດທະນາໃໝ່ ປະເທດບຣິກ ( BRICS ) ຈະເປີດກວ້າງການລະດົມທຶນດ້ວຍເງິນຕາຂອງປະເທດສະມາຊິກຕົນເອງ ເພື່ອສະໜັບສະໜູນກຸ່ມເສດຖະກິດຈະເລີນໃໝ່ ແລະ ປະເທດພວມພັດທະນາ ໃຫ້ໄດ້ຮັບການພັດທະນາແບບຍືນຍົງ.
ກອງປະຊຸມປະຈໍາປີສະພາມົນຕີ ຄັ້ງທີ 9 ຂອງທະນາຄານພັດທະນາໃໝ່ ປະເທດບຣິກ ພາຍໃຕ້ຫົວຂໍ້ຕົ້ນຕໍວ່າ “ ລົງທຶນຕໍ່ອະນາຄົດ ທີ່ມີຄວາມຍືນຍົງ ”. ທ່ານ ນາງ ເດວມາ ໂຣເຊຟ ໄດ້ກ່າວວ່າ: ການເປີດກວ້າງການລະດົມທຶນດ້ວຍເງິນຕາຂອງປະເທດສະມາຊິກຕົນເອງ ເປັນໜຶ່ງໃນເປົ້າໝາຍທາງດ້ານຍຸດທະສາດຫຼັກ ໃນໄລຍະປີ 2022 – 2026 ຂອງທະນາຄານພັດທະນາໃໝ່ ປະເທດບຣິກ.
ທະນາຄານດັ່ງກ່າວ ພວມສ້າງເວທີລະດົມທຶນດ້ວຍເງິນຕາຂອງປະເທດສະມາຊິກຕົນເອງ ທີ່ຖືເອົາການພັດທະນາແບບຍືນຍົງ ເປັນທິດທາງ ແລະ ຍັງມີເປົ້າໝາຍ ຈະຍົກສູງອັດຕາສ່ວນການລະດົມທຶນດ້ວຍເງິນຕາຂອງປະເທດສະມາຊິກຕົນເອງ ໃຫ້ຂຶ້ນເປັນ 30%.
ທະນາຄານພັດທະນາໃໝ່ ປະເທດບຣິກ ເປັນທະນາຄານພັດທະນາຂອບຫຼາຍຝ່າຍ ທີ່ຮ່ວມກັນສ້າງຂຶ້ນໂດຍ ສປ ຈີນ, ເບຣຊິນ, ຣັດເຊຍ, ອິນເດຍ ແລະ ອາຟຣິກາໃຕ້ ເມື່ອປີ 2015, ມີສໍານັກງານໃຫຍ່ຕັ້ງຢູ່ນະຄອນຊຽງໄຮ້ ຂອງ ສປ ຈີນ.
