ໃນວັນທີ 27 ສິງຫາ 2024 ທີ່ ເມືອງນາກາຍ ແຂວງຄຳມ່ວນ, ໂດຍເປັນການຮ່ວມມືກັນລະຫວ່າງ ອຳນາດການປົກຄອງແຂວງຄຳມ່ວນ ແລະ ບໍລິສັດ ໄຟຟ້າ ນ້ຳເທີນ 2 ໄດ້ຈັດ ກອງປະຊຸມຄະນະຊີ້ນໍາກອງທຶນພັດທະນານໍ້າເທີນ 2 ຄັ້ງທີ 8 ຂຶ້ນ. ສາລະສຳຄັນຂອງກອງປະຊຸມແມ່ນການຕິດຕາມຄວາມຄືບໜ້າວຽກງານຂອງ ກອງທຶນພັດທະນານໍ້າເທີນ 2 ໃນໄລຍະ 6 ເດືອນທີ່ຜ່ານມາ ໂດຍສະເພາະແມ່ນໝາກຜົນຂອງບັນດາວຽກງານສຳຄັນເຊັ່ນ: ໂຄງການທຶນການສຶກສາໄລຍະຍາວ, ໂຄງການເຄືອຄ່າຍສະຫວັດດີການສັງຄົມ ແລະ ໂຄງການກອງທຶນຢາປ້ອງກັນພະຍາດສັດລ້ຽງໃນເຂດ 16 ຄຸ້ມບ້ານ.
ກອງປະຊຸມຄັ້ງນີ້ ໂດຍການເປັນປະທານຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະ ທ່ານ ມາກ-ອອງຕວນ ຣຸບ ຜູ້ອໍານວຍການໃຫຍ່ ບໍລິສັດ ໄຟຟ້າ ນໍ້າເທີນ 2, ພ້ອມມີທ່ານຮອງເຈົ້າເມືອງນາກາຍ, ບັນດາທ່ານຄະນະກໍາມະການກອງທຶນພັດທະນານໍ້າເທີນ 2, ທີມງານ ນ້ຳເທີນ 2 ແລະ ພາກສ່ວນກ່ຽວຂ້ອງເຂົ້າຮ່ວມ.
ເປົ້າໝາຍເບື້ອງຕົ້ນຂອງ ກອງທຶນພັດທະນານໍ້າເທີນ 2 ແມ່ນການປັບປຸງຄຸນນະພາບຊີວິດຂອງ 16 ໝູ່ບ້ານທີ່ສ້າງຂື້ນໃໝ່ໃນເມືອງນາກາຍ. ເມື່ອໂຄງການ ນ້ຳເທີນ 2 ກ້າວເຂົ້າສູ່ໄລຍະການຜະລິດ, ກອງທຶນພັດທະນານໍ້າເທີນ 2 ຈຶ່ງກ້າວເຂົ້າສູ່ໄລຍະທີ 2. ໄລຍະຕໍ່ໄປນີ້ຈະເນັ້ນໜັກໃສ່ການພັດທະນາຄຸນນະພາບຊີວິດການເປັນຢູ່ ໂດຍຂະຫຍາຍພື້ນທີ່ອອກໄປນອກ 16 ໝູ່ບ້ານທີ່ສ້າງຂື້ນໃໝ່ນີ້ ຈົນໄປເຖິງເຂດເມືອງນາກາຍທັງໝົດ ແລະ ຂະຫຍາຍໄປຮອດເຂດເມືອງຍົມມະລາດ ແລະ ເມືອງມະຫາໄຊ ໃນໄລຍະຖັດໄປ. ພ້ອມກັນນັ້ນ ໃນໄລຍະທີ 2 ແມ່ນມີເປົ້າໝາຍເພື່ອໃຫ້ເປັນຮູບປະທຳຫຼາຍຂື້ນຕື່ມ.
ທ່ານ ມາກ-ອອງຕວນ ຣຸບ ຈະສະໜັບສະໜູນຢ່າງເຕັມທີ່ຕໍ່ຄວາມຮ່ວມມືຢ່າງຕໍ່ເນື່ອງ ແລະ ການມີສ່ວນຮ່ວມຢ່າງແຂງຂັນ ໂດຍກ່າວວ່າ “ເຮົາຕ້ອງເຮັດວຽກຮ່ວມກັນຢ່າງຕໍ່ເນື່ອງໃນຖານະມີຄວາມພະຍາຍາມຮ່ວມກັນ ເຮົາທຸກຄົນມີບົດບາດສຳຄັນໃນການປ່ຽນແຜນໃຫ້ເປັນການລົງມື ແລະ ເຮັດໃຫ້ການພັດທະນາເຂດຂອງເຮົາກາຍເປັນຈິງ ຂໍໃຫ້ພວກເຮົາສາມັກຄີກັນໃນການພະຍາຍາມສ້າງອະນາຄົດທີ່ສົດໃສສຳລັບເມືອງນາກາຍ ແລະ ບ່ອນອື່ນໆອີກ.”
“ບໍລິສັດ ໄຟຟ້າ ນ້ຳເທີນ 2 ຍັງຄົງມຸ່ງໝັ້ນຕໍ່ການພັດທະນາແບບຍືນຍົງ, ການປົກປັກຮັກສາສິ່ງແວດລ້ອມ ຈົນໄປເຖິງການເສີມສ້າງຄວາມສາມາດຂອງຊຸມຊົນ. ໃນຂະນະທີພວກເຮົາພວມເລີ່ມຕົ້ນບົດໃໝ່ຂອງ ກອງທຶນພັດທະນານໍ້າເທີນ 2, ພວກເຮົາມຸ່ງຫວັງທີ່ຈະຕຽມພ້ອມສຳລັບອະນາຄົດທີ່ໜ້າຕື່ນເຕັ້ນຮ່ວມກັນ.”
ໂອກາດດັ່ງກ່າວ ທີ່ຫ້ອງການກອງທຶນພັດທະນານໍ້າເທີນ 2 ທາງຄະນະກອງທຶນພັດທະນານໍ້າເທີນ 2 ຍັງໄດ້ມອບອຸປະກອນ ຢາປ້ອງກັນ ແລະ ປິ່ນປົວສັດລ້ຽງ ມູນຄ່າ 171 ລ້ານກວ່າກີບ ໃຫ້ແກ່ຫ້ອງການກະສິກໍາ ແລະ ປ່າໄມ້ເມືອງ ໃນນາມຜູ້ຈັດຕັ້ງປະຕິບັດໂຄງການ.
ກອງທຶນພັດທະນານໍ້າເທີນ 2 ເປັນຄວາມມຸ່ງໝັ້ນທີ່ຈະສະໜັບສະໜູນຊຸມຊົນໂດຍການເສີມສ້າງທ່າແຮງ ແລະ ຂີດຄວາມສາມາດແກ່ສະຖາບັນຕ່າງໆ. ກອງທຶນນີ້ຖືກຈັດຕັ້ງຂື້ນຕາມຂໍ້ຕົກລົງຄວາມຮ່ວມມື ກອງທຶນພັດທະນານໍ້າເທີນ 2 ເຊິ່ງລົມນາມກັນລະຫວ່າງ ແຂວງຄຳມ່ວນ ແລະ ນ້ຳເທີນ 2 ໃນເດືອນມິຖຸນາ ປີ 2018, ໂດຍການສະໜັບສະໜູນທຶນໃຫ້ແກ່ໂຄງການຕ່າງໆທີ່ຕັ້ງໜ້າພັດທະນາເສດຖະກິດ-ສັງຄົມແບບຍືນຍົງແກ່ຊຸມຊົນທ້ອງຖິ່ນທີ່ຢູ່ໃນເຂດໂຄງການນ້ຳເທີນ 2 ກໍ່ຄືໃນແຂວງຄຳມ່ວນ. ເງິນທຶນທີ່ຈັດສັນໃຫ້ແກ່ ກອງທຶນພັດທະນານໍ້າເທີນ 2ແມ່ນຖືກຄິດໄລ່ຕາມປະລິມານພະລັງງານທີຜະລິດໄດ້ປະຈຳປີຈາກ ນ້ຳເທີນ 2 ຫຼື ເທົ່າກັບ 1000 ກີບຕໍ່ເມກາວັດໂມງ. ນ້ຳເທີນ 2 ໄດ້ຈັດສັນເປັນເງິນທຶນລວມໄປແລ້ວ30.111.453.478 ກີບ ແກ່ກອງທຶນພັດທະນານໍ້າເທີນ 2 ຕັ້ງແຕ່ປີ 2018 ຈົນເຖິງ 2023.
ບໍລິສັດ ໄຟຟ້າ ນ້ຳເທີນ 2 ຖືກສ້າງຕັ້ງຂື້ນໂດຍ ລັດຖະບານລາວ ແລະ ບັນດາຜູ້ຖືຮຸ້ນເອກະຊົນ ໃນນາມ ໂຄງການ ໄຟຟ້ານ້ຳຕົກ ນ້ຳເທີນ 2 ເພື່ອກໍ່ສ້າງ ແລະ ດຳເນີນງານໂຄງການເປັນໄລຍະເວລາ 25 ປີ. ນ້ຳເທີນ 2 ມຸ່ງໝັ້ນໃນການເປັນໂຄງການຜະລິດໄຟຟ້ານ້ຳຕົກລະດັບໂລກ ພ້ອມທັງປັບປຸງຊີວິດການເປັນຢູ່ຂອງປະຊາຊົນທີ່ອາໄສຢູ່ໃນເຂດໂຄງການ. ພາລະກິດຂອງພວກເຮົາແມ່ນ ການຜະລິດພະລັງງານໄຟຟ້າທ່ີສາມາດໄວ້ວາງໃຈໄດ້ ແລະ ໃນຮູບແບບທ່ີຍືນຍົງ, ປະກອບສ່ວນຕໍ່ການພັດທະນາຂອງ ສປປ ລາວ ແລະ ສ້າງບົດຮຽນທ່ີເປັນບ່ອນອີງໃຫ້ແກ່ອຸດສາຫະກຳພະລັງງານໄຟຟ້ານ້ຳຕົກ.
