ຖືວ່າເປັນການແຂ່ງຂັນບານເຕະຍິງລະດັບອາຊຽນຄັ້ງທໍາອິດ ໃນຮອບຫຼາຍປີເມື່ອຫຼ້າສຸດ ທາງສະຫະພັນບານເຕະອາຊຽນ ໄດ້ມີການເປີດເຜີຍຈັດການແຂ່ງຂັນບານເຕະຍິງຊີງແຊັມອາຊຽນ 2025 ໂດຍຮອບຄັດເລືອກຈະມອບໝາຍໃຫ້ ສປປ ລາວ ເປັນເຈົ້າພາບ ມີ 6 ທີມເຂົ້າຮ່ວມຊີງໄຊ ເພື່ອຄັດເອົາ 4 ທີມທີ່ດີທີ່ສຸດຜ່ານເຂົ້າຮອບສຸດທ້າຍໄປສົມທົບກັບອີກ 4 ຊາດທີ່ຢືນລໍຖ້າໃນຮອບສຸດທ້າຍ.
ຫຼ້າສຸດທາງ ASEAN FOOTBALL ເພຈ໌ລາຍງານຄວາມເຄື່ອນໄຫວຂອງບານເຕະອາຊຽນ ແລະ ອາຊີ ໄດ້ລາຍງານວ່າ: ການແຂ່ງຂັນຍິງແຊັມອາຊຽນ 2025 ຮອບຄັດເລືອກ ຈະເລີ່ມຂຶ້ນຢ່າງເປັນທາງການລະຫວ່າງວັນທີ 5-16 ພະຈິກ 2024 ໂດຍ ສປປ ລາວ ເປັນເຈົ້າພາບ ເຊິ່ງມີ 6 ທີມຄື: ສິງກະໂປ, ມາເລເຊຍ, ອິນໂດເນເຊຍ, ກໍາປູເຈຍ, ຕີມໍ-ເລສເຕ ແລະ ສປປ ລາວ ເພື່ອຄັດ 4 ທີມທີ່ດີທີ່ສຸດຈາກຮອບຄັດເລືອກ ຜ່ານເຂົ້າຮອບສຸດທ້າຍໄປສົມທົບກັບອີກ 4 ທີມທີ່ຢືນລໍຖ້າໃນຮອບສຸດທ້າຍ.
ສໍາລັບ 4 ທີມທີ່ໄດ້ສິດໄປຢືນລໍຖ້າໃນຮອບສຸດທ້າຍ ແມ່ນຊາດທີ່ມີແຣງກິງສູງສຸດໃນອາຊຽນ ປະກອບມີ: ຫວຽດນາມ, ມຽນມາ, ຟິລິບປິນ ແລະ ໄທ.
