ສປປ ລາວ ກຽມເປັນເຈົ້າພາບ ຈັດການແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024 ຫຼື WTT youth contender 2024 ເປັນປີທີ 2 ຕິດຕໍ່ກັນ ເຊິ່ງປີນີ້ຈັດການແຂ່ງຂັນລະຫວ່າງວັນທີ 18-21 ກັນຍາ 2024 ທີ່ສູນການຄ້າ ລາວ-ໄອເຕັກ ໃນນະຄອນຫຼວງວຽງຈັນ ສປປ ລາວ.
ພິທີຖະແຫຼງຂ່າວກຽມຄວາມພ້ອມຈັດງານດັ່ງກ່າວຈັດຂຶ້ນທີ່ໂຮງແຮມແລນມາກ ໃນຕອນແລງຂອງວັນທີ 3 ກັນຍາ 2024 ໃຫ້ກຽດເຂົ້າຮ່ວມໂດຍທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ, ປະທານຄະນະກຳມະການໂອແລມປິກແຫ່ງຊາດລາວ ທີ່ເຄົາລົບ ແລະ ນັບຖື, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະກິລາ, ຮອງປະທານ ຄະນະກຳມະການໂອແລມປິກແຫ່ງຊາດລາວ, ປະທານ ຮ່ວມຄະນະກຳມະການຈັດງານແຂ່ງຂັນກີລາປິ່ງປ່ອງຊາວໜຸ່ມເຍົາວະຊົນໂລກ 2024, ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ, ປະທານ ຄະນະກຳມະການຈັດງານແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ 2024 ແລະ ທ່ານ ປ້າວຽງເງິນ ໄຂຄຳພິທູນ ຄະນະປະທານທີ່ປິກສາ ງານແຂ່ງຂັນກິລາປິ່ງປ່ອງ ຊາວໜຸ່ມ ເຍົາວະຊົນໂລກ 2024 ພ້ອມດ້ວຍຕາງໜ້າຜູ້ສະໜັບສະໜູນຫຼາຍພາກສ່ວນ, ຄູຝຶກ ແລະ ນັກກີລາ ຕະຫຼອດຮອດສື່ມວນຊົນເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ນາງ ອໍລະໄທ ສັນຕິຄົງຄາ ຮອງປະທານ ສະຫະພັນປິ່ງປ່ອງແຫ່ງຊາດລາວ ຂໍອະນຸຍາດລາຍງານຄວາມພ້ອມວ່າ: ທ່າມກາງບັນຍາກາດປະເທດລາວເປັນເຈົ້າພາບຈັດກອງປະຊຸມຂັ້ນສຸດຍອດອາຊຽນ ປີ 2024 ແລະທັງເປັນປີທ່ອງທ່ຽວລາວ ເວົ້າລວມ ເວົ້າສະເພາະ ສະຫະພັນກິລາປິ່ງປ່ອງແຫ່ງຊາດລາວ ໄດ້ຮັບກຽດເປັນເຈົ້າພາບຈັດງານແຂ່ງຂັນ ກິລາປ່ງປ່ອງຊາວໜຸ່ມເຍົາວະຊົນໂລກປີ ຕໍ່ເນື່ອງ ປີ 2023 ແລະ ປີ 2024 ມາຮອດປັດຈຸບັນພວກເຮົາມີຄວາມພ້ອມແລ້ວ ໂດຍສະເພາະຄະນະຮັບຜິດຊອບຈັດການແຂ່ງຂັນ ແລະ ກຳມະການຕັດສິນຝ່າຍເຈົ້າພາບ ຈຳນວນ 30 ທ່ານ ແລະ ໄດ້ກະກຽມຝຶກອົບຮົມກຳມະການຕັດສິນ ແລະ ຝ່າຍຈັດການແຂ່ງຂັນ. ນອກນັ້ນ, ຍັງມີຄູຝຶກ ແລະ ນັກກິລາເຈົ້າພາບທັງໝົດ ຈຳນວນ 45 ຄົນ, ອາຍຸຕ່ຳສຸດ 9 ປີ ແລະ ສູງສຸດ 19 ປີ. ໄດ້ກະກຽມຝຶກແອບ ແລະ ແຂ່ງຂັນຢູ່ພາຍໃນປະເທດ ແລະ ຕ່າງປະເທດ ເຊິ່ງຄັ້ງນີ້ມີຄະນະ ແລະ ນັກກີລາຈາກສາກົນເຂົ້າຮ່ວມທັງໝົດ 200 ກວ່າຄົນ, ຈາກ 17 ປະເທດ ມີດັ່ງນີ້ :
– ກຳມະການເຕັກນິກ ແລະ ຈັດການແຂ່ງຂັນ ປະເທດປູຕູເກັດ, ອີລານ, ໂອມານ, ສິງກະໂປ ແລະ ໄທ.
– ຄະນະນຳ, ຄູຝຶກ ແລະ ນັກກິລາຈາກປະເທດຮົງກົງ, ໄຕຫວັນ, ເກົາຫຼີ, ອິນເດຍ, ສິງກະໂປ, ອິນໂດນີເຊຍ,ເມົາດິບ, ໂຄລຸມເບຍ, ອ໋ອດສຕຼາເລຍ, ຫວຽດນາມ, ກຳປູເຈຍ, ມາເລເຊຍ, ໄທ ແລະ ລາວ ເຂົ້າຮ່ວມການແຂ່ງຂັນ
ສ່ວນ ລາຍການແຂ່ງຂັນທັງໝົດມີ 2 ປະເພດ ຄື: ປະເພດດ່ຽວ ແລະ ຄູ່ປະສົມ, 5 ລາຍການດ່ຽວຍິງ ແລະ ດ່ຽວຊາຍ (ອາຍຸບໍ່ເກີນ 11ປີ, 13ປີ, 15ປີ, 17ປີ ແລະ 19 ປີ) ແລະ 2 ລາຍການຄູ່ປະສົມ ລຸ້ນອາຍຸບໍ່ເກີນ 15 ປີ ແລະ 19 ປີ, ລວມທັງໝົດມີ 32 ລາງວັນ.
ຂະນະດຽວກັນ ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ, ປະທານ ຄະນະກຳມະການຈັດງານແຂ່ງຂັນກິລາປິ່ງປ່ອງຊາວໜຸ່ມເຍົາວະຊົນໂລກ 2024 ກ່າວວ່າ: ຂ້າພະເຈົ້າ ໃນນາມປະທານສະຫະພັນກິລາປີ່ງປ່ອງແຫ່ງຊາດລາວ ແລະ ທັງເປັນປະທານຈັດງານແຂ່ງຂັນກິລາປີງປ່ອງເຍົາວະຊົນໂລກໃນປີ 2023 ແລະ 2024 ຂໍສະແດງຄວາມຄວາມຍ້ອງຍໍຊົມເຊີຍ ແລະ ຂໍຂອບໃຈ ເປັນຢ່າງສູງຕໍ່ການນຳພັກ-ລັດກໍ່ຄືການນຳກະຊວງສືກສາທິການ ແລະ ກິລາ ທີ່ໃຫ້ການຕິດຕາມຊີ້ນຳໆພາຢ່າງໄກ້ຊິດຕິດແທດຕະຫຼອດເວລາໃນຊ້ວງກະກຽມ ແລະ ແຂ່ງຂັນ ໃນໄລຍະຜ່ານມາ ພ້ອມທັງປະຈຸບັນ ແລະ ຂໍສະແດງຄວາມຂອບໃຈຢ່າງສູງຕໍ່ຜູ້ໃຫ້ການສະໜັບສະໜູນ ແລະ ທຸກພາກສ່ວນທີ່ມີສ່ວນຮ່ວມ ໃນການເປັນເຈົ້າພາບຈັດງານໃນໄລຍະຜ່ານມາ ແລະ ໃນປະຈຸບັນນີ້ດ້ວຍ ທີ່ມີຄວາມຕັດສິນໃຈສູງ, ເສຍສະຫຼະເຫື່ອແຮງ ສະຕິປັນຍາ ເພື່ອສືບຕໍ່ເຮັດໃຫ້ການກະກຽມເປັນເຈົ້າພາບຈັດງານແຂ່ງຂັນເຍົາວະຊົນໂລກ ຄັ້ງນີ້ ໃຫ້ໄດ້ຮັບຜົນສຳເລັດຢ່າງຈົບງາມຕາມທີໄດ້ວາງໄວ້ເໝືອນດັ່ງປີ 2023 ທີ່ປີນັ້ນພວກເຮົາສາມາດສ້າງຜົນງານອັນເປັນປະຫວັດສາດອັນໃໝ່ຂອງວົງການປີ່ງປ່ອງລາວທີ່ສາມາດຍາດໄດ້ຮອງແຊ້ມຊາຍດ່ຽວຮຸ່ນອາຍຸບໍ່ເກີີນ 11ປີ, ຮອງແຊ້ມ ຍິງດ່ຽວ ຮຸ່ນອາຍຸບໍ່ເກີນ 11 ປີ ແລະ ອັນດັບທີສາມຮ່ວມຊາຍດ່ຽວທັງສອງຄົນໃນຮຸ່ນອາຍຸບໍ່ເກີນ 11 ປີ ໃນການເຂົ້າຮ່ວມການແຂ່ງຂັນກິລາປີງປ່ອງລາຍການ WTT Youth Contender 2023 ທີ່ ສປປ ລາວ ເຮົາໄດ້ຮັບກຽດເປັນເຈົ້າພາບ ໃນວັນທີ 20-23 ກັນຍາ 2023 ຂໍຊົມເຊີຍ ແລະ ຂອບໃຈທຸກໆທ່ານທີ່ເຮັດໜ້າທີ່ອັນສໍາຕ່າງໜ້າໃຫ້ສະຫະພັນປີ່ງປ່ອງແຫ່ງຊາດລາວຈົນໄດ້ຮັບຜົນສຳເລັດອັນຈົບງາມ.
ທ້າຍພິທີຍັງໄດ້ມີພິທີມອບຮັບເງິນສະໜັບສະໜູນຈາກຫຼາຍພາກພາກສ່ວນ ໃຫ້ກຽດຮັບໂດຍທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກີລາ ( ລາຍລະອຽດເບິ່ງຕາມຮູບ )
ຂ່າວ-ຮູບຈາກ: Larh Creators
