ມູນຄ່າການຄ້າຕ່າງປະເທດ ໃນໄລຍະ 6 ເດືອນຕົ້ນປີ 2024 ປະຕິບັດໄດ້ 7.754 ລ້ານໂດລາສະຫະລັດ; ໃນນີ້ ການສົ່ງອອກຫຼຸດລົງຫຼາຍເຖິງ 13,5% ສ່ວນການນໍາເຂົ້າ ເພີ່ມຂຶ້ນ 19%, ສິນຄ້າສົ່ງອອກຫຼາຍອັນດັບ 1 ແມ່ນເກືອກາລີ ຮອງມາແມ່ນຄຳປະສົມ.
ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ລາຍງານວ່າ: ມູນຄ່າການນໍາເຂົ້າ ແລະ ສົ່ງອອກສິນຄ້າ ( ບໍ່ລວມໄຟຟ້າ ) ຂອງ ສປປ ລາວ ໃນໄລຍະ 6 ເດືອນ ຕົ້ນປີ 2024 ບັນລຸໄດ້ 7.754 ລ້ານໂດລາສະຫະລັດ ທຽບໃສ່ 6 ເດືອນຕົ້ນປີ 2023 ເພີ່ມຂຶ້ນປະມານ 2,5%. ໃນນີ້, ມູນຄ່າສົ່ງອອກບັນລຸໄດ້ 3.702 ລ້ານໂດລາສະຫະລັດ ຫຼຸດລົງປະມານ 13,5% ແລະ ມູນຄ່ານໍາເຂົ້າບັນລຸໄດ້ 4.052 ລ້ານໂດລາສະຫະລັດ ເພີ່ມຂຶ້ນ 19% ທຽບໃສ່ 6 ເດືອນຕົ້ນປີ 2023.
ສິນຄ້າສົ່ງອອກຫຼັກ 5 ອັນດັບຕົ້ນຕໍ ມີ: ເກືອກາລີ 558 ລ້ານໂດລາສະຫະລັດ, ຄໍາປະສົມ 371 ລ້ານໂດລາສະຫະລັດ, ມັນຕົ້ນ 325 ລ້ານໂດລາສະຫະລັດ, ແຮ່ທອງ 250 ລ້ານໂດລາສະຫະລັດ ແລະ ເຈ້ຍ 222 ລ້ານໂດລາສະຫະລັດ.
ສ່ວນສິນຄ້ານໍາເຂົ້າຫຼັກ ຍັງນໍາໂດຍນ້ຳມັນກາຊວນ 590 ລ້ານໂດລາສະຫະລັດ, ພາຫະນະທາງບົກ 344 ລ້ານໂດລາສະຫະລັດ, ອຸປະກອນກົນຈັກ 314 ລ້ານໂດລາສະຫະລັດ, ເຫຼັກ 210 ລ້ານໂດລາສະຫະລັດ ແລະ ເຄື່ອງໄຟຟ້າ 197 ລ້ານໂດລາສະຫະລັດ.
ປະເທດທີ່ ສປປ ລາວ ສົ່ງອອກຫຼາຍປະກອບມີ: ຈີນ ປະມານ 1.296 ລ້ານໂດລາສະຫະລັດ, ຫວຽດນາມ ປະມານ 929 ລ້ານໂດລາສະຫະລັດ, ໄທ ປະມານ 766 ລ້ານໂດລາສະຫະລັດ, ອົດສະຕຣາລີ ປະມານ 220 ລ້ານໂດລາສະຫະລັດ ແລະ ສ.ອາເມຣິກາ ປະມານ 87 ລ້ານໂດລາສະຫະລັດ.
ສ່ວນການນໍາເຂົ້າ ຈາກໄທ ປະມານ 1.814 ລ້ານໂດລາສະຫະລັດ, ຈີນ ປະມານ 1.494 ລ້ານໂດລາສະຫະລັດ, ຫວຽດນາມ ປະມານ 251 ລ້ານໂດລາສະຫະລັດ, ສ.ອາເມຣິກາ ປະມານ 112 ລ້ານໂດລາສະຫະລັດ ແລະ ຍີ່ປຸ່ນ ປະມານ 68 ລ້ານໂດລາສະຫະລັດ.
