ເຕືອນເຝົ້າລະວັງ! ລະດັບນໍ້າຂອງຢູ່ນະຄອນຫຼວງວຽງຈັນ ເຂົ້າໃກ້ເຂດອັນຕະລາຍແລ້ວ ເວລາ 7:00 ໂມງ 29 ສິງຫາ ວັດແທກໄດ້ 12,11 ແມັດ ( ເຂດອັນຕະລາຍ 12,50 ແມັດ ).
ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍໄດ້ແຈ້ງເຕືອນເຝົ້າລະວັງນໍ້າຖ້ວມຍື່ງ ໃນລະຫວ່າງວັນທີ 29 – 30 ສິງຫາ 2024 ໂດຍບອກວ່າ ຮ່ອງຄວາມກົດດັນອາກາດຕໍ່າ ໄດ້ພາດຜ່ານເຂດພາກເໜືອ ແລະ ພາກກາງຂອງປະເທດລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມ ເຊິ່ງຈະເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ໃນລະດັບຄ່ອຍຫາປານກາງຢູ່ໃນແຕ່ລະພາກ ແລະ ຈະຕົກໜັກຢູ່ບາງທ້ອງຖິ່ນ, ພ້ອມມີລົມພັດແຮງເປັນບາງໂອກາດ.
ເນື່ອງຈາກມີຝົນຕົກໃນລະດັບປານກາງ ຫາ ໜັກ ຕິດຕໍ່ກັນຫຼາຍວັນຜ່ານມາ ໄດ້ເຮັດໃຫ້ລະດັບນໍ້າຢູ່ບັນດາສະຖານີຕາມລໍານໍ້າຂອງໃນຂອບເຂດນະຄອນຫຼວງວຽງຈັນ ( ນວ ) ເພີ່ມຂຶ້ນສູງ. ໂດຍສະເພາະສະຖານີວຽງຈັນ ກິໂລແມັດ 4 ເມືອງສີສັດຕະນາກ ນະຄອນຫຼວງວຽງຈັນ ໄດ້ຂຶ້ນກາຍລະດັບເຕືອນໄພເຊິ່ງເວລາ 7:00 ໂມງ ຂອງວັນທີ 29 ສິງຫາ 2024 ແທັກໄດ້ 12,11 ແມັດ (ລະດັບເຕືອນໄພ, ລະດັບອັນຕະລາຍ 12,50 ແມັດ).
ດັ່ງນັ້ນ, ຈຶ່ງແຈ້ງເຕືອນເຖິງພໍ່ແມ່ປະຊາຊົນບັນດາເຜົ່າ ແລະ ອຳນາດການປົກຄອງທ້ອງຖິ່ນທຸກພາກສ່ວນ ທີ່ອາໄສຢູ່ຕາມແຄມແມ່ນໍ້າຂອງ ໃນນະຄອນຫຼວງວຽງຈັນ ໂດຍສະເພາະເຂດພື້ນທີ່ຕໍ່າໃນຂອບເຂດເມືອງສີໂຄດຕະບອງ ເປັນຕົ້ນ ເຂດບ້ານໜອງດາ; ເມືອງສີສັດຕະນາກ; ເມືອງຫາດຊາຍຟອງ ເຂດບ້ານຫ້ອມ ເຊິ່ງເປັນເຂດທີ່ມີຊາຍແດນລຽບຕາມແຄມແມ່ນໍ້າຂອງ ຈົ່ງມີສະຕິເຝົ້າລະວັງນໍ້າຖ້ວມ ແລະ ສະພາບຝົນຍັງຈະສືບຕໍ່ຕົກຕື່ມອີກ ໃນໄລຍະວັນທີ 28 – 30 ສິງຫາ 2024, ໃຫ້ກຽມພ້ອມຮັບມືຕໍ່ສະພາບນໍ້າຖ້ວມຍື່ງ ທີ່ອາດຈະເກີດຂຶ້ນ, ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ. ຂໍໃຫ້ຕິດຕາມຂ່າວພະຍາກອນອາກາດ ແລະ ລະດັບນໍ້າຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.
