ທະນາຄານ ແຫ່ງ ສປປ ລາວ ( ທຫລ ) ເປີດທົດລອງນຳໃຊ້ລະບົບຕະຫຼາດແລກປ່ຽນເງິນຕາຕ່າງປະເທດ ແບບອອນລາຍ ຜ່ານແອັບທະນາຄານເທິງມືຖື ( Lao Foreign Exchange ຫຼື LFX ) ເພື່ອໃຫ້ບຸກຄົນທົ່ວໄປ ສາມາດເຂົ້າເຖິງການຊື້ – ຂາຍ, ແລກປ່ຽນເງິນຕາໄດ້ຢ່າງສະດວກສະບາຍ, ວ່ອງໄວ, ໂປ່ງໃສ ແລະ ບໍ່ມີ ຄວາມສ່ຽງ ເຊິ່ງສາມາດຊື້ – ຂາຍ, ແລກປ່ຽນເງິນຕາຕ່າງປະເທດໄດ້ 3 ສະກຸນ ຄື: ໂດລາສະຫະລັດ, ບາດ ແລະ ຢວນ.
ພິທີມີຂຶ້ນໃນວັນທີ 22 ສິງຫາ 2024 ໂດຍມີ ທ່ານ ສຸລິສັກ ທຳນຸວົງ ຮອງຜູ້ວ່າການທະນາຄານ ແຫ່ງ ສປປ ລາວ, ພ້ອມດ້ວຍປະທານສະມາຄົມທະນາຄານລາວ, ຄະນະກົມກ່ຽວຂ້ອງຂອງ ທຫລ, ຜູ້ຕາງໜ້າຈາກທະນາຄານທຸລະກິດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ພຸດດາວັນ ສິຣິສົມບັດ ຮອງຫົວໜ້າກົມນະໂຍບາຍເງິນຕາ ທະນາຄານ ແຫ່ງ ສປປ ລາວ ໄດ້ໃຫ້ຮູ້ວ່າ: ຕະຫຼາດແລກປ່ຽນເງິນຕາຕ່າງປະເທດ ( Lao Foreign Exchange ຫຼື LFX ) ແມ່ນສູນກາງໃນການແລກປ່ຽນຊື້ – ຂາຍເງິນຕາຕ່າງປະເທດ ທີ່ລວມສູນໃນລະບົບທະນາຄານ, ສ້າງຕັ້ງຂຶ້ນ ໂດຍການຮ່ວມມືກັນລະຫວ່າງ ທະນາຄານ ແຫ່ງ ສປປ ລາວ, ສະມາຄົມທະນາຄານລາວ ແລະ ທະນາຄານທຸລະກິດທັງໝົດ 15 ທະນາຄານ. ປັດຈຸບັນລະບົບດັ່ງກ່າວມີຄວາມພ້ອມເປີດໃຫ້ບໍລິການແກ່ມວນຊົນເຂົ້າມາດໍາເນີນທຸລະກຳແລກປ່ຽນເງິນຕາຕ່າງປະເທດ ນັບແຕ່ວັນທີ 22 ສິງຫາ 2024 ເປັນຕົ້ນໄປ ໂດຍຜ່ານແອັບພລິເຄຊັນ LFX ຂອງທະນາຄານທຸລະກິດຈໍານວນໜຶ່ງ ທີ່ສາມາດໃຫ້ບໍລິການ ເປັນຕົ້ນ ທະນາຄານການຄ້າຕ່າງປະເທດລາວ ມະຫາຊົນ, ທະນາຄານສົ່ງເສີມກະສິກຳ ແລະ ທະນາຄານເອັສທີ.
ພ້ອມນີ້, ຍັງຈະຂະຫຍາຍໄປບັນດາທະນາຄານທຸລະກິດແຫ່ງອື່ນໆ ທີ່ໄດ້ເຂົ້າຮ່ວມໃຫ້ບໍລິການຜ່ານລະບົບດັ່ງກ່າວ ເຊິ່ງບັນດາທະນາຄານເຫຼົ່ານັ້ນ ພວມສຸມໃສ່ປັບປຸງລະບົບພາຍໃນໃຫ້ສາມາດເຊື່ອມຕໍ່ກັບລະບົບແລກປ່ຽນເງິນຕາດັ່ງກ່າວໃນໄວໆນີ້.
ຄຽງຄູ່ກັນນີ້, ໃນການສ້າງຕັ້ງຕະຫຼາດແລກປ່ຽນເງິນຕາ ຍັງຕ້ອງໄດ້ກະກຽມຄວາມພ້ອມດ້ານອື່ນໆ ເພື່ອສ້າງຕັ້ງເປັນນິຕິບຸກຄົນ ກໍຄືສ້າງຕັ້ງບໍລິສັດທີ່ຈະບໍລິຫານຕະຫຼາດແລກປ່ຽນເງິນຕາຕ່າງປະເທດນີ້ໃຫ້ຖືກຕ້ອງ ແລະ ສອດຄ່ອງກັບກົດໝາຍ ຂອງ ສປປ ລາວ ເຊິ່ງຄາດວ່າຈະໃຫ້ສໍາເລັດ ແລະ ໄດ້ເປີດເປັນທາງການໃນຕົ້ນເດືອນຕຸລາ 2024 ນີ້.
ໃນໄລຍະທຳອິດ ແມ່ນເປີດໃຫ້ບໍລິການ ແຕ່ວັນຈັນ – ວັນສຸກ ເວລາ 9:00 – 14:00 ໂມງ, ສາມາດຊື້ – ຂາຍເງິນຕາຕ່າງປະເທດ ໄດ້ 3 ສະກຸນ ຄື: ໂດລາສະຫະລັດ, ບາດ ແລະ ຢວນ.
