ຖືວ່າເປັນຂ່າວດີສໍາລັບ ທີມຊາດລາວ ໄດ້ຄູຝຶກຊາວ ສ ເກົາຫຼີ ມາເພີ່ມອີກ 1 ຄົນ ເຊິ່ງກ່ອນໜ້ານີ້ໃນເດືອນສິງຫາທີ່ຜ່ານມາ ສະຫະພັນບານເຕະແຫ່ງຊາດລາວ ( ສຕລ ) ໄດ້ແຕ່ງຕັ້ງ ທ່ານ ຮາ ຮອກ ຈູນ (HA HYEOKJUN) ໄວ 54 ປີ ສັນຊາດ ສ. ເກົາຫລີ ຮັບໜ້າທີ່ເປັນ ຄູຝຶກ ທີມຊາດລາວ ຄົນໃໝ່ ຄຸມທີມຊາດລາວ ຊຸດໃຫຍ່ ແລະ ທີມຊາດລາວ ຮຸ່ນອາຍຸບໍ່ເກີນ 23 ປີ ເພື່ອກຽມທີມຊາດລາວ ຊຸດໃຫຍ່ ເຂົ້າຮ່ວມການແຂ່ງຂັນ ASEAN Mitsubishi Electric Cup 2024 ແລະ ການແຂ່ງຂັນ AFC Asian Cup 2027 ຮອບຄັດເລືອກ ຮອບ 2.
ຫຼ້າສຸດເມື່ອວັນທີ 2 ກັນຍາ 2024 ສະຫະພັນບານເຕະແຫ່ງຊາດລາວ ໄດ້ປະກາດແຕ່ງຕັ້ງ ທ່ານ ຈອງ ເຈ ຄວອນ(Jung Jae-kwon) ເປັນຫົວໜ້າຄູຝຶກ ທີມຊາດລາວ ຮຸ່ນອາຍຸບໍ່ເກີນ 20 ປີ ເຊິ່ງຈະຄຸມສະເພາະ ທີມຊາດລາວ ຢູ 20 ເຂົ້າຮ່ວມແຂ່ງຂັນລາຍການແຂ່ງຂັນບານເຕະ ຊີງແຊັມອາຊີ U20 ຮອບຄັດເລືອກ 2025 ຈັດຂຶ້ນລະຫວ່າງວັນທີ 25-29 ກັນຍາ 2024 ( AFC U20 ASIAN CUP 2025 Qualifiers ).
ສຳລັບປະຫວັດ ຂອງ ທ່ານ ຈອງ ເຈ ຄວອນ ແມ່ນ ເກິດ ວັນທີິ ວັນທີ 5 ພະຈິກ 1970 ເປັນຄົນສັນຊາດ ສ. ເກົາຫຼີ, ອະດີດ ກອງໜ້າ ທີມຊາດ ສ. ເກົາຫຼີ ໂດຍລົງສະໜາມ ທີມຊາດຊຸດໃຫຍ່ ທັງຫມົດ 15 ນັດ ຍິງໄດ້ 3 ປະຕູ ແລະ ທີມຊາດ ສ.ເກົາຫລີ U23 ລົງສະຫນາມ 10 ນັດ ຍິງໄດ້ 3 ປະຕູ, ສ່ວນຜົນງານລະດັບສະໂມສອນ ມີຄື:
– ປີ 1993 ຫລິ້ນໃຫ້ກັບ ສະໂມສອນ Industrial Bank of Korea
– ປີ 1994-1999 ຫລິ້ນໃຫ້ກັບ ສະໂມສອນ Pusan Daewoo Royals ລົງສະຫນາມ 99 ນັດ ຍິງໄດ້ 20 ປະຕູ
– ປີ 1998 ຫລິ້ນໃຫ້ກັບ ສະໂມສອນ Vitória FC ລົງສະຫນາມ ລົງສະຫນາມ 5 ນັດ ຍິງ ໄດ້ 5 ປະຕູ
– ປີ 2000-2001 ຫລິ້ນໃຫ້ກັບ ສະໂມສອນ Pohang Steelers ລົງສະຫນາມ 17 ນັດ ຍິງໄດ້ 1 ປະຕູ
ຂະນະທີ່ຜົນງານການຄູມທີມມີຄື:
– ປີ 2002 ຄຸມທີມ ສະໂມສອນ Dong-eui University
– ປີ 2003 -2007 ເຮັດວຽກຢູ່ Dongnae Middle School
– ປີ 2008 – ປັດຈຸບັນ ຄູມທີມ ມະຫາວິທະຍາໄລ Hanyang University
ສໍາລັບ ພາລະກິດຫຼັກໃນການມາຄຸມທິມຂອງ ທ່ານ ຈອງ ເຈ ຄວອນ ແມ່ນນຳພາ ທີມຊາດລາວ U20 ເຂົ້າຮ່ວມ ການແຂ່ງຂັນບານເຕະ ຊີງແຊັມອາຊີ U20ຮອບຄັດເລືອກ 2025 ຈັດຂຶ້ນ ວັນທີ 25-29 ກັນຍາ 2024 ( AFC U20 ASIAN CUP 2025 Qualifiers ) ຢູ່ ສປປລາວ ໄດ້ຮັບກຽດເປັນເຈົ້າພາບໃນຮອບຄັດເລືອກ ໂດຍ ທີມຊາດລາວ ຢູ່ ຮ່ວມກຸ່ມ G ປະກອບມີ : ອີຣ່ານ, ມົງໂກລີ, ອິນເດຍ ແລະ ສປປ ລາວ ( ເຈົ້າພາບ ).
ເຊິ່ງຕາຕະລາງ ການແຂ່ງຂັນຂອງ ທີມຊາດລາວ ຮຸ່ນອາຍຸບໍ່ເກີນ 20 ປີທຸກໆນັດຈະແຂ່ງຂັນທີ່ສະໜາມກີລາແຫ່ງຊາດ ຫຼັກ 16 ນະຄອນຫຼວງວຽງຈັນ ສປປ ລາວ ດັ່ງນີ້:
– ວັນທີ 25/09/2024 ເວລາ 19:00 ໂມງ ອີຣານ ພົບ ລາວ
– ວັນທີ 27/09/2024 ເວລາ 19:00 ໂມງ ລາວ ພົບ ມົງໂກລີ
– ວັນທີ 29/09/2024 ເວລາ 19:00 ໂມງ ອິນເດຍ ພົບ ລາວ
