ກາຍເປັນທີ່ໜ້າຈັບຕາສໍາລັບ ສາວ ໂມນີຣາ ພຽງຟ້າ ຢາການິກິ (Monira Yaganegi) ນັກສະແດງຈາກ ສປປ ລາວ ທີ່ມີເຊື້ອສາຍອີຣານ-ຈີນ-ລາວ ມາພ້ອມກັບໃບໜ້າສວຍງາມໜ້າຮັກ ແລະ ຫຸ່ນນາງແບບ ເຊິ່ງປັດຈຸບັນກໍາລັງໄດ້ຮັບຄວາມສົນໃຈຫຼາຍ ເນື່ອງຈາກໄດ້ຮັບບົດບາດເປັນຕົວລະຄອນ ລູກສາວແມ່ເມືອງ ໃນຮູບເງົາຂອງປະເທດໄທຊື່ວ່າ “ ເມືອງລັບແລ ” ທີ່ກໍານົດອອກອາກາດໄປຢ່າງເປັນທາງການເມື່ອວັນທີ 31 ສິງຫາ 2024 ທາງຊ່ອງເວີກພ້ອຍຂອງປະເທດໄທ ອອກອາກາດທຸກວັນເສົາ-ອາທິດ ເວລາ 20:05 ໂມງເປັນຕົ້ນໄປ.
ໂມນີຣາ ເກີດວັນທີ 26 ກັນຍາ 2005 ແຈ້ງເກີດຢ່າງເຕັມຕົວໃນບົດບາດການເປັນນັກສະແດງໃນປີ 2024 ດ້ວຍການເປັນຕົວລະຄອນໃນຮູບເງົາ “ ນໍ້າງາມ ນໍ້າດີ ” ຂອງໂທລະພາບຊ້ອງເວີກພ້ອຍ ປະເທດ ໄທ ກັບລະຄອນ “ ເມືອງລັບແລ ” ໂດຍສະເພາະຮູບເງົາເລື່ອງ ເມືອງລັບແລ ເປັນຜົນງານທໍາອິດຂອງນ້ອງ ໃນການໄປສະແດງທີ່ປະເທດໄທ ເຮັດໃຫ້ທັງຊາວລາວ ແລະ ຊາວໄທ ໄດ້ຮູ້ຈັກກັບ ໂມນີຣາ ຫຼາຍຂຶ້ນ ເພາະນ້ອງໄດ້ຮັບບົດເປັນລູກສາວຂອງແມ່ເມືອງບົວ ທີ່ອ່ອນໂຍນ, ອ່ອນຫວານ ແລະ ຣ່າເຣີງ ກັບຄວາມລັບຂອງຕໍານານເມືອງລັບແລ ເມືອງລຶກລັບໃນເມືອງຫມອກພູເຂົາ, ເມືອງທີ່ມີແຕ່ຜູ້ຍິງ, ເມືອງແຫ່ງຄົນດີ ແລະ ເມືອງແຫ່ງຄໍາ.
ສໍາລັບ ສາເຫດທີ່ ສາວໂມນີຣາ ມີເຊື້ອສາຍອີຣານ-ຈີນ-ລາວ ເນື່ອງຈາກ ພໍ່ເປັນຄົນເຊື້ສາຍອີຣານ-ລາວ ແລະ ແມ່ເປັນຄົນເຊື້ອສາຍ ຈີນ-ລາວ ນາມສະກຸນ ຢາການິກິ ຫຼາຍຄົນເຂົ້າໃຈວ່າເປັນ ຍີ່ປຸ່ນ ແຕ່ຄວາມເປັນຈິງແລ້ວເປັນພາສາເປີເຊຍ, ເຊິ່ງກ່ອນຈະກ້າວມາເປັນນັກແດງນໍາໃນຮູບເງິນເລື່ອງ ເມືອງລັບແລ ໂມນີຣາ ໄດ້ຜ່ານການຄັດເລືອກເປັນນັກສະແດງໃນສັງກັດ Skybox ເຊິ່ງເປັນຄ້າຍທີ່ດູແລສີລະປິນຂອງ ເວີກພ້ອຍ (Workpoint) ຊ່ອງທີ່ມີຊື່ສຽງຂອງປະເທດໄທ ແລະ ໄດ້ໄປສຶກສາຕໍ່ໃນມະຫາວິທະຍາໄລຂອງປະເທດໄທ ( Bangkok University International Faculty of Business English )
ໂມນີຣາ ໃຫ້ສໍາພາດຜ່ານຊ່ອງ ເວີກພ້ອຍ ວ່າ: ຜົນງານກ່ອນໜ້ານີ້ ນ້ອງເຄີຍເປັນນັກສະແດງໃນຊີຣີສ໌ເລື່ອງ ທໍານ້ອງຫົວໃຈ ໄວລຸ້ນປັ້ນຝັນ ທີ່ ສປປ ລາວ ກ່ອນມາເປັນນັກສະແດງ ເມືອງລັບແລ ເປັນຮູບເງົາເລື່ອງທໍາອິດຂອງນ້ອງໃນປະເທດໄທ, ເຊິ່ງການມາຮັບບົດເປັນລູກສາວແມ່ເມືອງ ໃນເມືອງລັບແລ ຂ້ອຍຂ້າງຕ່າງກັບຊີວິດຕົວຈິງກັນຫຼາຍ ເພາະນ້ອງເປັນຄົນຈິງຈັງກັບເລື່ອງຄວາມຮັກ ແລະ ໂມນີຣາ ຈະມີຄວາມຄິດກ່ຽວກັບຄວາມຮັກຄືກັບຕົວລະຄອນ ຜູ້ມາແຊນ ຫຼາຍກວ່າ ແລະ ຮັກນວນສະຫງວນຕົວຫົວບູຣານແດ່.
