ພິທີເປີດການແຂ່ງຂັນເຮືອຊ່ວງ ໃນບຸນຊ່ວງເຮືອປະເພນີ ໂອກາດບຸນຫໍ່ເຂົ້າປະດັບດິນ ປະຈໍາປີ ພສ 2567 ຄສ 2024 ໃນວັນທີ 2 ກັນຍາ 2024 ທີ່ຍຶ່ງນໍ້າຄານ ນະຄອນຫລວງພະບາງ ໂດຍການເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ອາດີດການນຳຂັ້ນສູງ, ພ້ອມດ້ວຍການນຳຂັ້ນແຂວງ, ຂັ້ນນະຄອນ-ເມືອງ, ມວນຊົນທັງພາຍໃນ ແລະ ຕ່າງປະເທດ ເຂົ້າຮ່ວມ.
ທ່ານ ວຽງທອງ ຫັດສະຈັນ ເຈົ້ານະຄອນ ຫລວງພະບາງ ໄດ້ກ່າວວ່າ: ຊາວຫລວງພະບາງ ຈັດບຸນຊ່ວງເຮືອປະເພນີ ໂອກາດບຸນຫໍ່ເຂົ້າປະດັບດິນຂຶ້ນທຸກປີ, ຊຶ່ງປີນີ້ກົງກັບວັນທີ 2 ກັນຍາ 2024 ແຮມ 14 ຄໍ່າເດືອນ 9 ອັນເປັນປາງບຸນໜຶ່ງ ທີ່ໄດ້ສືບທອດກັນມາແຕ່ສັດຕະວັດທີ 19 ໂດຍແມ່ນເຈົ້າມັນທາຕຸຣາດ ກະສັດປົກຄອງອານາຈັກລາວລ້ານຊ້າງ ຫລວງພະບາງ ເປັນຜູ້ລິເລີ່ມ ແລະ ໄດ້ຮັບການສືບທອດມາເຖິງປັດຈຸບັນ ຊຶ່ງເປັນການສະແດງເຖິງ ພາລະກຳລັງ ຄວາມສາມັກຄີ ແລະ ບົດຮຽນ-ປະສົບການ ລະຫວ່າງປະຊາຊົນບັນດາເຜົ່າ. ມີເຮືອຊ່ວງປະເພນີ ຈາກບ້ານຕ່າງໆພາຍໃນນະຄອນ ຫລວງພະບາງ, ຕາງໜ້າຈາກເມືອງອ້ອມຂ້າງ ພິເສດອົງການປົກຄອງແຂວງຫລວງພະບາງ ໄດ້ເປີດກວ້າງໃຫ້ມີສີພາຍ ແລະ ເຮືອຊ່ວງຈາກຕ່າງແຂວງ ເຂົ້າຮ່ວມແຂ່ງຂັນ ລວມທັງໝົດ 25 ລໍາ.
ໂອກາດນີ້, ທ່ານ ວຽງທອງ ຫັດສະຈັນ ໄດ້ຮຽກຮ້ອງໃຫ້ຫົວໜ້າສີພາຍເຮືອຊ່ວງ ແລະ ຄະນະກຳມະການ ພ້ອມກັນປະຕິບັດລະບຽບ ຂອງການແຂ່ງຂັນໃຫ້ເຂັ້ມງວດ ເພື່ອເຮັດໃຫ້ບຸນຊ່ວງເຮືອປີນີ້ ມີບັນຍາກາດເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມ, ຮັບປະກັນໃຫ້ນັກທ່ອງທ່ຽວທີ່ມາທ່ຽວຊົມມີຄວາມປະທັບໃຈ.
ໃນພິທີຢ່າງ ໄດ້ເລີ່ມການແຂ່ງຂັນ ຈາກເຮືອຊ່ວງນາງດຳ ນາງດ່ອນ ອັນເປັນການເປີດພິທີການແຂ່ງຂັນ ຕາມຮີດຄອງປະເພນີ. ສຳລັບການແຂ່ງຂັນຈະປະຕິບັດໃນຮູບແບບ ເສຍສອງຄັ້ງແລ້ວຄັດອອກ ພ້ອມທັງຈັດອັນດັບທີ, ສ່ວນເຮືອທີ່ເສຍຄັ້ງໜຶ່ງ ແມ່ນສາມາດຊີງຂຶ້ນໄປເຖິງຮອບຊີງຊະນະເລີດ, ຊຶ່ງການແຂ່ງຂັນເຮືອຊ່ວງຄັ້ງນີ້ ຈະດຳເນີນໄປເປັນເວາ 1 ວັນຈຶ່ງສຳເລັດ.
