ກົມສົ່ງເສີມການຄ້າ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ(ອຄ)ໄດ້ຈັດກອງ ປະຊຸມ ສໍາມະນາ ຫົວຂໍ້: “ຊ່ອງທາງໃໝ່ໃນການເຂົ້າເຖິງຕະຫຼາດຕ່າງປະເທດຂອງສິນຄ້າລາວ ແລະ ແຜນງານສົ່ງເສີມການສົ່ງອອກສິນຄ້າກະສິກໍາປງຸແຕ່ງລາວ” ໃນວັນທີ 30 ສິງຫາ 2024 ທີ່ໂຮງແຮມ ເລີທາດຫຼວງ ເປັນປະທານຂອງ ທ່ານ ດາລາ ອິນດາວົງ, ຮອງຫົວໜ້າກົມສົ່ງເສີມການຄ້າ ແລະ ຫັດຖະກໍາ, ທ່ານ Ishida Yasushi, ຜູ້ຊ່ວຍວຽກຫົວຫນ້າການຄົ້ນຄວ້າ ແລະ ສົ່ງເສີມນະໂຍບາຍ, ສູນອາຊຽນ-ຍີ່ປຸ່ນ ທີ່ນັບຖື.
ທ່ານ ດາລາ ອິນດາວົງ ກ່າວວ່າ: ກອງປະຊຸມສໍາມະນາ ຫົວຂໍ້: “ຊ່ອງທາງໃໝ່ໃນການເຂົ້າເຖິງຕະຫຼາດຕ່າງປະເທດຂອງສິນຄ້າລາວ ແລະ ແຜນງານສົ່ງເສີມການສົ່ງອອກສິນຄ້າກະສິກໍາປງຸແຕ່ງລາວ” ໃນມື້ນີ້ ຈຸດປະສົງ ເພື່ອສືບຕໍ່ວຽກງານສົ່ງເສີມການຄ້າ, ການສົ່ງອອກສິນຄ້າລາວໄປຕ່າງປະເທດ ໃຫ້ນັບມື້ນັບຫຼາຍຂຶ້ນ ແລະ ເປັນການສືບຕໍ່ວຽກງານການສົ່ງເສີມການຄ້າ ຮ່ວມກັບ ສູນອາຊຽນ-ຍີ່ປຸ່ນ, ພ້ອມດຽວກັນນັ້ນ ເພື່ອເປັນການສືບຕໍ່ຜັນຂະຫຍາຍການຮ່ວມມື ແລະ ຂໍ່ານັບຮັບຕ້ອນວັນສ້າງຕັ້ງສາຍພົວພັນທາງການທູດລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 75 ປີ ໃນປີ 2025;
ທ່າ
ນກ່າວວ່າ: ຊ່ອງທາງໃໝ່ໃນການເຂົ້າເຖິງຕະຫຼາດຕ່າງປະເທດ ໂດຍການຊຸກຍູ້ສົ່ງເສີມການສົ່ງອອກຂອງຜະລິດຕະພັນລາວ ເປັນຊ່ອງທາງໜຶ່ງໄດ້ເປີດໂອກາດໃຫ້ຊາວກະສິກອນ ແລະ ນັກທຸລະກິດລາວໄດ້ເຂົ້າສູ່ຕະຫຼາດພາກພື້ນ ແລະ ສາກົນໃຫ້ເພີ່ມຂຶ້ນ ມີເປົ້າໝາຍຊ່ວຍ ວຽກງານການເພີ່ມມູນຄ່າຜະລິດຕະພັນ ແລະ ສ້າງລາຍຮັບໃຫ້ແກ່ຫົວໜ່ວຍທຸລະກິດໄດ້ຫຼາຍຂຶ້ນ, ເປັນການສືບຕໍ່ ການຈັດຕັ້ງປະຕິບັດວຽກງານ ຮ່ວມກັບສູນອາຊຽນ-ຍີ່ປຸ່ນ ກັບບັນດາປະເທດອາຊຽນ, ໂດຍສະເພາະ ສປປ ລາວ ໂດຍມີເປົ້າໝາຍເພື່ອສ້າງຄວາມເຂັ້ມແຂງໃຫ້ແກ່ SMEs ຂອງລາວ ໃນການປະກອບສ່ວນເພີ່ມປະລິມານການສົ່ງອອກໄປຕະຫຼາດຕ່າງປະເທດ ລວມທັງຕະຫຼາດຍີ່ປຸ່ນ ໃຫ້ນັບມື້ນັບຫຼາຍຂຶ້ນ. ແລກປ່ຽນປະສົບການບົດຮຽນຈາກປະເທດທີ່ປະສົບຜົນສໍາເລັດ ໂດຍສະເພະາແມ່ນວິທະຍາກອນຈາກສູນອາຊຽນ-ຍີ່ປຸ່ນ, ຈາກຕົວແທນຈາກກົມສົ່ງເສີມການຄ້າ ຫວຽດນາມ (VIETRADE), ກົມສົ່ງເສີມການຄ້າລະຫວ່າງປະເທດ ໄທ (DITP) , ກະຊວງເສດຖະກີດ, ການຄ້າ ແລະ ອຸດສາຫະກໍາ ຍີ່ປຸ່ນ ( METI) ເພື່ອນຳບົດຮຽນດັ່ງກ່າວມາໝູນໃຊ້ເຂົ້າໃນການປັບປຸງນະໂຍບາຍ ເພື່ອສົ່ງເສີມ ແລະ ອໍານວຍຄວາມສະດວກໃຫ້ພາກທຸລະກິດຂອງລາວ ສາມາດໄປນໍາໃຊ້ໃຫ້ໄດ້ຮັບຜົນປະໂຫຍດສູງສຸດ ໃນການປະກອບກິດຈະການຂອງຕົນ ແລະ ເຂົ້າໃນວຽກງານພັດທະນາເສດຖະກິດ-ສັງຄົມ ໃຫ້ປະສົບຜົນສຳເລັດ ແລະ ມີປະສິດທິພາບສູງ. ປຶກສາຫາລືກັນເຖິງສິ່ງທ້າທາຍ, ການກຽມຄວາມພ້ອມ ແລະ ກາລະໂອກາດ ຂອງ ສປປ ລາວ ທີ່ມີຄາດໝາຍຫຼຸດພົ້ນອອກຈາກສະຖານະປະເທດດ້ວຍພັດທະນາ ໃນ ປີ 2026. ນໍາສະເໜີແຜນງານສົ່ງເສີມການສົ່ງອອກສິນຄ້າກະສິກໍາປງຸແຕ່ງລາວ ທີ່ໄດ້ຜ່ານການຄົ້ນຄວ້າ ແລະ ຮ່າງຂຶ້ນມາໂດຍຊ່ຽວຊານທີ່ມີປະສົບການ.
ກອງປະຊຸມສໍາມະນາໃນຄັ້ງນີ້ ຈະເປັນອີກບາດກ້າວໜື່ງໃນການ ຊຸກຍູ້ສົ່ງເສີມສິນຄ້າຜະລິດຕະພັນລາວ ເພື່ອສົ່ງອອກຕ່າງປະເທດໃຫ້ນັບມື້ນັບຫຼາຍຂຶ້ນ ແລະ ທັງເປັນການເພີ່ມໂອກາດໃຫ້ທຸລະກິດລາວໄດ້ປະກອບສ່ວນຢ່າງເຕັມທີ່ ເຂົ້າໃນການພັດທະນາຂະແໜງການຕ່າງໆ ເພື່ອກະຕຸ້ນເສດຖະກິດ ໂດຍເປັນການເປີດໂອກາດຕະຫຼາດໃໝ່, ກະຕຸ້ນແນວຄວາມຄິດ, ນະວັດຕະກໍາໃໝ່ ແລະ ສອດຄ່ອງກັບນະໂຍບາຍໃໝ່ ສຸມໃສ່ການຊຸກຍູ້ຄວາມສາມາດຜະລິດ, ການຫັນເປັນອຸດສາຫະກຳທັນສະໄໝ ເພື່ອການສົ່ງອອກທີ່ມີຄວາມຫຼາກຫຼາຍ ແລະ ການຫັ້ນປ່ຽນທາງດ້ານເສດຖະກິດໄປແນວທາງທີ່ດີຂຶ້ນເທື່ອລະກ້າວ.
