ເພື່ອຄົ້ນຄວ້າຫາຊ່ອງທາງແກ້ໄຂບັນຫາຄວາມຫຍຸ້ງຍາກດ້ານເສດຖະກິດມະຫາພາກ ຂອງ ສປປ ລາວ ໂດຍສະເພາະລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂຶ້ນ. ໃນວັນທີ 30 ສິງຫາ 2024, ທີ່ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຄະນະສະເພາະກິດ 83/ນຍ ໄດ້ຈັດກອງປະຊຸມປຶກສາຫາລືຮ່ວມກັບອາດີດການນຳຂັ້ນສູງ ກ່ຽວກັບທິດທາງການແກ້ໄຂບັນຫາລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂຶ້ນ.
ໂດຍການເປັນປະທານຂອງ ທ່ານ ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານ ສະຖາບັນວິທະຍາສາດເສດຖະ ກິດ ແລະ ສັງຄົມແຫ່ງຊາດຫົວໜ້າຄະນະສະເພາະກິດ 83/ນຍ. ໃຫ້ກຽດເຂົ້າຮ່ວມໂດຍ ທ່ານ ບົວສອນ ບຸບຜາວັນ ອະດີດກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ທ່ານ ສົມດີ ດວງດີ ອະດີດກຳມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແລະ ບັນດາທ່ານອະດີດການນຳພັກ-ລັດຂັ້ນສູງທີ່ກ່ຽວຂ້ອງຈຳນວນໜຶ່ງ, ມີຄະນະສະເພາະກິດ 83/ນຍ, ແຂກຮັບເຊີນ, ນັກຄົ້ນຄວ້າ, ນັກວິທະຍາສາດ, ຊ່ຽວຊານ ແລະ ພະນັກງານລັດຖະກອນ ເຂົ້າຮ່ວມ.
ຄະນະສະເພາະກິດ 83/ນຍ ທີ່ໄດ້ຮັບການແຕ່ງຕັ້ງຈາກລັດຖະບານ ເພື່ອລົງເລິກຄົ້ນຄວ້າກຳນົດມາດຕະການແກ້ໄຂ ແລະ ດຳເນີນການຄົ້ນຄວ້າ ປະເມີນຜົນການຈັດຕັ້ງປະຕິບັດບັນດາມາດຕະການແກ້ໄຂບັນຫາລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂື້ນ ໄດ້ຮັບການແຕ່ງຕັ້ງ ໃນເດືອນກໍລະກົດ 2024. ຜ່ານມາ, ຄະນະສະເພາະກິດ ໄດ້ຈັດກອງປະຊຸມລະດົມ ຄວາມຄິດເຫັນເພື່ອແກ້ໄຂບັນຫາລາຄາສິນຄ້າ ແລະ ອັດຕາແລກເງິນເຟີ້ທີ່ເພີ່ມສູງຂື້ນໄປແລ້ວ 2 ຄັ້ງ ຄື: ຄັ້ງທີ 1, ໃນວັນທີ 2 ສິງຫາ 2024 ໄດ້ຈັດກອງປະຊຸມກັບພາກທຸລະກິດ ເພື່ອຄົ້ນຄວ້າວິທີການ ແລະ ມາດຕະການໃນການຫຼຸດຜ່ອນຕົ້ນທຶນການຜະລິດສິນຄ້າ ແລະ ການບໍລິການ, ການປະຢັດເງິນຕາຕ່າງປະເທດ ເພື່ອຫຼຸດຜ່ອນແຮງກົດດັນຕໍ່ຄ່າເງິນກີບ ແລະ ຄັ້ງທີ 2, ວັນທີ 19 ສິງຫາ 2024 ໄດ້ຈັດກອງປະຊຸມຮ່ວມກັບອາດີດການນຳຂັ້ນສູງ ແລະ ຊ່ຽວຊານຜູ້ຊົງຄຸນວຸດທິ ບັນດາທ່ານອະດີດລັດຖະມົນຕີ, ຮອງລັດຖະມົນຕີ, ຮອງຜູ້ວ່າການທະນາຄານແຫ່ງ ສປປ ລາວ ເພື່ອແລກປ່ຽນຖອດຖອນບົດຮຽນ ໃນການແກ້ໄຂ ບັນຫາລາຄາສິນຄ້າ ແລະ ອັດຕາເງິນເຟີ້.
ຜ່ານກອງປະຊຸມ ທັງ 2 ຄັ້ງ, ຄະນະສະເພາະກິດ ໄດ້ຮັບຂໍ້ມູນ ຈາກພາກທຸລະກິດ ແລະ ແລກປ່ຽນບົດຮຽນ ປະສົບການ ຈາກ ອະດີດການນຳຂັ້ນສູງ ຂອງພັກ-ລັດ ອັນເປັນປະໂຫຍດສູງ ໃຫ້ແກ່ຄະນະສະເພາະກິດໄດ້ນຳໄປ ຄົ້ນຄວ້າລົງເລິກ ກຳນົດບັນດາມາດຕະການ ແລະ ນະໂຍບາຍ ໃນການແກ້ໄຂບັນຫາ ໃຫ້ສອດຄ່ອງ ກັບສະພາບຄວາມຮຽກຮ້ອງຕ້ອງການຕົວຈິງຂອງສັງຄົມ ແລະ ລາຍງານຕໍ່ບັດຖະບານ ເພື່ອພິຈາລະນາຈັດຕັ້ງຜັນຂະຫຍາຍ.
ກອງປະຊຸມຄັ້ງ ທີ 3 ນີ້, ຈະໄດ້ຮັບຄວາມຄິດເຫັນ ແລະ ປະສົບການຕົວຈິງ ຈາກອະດີດການນຳຂັ້ນສູງ ຂອງພັກ ແລະ ລັດຖະບານ ເປັນຕົ້ນແມ່ນຄຳຄິດເຫັນ ຈາກ ອະດີດນາຍົກ-ຮອງນາຍົກລັດຖະມົນຕີ, ອະດີດການນໍາຂັ້ນສູງ, ນັກວິທະຍາສາດ ແລະ ນັກຄົ້ນຄວ້າ ທີ່ມີປະສົບການສູງ ໃນການແກ້ໄຂບັນຫາເສດຖະກິດ-ການເງິນ, ເຊິ່ງຄະນະສະເພາະກິດ ຈະໄດ້ສືບຕໍ່ ນຳໄປຜັນຂະ ຫຍາຍລົງເລີກຄົ້ນຄວ້າ ກຳນົດບັນດາມາດຕະການໃຫ້ຖືກທິດ, ມີວິທະຍາສາດ ແລະ ແທດເໝາະກັບສະພາບຄວາມເປັນຈິງໃນແຕ່ລະໄລຍະ. ກອງປະຊຸມໄດ້ດຳເນີນໄປ ດ້ວຍບັນຍາກາດອັນຟົດຟື້ນ ແລະ ໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້.
