ຫຼາຍວັນມານີ້ຜູ້ຢູ່ລຽບຕາມແຄມແມ່ນ້ຳຂອງແມ່ນມີຄວາມສ່ຽງໄພຢູ່ຕະຫຼອດເວລາ ບາງບ່ອນທີ່ຕ່ຳແມ່ນຖືກຖ້ວມແລ້ວເປັນທີ່ຮຽບຮ້ອຍ ຂະນະດຽວກັນຫຼາຍພາກສ່ວນກໍ່ຮ່ວມແຮງຮ່ວມໃຈກັນສ້າງຄູປ້ອງກັນນ້ຳຖ້ວມຢູ່ເຂດທີ່ເປັນຈຸດຫຼໍ່ແຫຼມ.
ຊຶ່ງໃນວັນທີ 29 ສິງຫາ 2024 ນີ້, ອ້າຍນ້ອງທະຫານ ນະຄອນຫລວງວຽງຈັນ, ຊາວໜຸ່ມ ແລະ ປະຊາຊົນ ກໍ່ໄດ້ເລັ່ງນຳເອົາກະສອບຊາຍມາເຮັດຄູກັ້ນນໍ້າຂອງ ຢູ່ເຂດບ້ານໜອງດາ ແລະ ບ້ານດ່ານຄຳ ເມືອງສີໂຄດຕະບອງ ນະຄອນຫລວງວຽງຈັນ ເພື່ອບໍ່ໃຫ້ນໍ້າຂອງໄຫລເຂົ້າຖ້ວມບ້ານເຮືອນປະຊາຊົນ.
ທ່ານ ທະວີໄຊ ເໝົາສົມພູ ເຈົ້າເມືອງສີໂຄດຕະບອງ ໃຫ້ສຳພາດວ່າ: ພາຍຫຼັງທີ່ອົງການປົກຄອງເມືອງສີໂຄດຕະບອງ ໄດ້ຮັບແຈ້ງຈາກກະຊວງ ກໍຄືອົງການປົກຄອງນະຄອນຫຼວງວຽງຈັນ ໃຫ້ກຽມຮັບມືກັບໄພນໍ້າຖ້ວມ ໃນວັນທີ 28 ສິງຫາ ພາກສ່ວນທີ່ກ່ຽວຂ້ອງໄດ້ລົງໄປກວດກາເບີ່ງບັນດາປະຕູນໍ້າຢູ່ເຂດເມືອງສີໂຄດຕະບອງ ລຽບຕາມແຄມນໍ້າຂອງ ເຫັນວ່າລະດັບນໍ້າຂອງຍັງສືບຕໍ່ເພີ່ມຂື້ນມາເປັນ 11,40 ແມັດ, ເຮັດໃຫ້ນໍ້າຂອງລົ້ນຝັ່ງ ເຂົ້າມາຖ້ວມເຮືອນພໍ່ແມ່ປະຊາຊົນຢູ່ບ້ານດ່ານຄໍາ ແລະ ບ້ານທີ່ຢູ່ລຽບຕາມແຄມແມ່ນໍ້າຂອງຈໍານວນໜຶ່ງ.
ຕໍ່ເຫດການດັ່ງກ່າວ ອົງການປົກຄອງເມືອງສີໂຄດຕະບອງ ຈື່ງໄດ້ລະດົມກຳລັງຈາກກອງບັນຊາການທະຫານເມືອງ, ກອງບັນຊາການທະຫານນະຄອນຫຼວງ, ອົງການຈັດຕັ້ງຊາວໜຸ່ມບ້ານ, ເມືອງ ແລະ ອຳນາດການປົກຄອງບ້ານທ້ອງຖິ່ນ ເພື່ອນໍາເອົາເປົາຊາຍມາສ້າງເປັນຄູກັ້ນນໍ້າ ຍາວປະມານ 300 ກວ່າແມັດ ຢູ່ບ້ານດ່ານຄຳ ເມືອງສີໂຄດຕະບອງ ເພື່ອກັ້ນນໍ້າຂອງທີ່ຍື່ງຂື້ນບໍ່ໃຫ້ໄປຖ້ວມເຮືອນຊານຂອງປະຊາຊົນທີ່ມີຄວາມສ່ຽງ ແລະ ມາຮອດວັນທີ 29 ສິງຫາ ລະດັບນໍ້າຂອງຍັງສືບຕໍ່ເພີ່ມຂື້ນມາເປັນ 11,55 ແມັດ, ທີ່ອົງການປົກຄອງເມືອງຈື່ງໄດ້ລະດົມກຳລັງມາເພີ່ມ ເພື່ອນໍາເອົາເປົາຊາຍສ້າງເປັນຄູກັ້ນນໍ້າໃຫ້ສູງຂື້ນຕື່ມ.
ສະເພາະເມືອງສີໂຄດຕະບອງ ນະຄອນຫຼວງວຽງຈັນມາຮອດວັນທີ 29 ສິງຫາ ມີປະຊາຊົນ ໄດ້ຮັບຜົນກະທົບຈາກນໍ້າຂອງຍື່ງຂື້ນຖ້ວມຈຳນວນ 3 ບ້ານ ຄື: ບ້ານຕາດທອງ 14 ຄອບຄົວ, ບ້ານ ໜອງດາ 43 ຄອບຄົວ, ບ້ານດ່ານຄຳ 22 ຄອບຄົວ, ຜົນເສຍຫາຍ ມີໜອງປາ ແລະ ນາ ຂອງພໍ່ແມ່ປະຊາຊົນເຂດບ້ານດັ່ງກ່າວ ປະມານ 8-10 ເຮັກຕາ, ສໍາລັບມູນຄ່າຄວາມເສຍຫາຍນັ້ນແມ່ນຍັງບໍ່ສາມາດປະເມີນໄດ້.
