ຂ່າວສານຫວຽດນາມ ລາຍງານວ່າ: ໃນວັນທີ 26 ສິງຫາຜ່ານມາ, ກະຊວງການຄ້າ ອຸດສາຫະກຳ ແລະ ພະລັງງານ ສ.ເກົາຫຼີ ໃຫ້ຮູ້ວ່າ: ລະດັບເຕີບໂຕດ້ານການສົ່ງອອກຂອງ ສ.ເກົາຫຼີ ບັນລຸລະດັບສູງສຸດໃນຈຳນວນ 10 ປະເທດສົ່ງອອກອັນດັບແຖວໜ້າຂອງໂລກ.
ໃນກອງປະຊຸມທົບທວນຄືນສະພາບການສົ່ງອອກ, ຕີລາຄາສະພາບການ ແລະ ວິທີແກ້ໄຂ ເພື່ອຊຸກຍູ້ການເຕີບໂຕຂອງການສົ່ງອອກ, ທ່ານ ປຣາກ ຊອງແທກ ຮອງລັດຖະມົນຕີ ກະຊວງການຄ້າອຸດສາຫະກຳ ແລະ ພະລັງງານ ສ.ເກົາຫຼີ ໃຫ້ຮູ້ວ່າ: ສ.ເກົາຫຼີ ພວມມີອັດຕາການເຕີບໂຕໄວທີ່ສຸດໃນບັນດາປະເທດສົ່ງອອກ 10 ປະເທດແຖວໜ້າໂລກໃນປີນີ້.
ນັບແຕ່ເດືອນຕຸລາປີ 2023 ເປັນຕົ້ນມາ, ການສົ່ງອອກຂອງ ສ.ເກົາຫຼີ ໄດ້ເພີ່ມຂຶ້ນຢ່າງບໍ່ຢຸດຢັ້ງ, ເປັນທ່າແຮງໃນການເຕີບໂຕຂອງເສດຖະກິດທັງໝົດ.
ອົງການການຄ້າໂລກ ( WTO ) ໃຫ້ຮູ້ວ່າ: ໃນ 5 ເດືອນຕົ້ນປີນີ້, ການສົ່ງອອກຂອງ ສ.ເກົາຫຼີ ໄດ້ເພີ່ມຂຶ້ນ 9,9% ເມື່ອທຽບໃສ່ໄລຍະດຽວກັນຂອງປີກາຍ ເຊິ່ງລື່ນກາຍຈີນ ທີ່ເພີ່ມຂຶ້ນ 4,7% ແລະ 1,8% ຂອງອາເມຣິກາ.
ມາຮອດເດືອນກໍລະກົດ ປີ 2024 ການສົ່ງອອກຂອງ ສ.ເກົາຫຼີ ໄດ້ເພີ່ມຂຶ້ນ 10 ເດືອນຕິດຕໍ່ກັນ, ຍອດວົງເງິນການຄ້າໄດ້ເກີນດຸນເປັນ 14 ເດືອນລຽນຕິດ. ຍອດມູນຄ່າສະສົມໃນ 7 ເດືອນຕົ້ນປີ 2024 ບັນລຸ 26,8 ຕື້ໂດລາ.
ໃນບັນດາຜະລິດຕະພັນຕ່າງໆ, ການສົ່ງອອກສິນຄ້າເຕັກໂນໂລຊີຂໍ້ມູນຂ່າວສານ ( IT ), ໃນນັ້ນມີຊິບ ເຊມິຄອນດັກເຕີ ( semiconductor ) ບັນລຸ 102,3 ຕື້ໂດລາ ເພີ່ມຂຶ້ນ 41% ເມື່ອທຽບໃສ່ໄລຍະດຽວກັນຂອງປີກາຍ.
