ໃນວັນທີ 26 ສິງຫາຜ່ານມາ, ອົງການອະນາໄມໂລກ ( WHO ) ໄດ້ປະກາດແຜນຍຸດທະສາດການກະກຽມຄວາມພ້ອມ ແລະ ການຄວບຄຸມການແຜ່ລະບາດຂອງພະຍາດໝາກສຸກລີງ ຫຼື mpox ຈາກມະນຸດສູ່ມະນຸດ.
ແຜນການເບື້ອງຕົ້ນຈະມີຂຶ້ນລະຫວ່າງເດືອນກັນຍາ ປີ 2024 ຮອດເດືອນກຸມພາ 2025 ແລະ ຕ້ອງໃຊ້ເງິນຈໍານວນ 135 ລ້ານໂດລາ ໂດຍເນັ້ນສ້າງຍຸດທະສາດການເຝົ້າຕິດຕາມ ແລະ ການຮັບມື, ຮັບປະກັນການເຂົ້າເຖິງການບົ່ງມະຕິພະຍາດ ແລະ ວັກຊີນ ຢ່າງເທົ່າທຽມກັນ, ຫຼຸດຜ່ອນການແຜ່ລະບາດຈາກສັດສູ່ມະນຸດ ແລະ ຊຸກຍູ້ໃຫ້ຊຸມຊົນຄວບຄຸມການແຜ່ລະບາດຜ່ານການປະສານງານໃນລະດັບຊາດ, ລະດັບພາກພື້ນ ແລະ ລະດັບໂລກ.
ແຜນການນີ້ ຈະປະຕິບັດຍຸດທະສາດຕິດຕາມວັດແທກ, ປ້ອງກັນ ແລະ ຮັບມືຢ່າງຮອບດ້ານຕໍ່ພະຍາດໝາກສຸກລີງ, ຊຸກຍູ້ການຄົ້ນຄວ້າ ແລະ ການເຂົ້າເຖິງອຸປະກອນ ການແພດຕ່າງໆຢ່າງຍຸຕິທຳ ເຊັ່ນ: ເຄື່ອງກວດຫາເຊື້ອ ແລະ ວັກຊີນ ເປັນຕົ້ນ. ພະຍາຍາມຢ່າງສຸດຂີດ ເພື່ອຫຼຸດຜ່ອນການແຜ່ເຊື້ອຈາກສັດສູ່ຄົນໃຫ້ໜ້ອຍລົງ ເທົ່າທີ່ຈະໜ້ອຍໄດ້.
ທ່ານ ທີໂດຣ ອັດຮານອມ ກິບຣີເຍຊຸສ ຜູ້ອຳນວຍການ ໃຫຍ່ອົງການອະນາໄມໂລກ ກ່າວວ່າ: ການລະບາດຂອງພະຍາດໝາກສຸກລີງ ໃນສາທາລະນະລັດ ປະຊາທິປະໄຕ ກອງໂກ ຫຼື ດີອາ ກອງໂກ ແລະ ກຸ່ມປະເທດໃກ້ຄຽງນັ້ນ ເປັນສິ່ງທີ່ສາມາດຄວບຄຸມ ແລະ ຢຸດຢັ້ງໄດ້ ໂດຍຈະມີການຍື່ນເລື່ອງຂໍລະດົມເງິນທຶນສຳລັບແຜນດັ່ງກ່າວໃນໄວໆນີ້.
