ວິທະຍຸສາກົນ ແຫ່ງ ສປ ຈີນ ລາຍງານວ່າ: ລະຫວ່າງວັນທີ 27 – 28 ສິງຫາ ຢູ່ນະຄອນຫຼວງປັກກິ່ງ ປະເທດຈີນ, ທ່ານ ຫວາງຢີ້ ຫົວໜ້າຫ້ອງວ່າການຄະນະກຳມະການວຽກງານການຕ່າງປະເທດຂອງສູນກາງພັກຄອມມູນິດຈີນ ໄດ້ຮ່ວມກັບ ທ່ານ ແຈັກ ຊູລິແວນ ຜູ້ຊ່ວຍວຽກຄວາມໝັ້ນຄົງແຫ່ງຊາດຂອງປະທານາທິບໍດີອາເມຣິກາ ຈັດການສົນທະນາທາງຍຸດທະສາດ ຈີນ – ອາເມຣິກາ ຮອບໃໝ່.
ໂອກາດດັ່ງກ່າວ, ທ່ານ ຫວາງຢີ້ ໄດ້ສະເໜີ 5 ຂໍ້ສະເໜີກ່ຽວກັບການແກ້ໄຂບັນຫາການພົວພັນ ຈີນ – ອາເມຣິກາ ຢ່າງຖືກຕ້ອງຄື ໜຶ່ງ ແມ່ນການພົວພັນ ຈີນ – ອາເມຣິກາ ຄວນຮັກສາທິດທາງທີ່ຖືກຕ້ອງ; ສອງ ແມ່ນສອງປະເທດ ຈີນ – ອາເມຣິກາ ຄວນຫຼີກເວັ້ນການປະທະກັນ ແລະ ການເປັນປໍລະປັກກັນ; ສາມ ແມ່ນການແລກປ່ຽນລະ ຫວ່າງ ຈີນ – ອາເມຣິກາ ຄວນດຳເນີນໄປດ້ວຍດີ; ສີ່ ແມ່ນການພົວພັນ ຈີນ – ອາເມຣິກາ ຄວນກ້າວໄປໄກຢ່າງໝັ້ນທ່ຽງ; ຫ້າ ແມ່ນສອງຝ່າຍ ຈີນ – ອາເມຣິກາ ຄວນບັນລຸການຢູ່ຮ່ວມກັນໂດຍສັນຕິ.
ທ່ານ ຫວາງຢີ້ ຍັງເນັ້ນໜັກວ່າ: ຝ່າຍອາເມຣິກາ ຄວນຢຸດຕິການກົດໜີບຈີນ ໃນຂົງເຂດເສດຖະກິດການຄ້າ ແລະ ວິທະຍາສາດເຕັກໂນໂລຊີ, ຢຸດຕິການທຳລາຍຜົນປະໂຫຍດທີ່ຊອບດ້ວຍກົດໝາຍຂອງຝ່າຍຈີນ. ຄວນປົກປັກຮັກສາຄວາມເຂັ້ມງວດ ແລະ ຄວາມສັກສິດຂອງຖະແຫຼງການແຫ່ງການປະພຶດຂອງບັນດາຝ່າຍໃນທະເລຈີນໃຕ້.
ທ່ານ ຊູລິແວນ ກ່າວຢືນຢັນວ່າ: ອາເມຣິກາ ແລະ ຈີນ ຈະຢູ່ຮ່ວມກັນໂດຍສັນຕິຢ່າງຖາວອນຢູ່ໃນໂລກໜ່ວຍນີ້, ເປົ້າໝາຍນະໂຍບາຍຂອງ ອາເມຣິກາ ແມ່ນເພື່ອຊອກເຫັນວິທີທີ່ເຮັດໃຫ້ການພົວພັນ ອາເມຣິກາ – ຈີນ ພັດທະນາແບບຍືນຍົງ. ອາເມຣິກາ ຍິນດີຮ່ວມກັບ ຈີນ ສືບຕໍ່ຮັກສາການສົນທະນາທາງຍຸດທະສາດ, ເພີ່ມຄວາມເຂົ້າໃຈກັນ, ຫຼຸດຜ່ອນຄວາມເຂົ້າໃຈຜິດ ແລະ ການຕີລາຄາຢ່າງຜິດພາດ.
