ແໜແດງ (Azolla spp) ເປັນພືດນໍ້າຂະໜາດນ້ອຍ ທີ່ມັກຂຶ້ນຢູ່ນໍ້າຂັງ ເຊິ່ງມີສານອາຫານຫຼາຍ ສາມາດນຳໄປເກືອສັດ ແລະ ເປັນປຸ໋ຍໄດ້ດີ. ເນື່ອງຈາກແໜແດງ ສາມາດຄົງໄນໂຕຣເຈນຈາກອາກາດໄດ້ດີ ຈຶ່ງເຮັດໃຫ້ແໜແດງເຕີບໂຕໄວ ທີ່ສຳຄັນມັນສາມາດລະລາຍໂຕໄດ້ງ່າຍ. ດັ່ງນັ້ນຫຼາຍຄົນຈຶ່ງນຳເອົາໄປປະກອບເປັນປຸ໋ຍໃສ່ກັບພືດຊະນິດອື່ນ.
ສະພາບແວດລ້ອມທີ່ດີຕໍ່ການຈະເລີນເຕີບໂຕຂອງແໜແດງ: ແໜແດງ ຈະເລີນເຕີບໂຕໄດ້ດີໃນນໍ້າທີ່ບໍ່ເລິກເກີນໄປ; ຈະເລີນໄດ້ດີໃນນໍ້າທີ່ມີຄ່າຄວາມເປັນກົດ-ດ່າງ (PH) ປະມານ 3,5-10; ຕ້ອງເປັນພື້ນທີ່ສາມາດຮັບແສງແດດໄດ້ດີ ເພາະແສງແດດຈະຊ່ວຍໃຫ້ແໜແດງຂະຫຍາຍຕົວໄດ້ດີ; ແໜແດງຕ້ອງການທາດອາຫານຄ້າຍຄືກັບພືດທົ່ວໄປ ເພື່ອຈະເລີນເຕີບໂຕ ເຊັ່ນ: ທາດຟອສຟໍຣັສ ຖ້າຂາດທາດດັ່ງກ່າວນີ້ການຂະຫຍາຍຕົວຂອງແໜແດງຈະຫຼຸດລົງ ແລະ ສີຈະຄໍ້າເຂົ້າ; ແໜແດງສາມາດຈະເລີນເຕີບໂຕໄດ້ດີໃນອຸນຫະພູມປະມານ 18-26 ອົງສາ; ສາມາດເພາະພັນໄດ້.
ດ້ານຫຼັງໃບແໜແດງຈະມີເປັນໂພງໆ ມີສາຫຼ່າຍສີຂຽວປະສົມສີນໍ້າເງິນອາໄສຢູ່ບ່ອນໂພງນັ້ນ ເຊິ່ງແໜແດງຈະມີໄນໂຕຣເຈນ ເປັນອົງປະກອບສູງເຖິງ 4,6% ເຊິ່ງສູງກວ່າພືດຕະກູນຖົ່ວປະມານ 3% ເມື່ອຫວ່ານແໜແດງໄປໃນນາ 1 ໄລ່ ຈະມີຜົນຜະລິດແໜແດງ 3 ໂຕນ ສົມທຽບໃສ່ກັບປຸ໋ຍຢູເຣຍ 7-10 ກິໂລ ເຊິ່ງພຽງພໍຕໍ່ກັບການຈະເລີນເຕີບໂຕຂອງຕົ້ນເຂົ້າ.
ການໃຊ້ແໜແດງຫຼັງໄຖປົກກ່ອນປູກເຂົ້າ ໂດຍໃຊ້ແໜແດງອັດຕາ 300 ກິໂລຕໍ່ໄລ່ ຈະໄດ້ຮັບປຸ໋ຍໄນໂຕຣເຈນທັນທີຫຼັງໄຖປົກ. ໃຊ້ ຄວາມຄຸມວັດສະພືດໃນນາ ຫຼຸດປະລິມານໃນການໃຊ້ສານເຄມີກຳຈັດວັດສະພືດ, ໃຊ້ທົດແທນປຸ໋ຍເຄມີ ຫຼື ຫຼຸດການໃຊ້ປຸ໋ຍເຄມີທີ່ມີຕົ້ນທຶນສູງ, ເພີ່ມອິນຊີວັດຖຸໃນດິນ, ຊ່ວຍເຮັດໃຫ້ການໃຊ້ປຸ໋ຍເຄມີ ມີປະສິດທິພາບຂຶ້ນ, ສາມາດເປັນອາຫານໃຫ້ສັດລ້ຽງເຊັ່ນ: ເປັດ, ໄກ່, ປາ, ງົວ, ຄວາຍ ແລະ ສາມາດເປັນປຸ໋ຍໃຫ້ພືດຊະນິດອື່ນໄດ້.
[ຂໍ້ມູນ: doa.go]
