ກອງປະຊຸມຄະນະກຳມະການປະສານງານຮ່ວມ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ຄັ້ງທີ II ໄດ້ຈັດຂຶ້ນໃນຕອນເຊົ້າວັນທີ 29 ສິງຫາ 2024 ທີ່ກະຊວງແຜນການ ແລະ ການລົງທຶນ, ໂດຍພໂດຍການເປັນປະທານຂອງທ່ານ ໄຊຊະນະ ສິດທິພອນ ຮອງປະທານຄະນະກຳມະການຮ່ວມມືລາວ-ຈີນ, ກະຊວງແຜນການ ແລະ ການລົງທຶນ ແລະ ທ່ານ ຫລີນຈີ (Ling Ji) ຮອງລັດຖະມົນຕີ ກະຊວງການຄ້າ ທັງເປັນຮອງຜູ້ຕາງໜ້າ ເຈລະຈາການຄ້າສາກົນ ສປ ຈີນ, ທັງເປັນປະທານຄະນະກຳມະການປະສານງານຮ່ວມ ເຂດຮ່ວມມືເສດຖະກິດເຕ່ນ ສປປ ລາວ – ບໍ່ຫານ ສປ ຈີນ ຝ່າຍຈີນ, ທ່ານ ນາງ ໂດຍມີທ່ານຮອງເຈົ້າແຂວງໆຫຼວງນໍ້າທາ, ການນຳແຂວງຢຸນນານ ແລະ ຄະນະຜູ້ແທນຂັ້ນກົມຈາກຂະແໜງ ການທີ່ກ່ຽວຂ້ອງຈາກ ສປປ ລາວ ແລະ ສປ ຈີນ ເຂົ້າຮ່ວມ.
ທ່ານ ໄຊຊະນະ ສິດທິພອນ ຮອງປະທານຄະນະກຳມະການຮ່ວມມືລາວ-ຈີນ, ກະຊວງແຜນການ ແລະ ການລົງທຶນ ໄດ້ກາວບາງຕອນວ່າ: ກອງປະຊຸມຄັ້ງນີ້ ມີຈຸດປະສົງເພື່ອປຶກສາຫາລືແຜນວຽກຂອງຄະນະກຳມະການປະສານງານ ພ້ອມທັງຮັບຟັງການລາຍງານສະພາບຄວາມຄືບໜ້າ, ສິ່ງທ້າທາຍ ກ່ຽວກັບການພັດທະນາຢູ່ເຂດຮ່ວມມື ເພື່ອພ້ອມກັນວາງທິດທາງແຜນການໃນຕໍ່ໜ້າໂດຍສະເພາະແມ່ນການປັບປຸງກົນໄກການອໍານວຍຄວາມສະດວກດ້ານຕ່າງໆໃນເຂດຮ່ວມມື ເຊັ່ນການເດີນທາງເຂົ້າ-ອອກຂອງຄົນ, ພາຫະນະ ແລະ ສິນຄ້າ ລວມເຖິງນະໂຍບາຍຕ່າງໆທີ່ຈະຕ້ອງໄດ້ພ້ອມກັນຊຸກຍູ້ສົ່ງເສີມ ໃນການຈັດຕັ້ງປະຕິບັດຮ່ວມກັນ ລວມເຖິງການປຶກສາຫາລືກ່ຽວກັບການປັບປຸງບາງມາດຕາຂອງ “ຂອບແຜນຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ” ທີ່ລັດຖະບານ ສປປ ລາວ ແລະ ສປ ຈີນ ໄດ້ລົງນາມຮ່ວມກັນໃນວັນທີ 31 ສິງຫາ 2015 ກໍ່ຄືການ ແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ສະບັບລົງວັນທີ 28 ພະຈິກ 2016, ເພື່ອໃຫ້ສອດຄ່ອງຮັບສະພາບຕົວຈິງຂອງການພັດທະນາ ໂດຍສະເພາະແມ່ນກົນໄກການປະສານງານ 3 ລະດັບຄື:
1. ຄະນະກຳມະການປະສານງານຮ່ວມ ຊຶ່ງຮ່ວມເປັນປະທານໂດຍ ຮອງລັດຖະມົນຕີກະຊວງແຜນການ ແລະ ການລົງທຶນ ສປປ ລາວ ແລະ ຮອງລັດຖະມົນຕີກະຊວງການຄ້າ ສປ ຈີນ ມີຮອງເຈົ້າແຂວງແຂວງຫລວງນ້ຳທາ ແລະ ຮອງເຈົ້າແຂວງຢຸນໜານ ເປັນຮອງປະທານ. ສະມະຊິກແມ່ນມາຈາກທຸກຂະແໜງການທິ່ກ່ຽວຂ້ອງ;
2. ໜ່ວຍປະຕິບັດງານເຂດຮ່ວມມື ຝ່າຍຈີນ ສະເໜີປັບປຸງກົນໄກພາຍໃນຂອງຕົນໂດຍປ່ຽນ ຈາກກົມການຄຸ້ມຄອງການລົງທຶນຕ່າງປະເທດ, ກະຊວງການຄ້າ ມາເປັນອຳນາດການປົກຄອງທ້ອງຖິ່ນນະຄອນຄຸນໝິງ; ພະແນກການຄ້າ ນະຄອນຄຸນໝິງ ສປ ຈີນ, ສ່ວນຝ່າຍລາວແມ່ນຍັງຮັກສາໂຄງປະກອບເດີມຄື ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ເປັນຫົວໜ້າໜ່ວຍປະຕິບັດງານ ທີ່ປະກອບດ້ວຍຂະແໜງການທີ່ກ່ຽວຂ້ອງຂັ້ນສູນກາງ ແລະ ແຂວງຫຼວງນໍ້າທາ ຊຶ່ງມີໜ້າທີ່ຮັບຜິດຊອບ ຜັນຂະຫຍາຍເນື້ອໃນບັນດາຂໍ້ກໍານົດຂອງຂອບແຜນຮ່ວມມື ແລະ ຊຸກຍູ້ວຽກງານປະຕິບັດການກໍ່ສ້າງເຂດການຮ່ວມມື, ຮັບການຊີ້ນຳຈາກ ຄະນະກຳມະການປະສານງານຮ່ວມ ແລະ ລາຍງານຕໍ່ຄະ ນະກຳມະການດັ່ງກ່າວ;
3. ອົງການບໍລິຫານງານປະຈໍາວັນຂອງເຂດຮ່ວມມື ຊຶ່ງແຕ່ລະຝ່າຍມີອົງການບໍລິຫານປະຈໍາວັນຂອງຕົນ ໂດຍຝ່າຍຈີນ ແມ່ນ ຄະນະກຳມະການຄຸ້ມຄອງເຂດຮ່ວມມືລາວ-ຈີນ ເປັນຫຼັກ ແລະ ຝ່າຍລາວ ແມ່ນ ຄະນະຄຸ້ມຄອງເຂດເສດຖະກິດພິເສດ ແຂວງຫຼວງນໍ້າທາ ເປັນຫຼັກ, ຊຶ່ງຈະມີພາກສ່ວນທີ່ກ່ຽວຂ້ອງປະກອບຢູ່ໃນຄະ ນະດັ່ງກ່າວ ແລະ ເຫັນດີດ້ານຫຼັກການ ໃນກຳນົດຢ່າງໜ້ອຍຕ້ອງຈັດກອງປະຊຸມຮ່ວມກັນທຸກໆ 06 ເດືອນ (2ຄັ້ງ/ປີ) ຫຼື ອາດຫຼາຍກວ່ານັ້ນໂດຍອີງຕາມຄວາມຈໍາເປັນ ແລະ ສະພາບຕົວຈິງຂອງວຽກງານຂອງ ສອງຝ່າຍ.
ທ່ານ ໄຊຊະນະ ສິດທິພອນ ໄດ້ກ່າວໃນກອງປະຊຸມວ່າ: ກອງປະຊຸມຄັ້ງນີ້ ກໍ່ເປັນຂີດໝາຍໜຶ່ງທີ່ຢັ້ງຢືນຕື່ມອີກວ່າ ພັກ ແລະ ລັດຖະບານ ສປປ ລາວ ແລະ ສປ ຈີນ ໄດ້ໃຫ້ຄວາມສໍາຄັນຕໍ່ໂຄງການຮ່ວມມື້ນີ້ ເພື່ອໃຫ້ເກີດດອກອອກຜົນ ແລະ ສ້າງໃຫ້ເຂດນີ້ກາຍເປັນເຂດຕົວແບບຂອງການຮ່ວມມືສອງຝ່າຍ ກໍ່ຄືການຮ່ວມມືລະຫວ່າງ ອາຊຽນ ແລະ ຈີນ. ຊຶ່ງໄລຍະຜ່ານມາ ໄດ້ຈັດມີການຈັດກອງປະຊຸມລະດັບໜ່ວຍປະຕິບັດງານ ແລະ ວິຊາການທີ່ມີຂັ້ນກົມເຂົ້າຮ່ວມຢ່າງເປັນປົກກະຕິ ແລະ ໄດ້ກອງປະຊຸມຄະນະກຳມະການປະສານງານຮ່ວມ ເຂດຮ່ວມມືເສດຖະ ກິດ ບໍ່ເຕ່ນ ສປປ ລາວ-ບໍ່ຫານ ສປ ຈີນ ຄັ້ງທີ I ທີ່ໄດ້ຈັດຂຶ້ນໃນວັນທີ 14 ພຶດສະພາ 2018, ທີ່ນະຄອນຄຸນໝິງ, ແຂວງຢຸນໜານ ສປ ຈີນ ເພື່ອພ້ອມກັນເປັນກໍາລັງແຮງຊຸກຍູ້ການພັດທະນາເຂດຮ່ວມມືໄປພ້ອມກັນແລະ ເຖິງແມ່ນວ່າ ໄລຍະຜ່ານມາການພັດທະນາຈະພົບກັບສິ່ງທ້າທາຍຫຼາຍດ້ານ ການນໍາທຸກຂັ້ນ ຂອງສອງພັກສອງລັດພວກເຮົາ ກໍ່ໄດ້ເອົາໃຈໃສ່ໃນການຊຸກຍູ້ເຂດຮ່ວມມືໃຫ້ນັບມື້ມີໃບໜ້າໃໝ່ຂຶ້ນຫຼາຍດ້ານ.
ອີງໃສ່ຜົນຂອງກອງປະຊຸມຄະນະກຳມະການປະສານງານຮ່ວມ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ຄັ້ງທີ II ນີ້ ສອງຝ່າຍຈະໄດ້ ສືບຕໍ່ເຮັດວຽກຮ່ວມກັນເພື່ອຜັນຂະຫຍາຍເປັນອັນລະອຽດຕື່ມ ໂດຍສະເພາະຝ່າຍລາວແມ່ນຈະໄດ້ສືບຕໍ່ສົມທົບແໜ້ນກັບຂະແໜງການທີ່ກ່ຽວຂ້ອງຂອງສູນກາງ ແລະ ອຳນາດການປົກຄອງຂອງແຂວງຫຼວງນໍ້າທາ ກໍ່ຄືຜູ້ພັດທະນາເຂດເສດຖະກິດພິເສດບໍ່ເຕ່ນແດນງາມ ເພື່ອທົບທວນຄືນການຈັດຕັ້ງປະຕິບັດ ຂອບແຜນຮ່ວມມື ກໍ່ຄືແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ສະບັບປະຈຸບັນ ກ່ອນຈະສັງລວມລາຍງານ ເພື່ອສະເໜີຂັ້ນເທິງຂອງຕົນພິຈາລະນາ ແລະ ຮັບຮອງແຜນແມ່ບົດຫຍໍ້ສະບັບປັບປຸງ ເພື່ອເປັນບ່ອນອີງໃນການວຽກງານການພັດທະນາເຂດຮ່ວມມືໃນຕໍ່ໜ້າ.
ໂອກາດນີ້ທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິ ເສດ (ຫຂສພ), ກະຊວງແຜນການ ແລະ ການລົງທຶນ ໃນນາມຫົວໜ້າໜ່ວຍປະຕິບັດງານ ຝ່າຍລາວ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ໄດ້ລາຍງານ ຕໍ່ກອງປະຊຸມໃຫ້ຊາບໂດຍສັງເຂບວ່າ: ໄລຍະຜ່ານມາ ໜ່ວຍປະຕິບັດງານຝ່າຍລາວ ໄດ້ສົມທົບແໜ້ນກັບຝ່າຍຈີນ ຢ່າງເປັນປົກກະຕິ ໃນການຈັດຕັ້ງຜັນຂະຫຍາຍວຽກງານຕ່າງໆ ເຖິງວ່າໄລຍະຂອງການລະບາດຂອງພະຍາດໂຄວິດ-19 ວຽກງານເຂດຮ່ວມມືເສດຖະກິດບໍ່ເຕ່ນ ສປປ ລາວ – ບໍ່ຫານ ສປ ຈີນ ກໍ່ໄດ້ຖືກຍົກຂຶ້ນເພື່ອປຶກສາຫາລືຮ່ວມກັນ ໃນຮູບແບບ Online ຜ່ານວິດີໂອທາງໄກ ກໍ່ຄືກອງປະຊຸມພົບປະຕ່າງໆໃນຂົງເຂດການພົວພັນລາວ-ຈີນ ຊຶ່ງມັນໄດ້ສະແດງອອກໃຫ້ເຫັນເຖິງຄວາມເອົາໃຈໃສ່ ແລະ ເອກະພາບຮ່ວມກັນໃນການຜັນຂະຫຍາຍ ບັນດາເນື້ອໃນທີ່ກໍານົດໃນຂອບແຜນຮ່ວມຂອງເຂດຮ່ວມມື ກໍ່ຄືແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ.
ຜ່ານການຈັດຕັ້ງປະຕິບັດຕົວຈິງ ເຂດຮ່ວມມືຂອງພວກເຮົາແມ່ນມີຄວາມຄືບໜ້າໃນການພັດທະນາໃນຫຼາຍດ້ານ ໂດຍສະເພາະແມ່ນພື້ນຖານໂຄງລາງ ເບື້ອງລາວ ຊຶ່ງແມ່ນເຂດເສດຖະກິດພິເສດ ບໍ່ເຕ່ນແດນງາມ (ຂສບ) ມີເນື້ອທີ່ສໍາປະທານ 1.640 ເຮັກຕາ, ມີຄວາມຄືບໜ້າໃນການພັດທະນາພື້ນຖານໂຄງລ່າງເພື່ອຮອງຮັບການລົງທຶນ ໃນຂະແໜງການຄ້າ, ການບໍລິການ ແລະ ການທ່ອງທ່ຽວ; ມີບໍລິສັດເຂົ້າມາລົງທຶນທັງໝົດ 144 ບໍລິສັດ ໃນນັ້ນ, ພາຍໃນ 1 ບໍລິສັດ, ຕ່າງ ປະເທດ 143 ບໍລິສັດ ຊຶ່ງກວມເອົາຂະແໜງອຸດສາຫະກໍາ 8%, ການຄ້າ 56% ແລະ ບໍລິການ 36%, ໂດຍມີທຶນທັງໝົດ 512,75 ລ້ານໂດລາສະຫະລັດ ແລະ ທຶນຈົດທະບຽນ 374,83 ລ້ານໂດລາສະຫະລັດ; ມີມູນຄ່າການລົງທຶນຕົວຈິງ 957,82 ລ້ານໂດລາສະຫະລັດ. ມອບພັນທະເຂົ້າງົບປະມານຂອງລັດ 1,48 ລ້ານໂດລາສະຫະລັດ; ສາມາດສ້າງວຽກເຮັດງານທໍາໄດ້ທັງໝົດ 4.640 ຄົນ, ໃນນັ້ນເປັນແຮງງານລາວ 818 ຄົນ.
