ກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກໍາ ແລະ ການຄ້າ (ອຄ) ຈັດກອງປະຊຸມ ເຜີຍແຜ່ການນໍາໃຊ້ ລະບົບຂໍ້ມູນຂ່າວສານຕະຫຼາດກະສິກໍາລາວ (AMIS) ແລະ ລະບົບຖານຂໍ້ມູນສິນຄ້າ ເຂົ້າ, ສັດ, ສິນຄ້າທ່າແຮງ ແລະ ສິນຄ້າໂອດ໊ອບ ໃນວັນທີ 27 ສິງຫາ 2024 ທີ່ກະຊວງ ອຄ ເຂົ້າຮ່ວມຂອງທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຄ, ມີຫົວໜ້າ, ຮອງຫົວໜ້າຫ້ອງການ, ກົມກອງ, ຜູ້ຕາງໜ້າ ພາກສ່ວນກະຊວງ, ສຄອຊ, ສະມາຄົມທຸລະກິດ, ຊ່ຽວຊານຜູ້ພັດທະນາລະບົບຖານຂໍ້ມູນ ເຂົ້າຮ່ວມ.
ລະບົບຂໍ້ມູນຂ່າວສານຕະຫຼາດກະສິກໍາລາວ ແມ່ນ ເວັບໄຊ https://amis.la
ທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະ ຫັດຖະກຳ ກ່າວວ່າ: ໂຄງການຜະລິດກະສິກຳເປັນສິນຄ້າຢູ່ ສປປ ລາວ ຫຼື LACP ແມ່ນໂຄງການທີ່ໄດ້ການສະໜັບສະ ໜູນທຶນກູ້ຢືມເງິນຈາກທະນາຄານໂລກ ແລະ ຮ່ວມກັນຈັດຕັ້ງປະຕິບັດກັບ ກະຊວງກະສິກຳ ແລະ ປ່າໄມ້ ແລະ ກະຊວງ ອຄ ໄດ້ກຳນົດເອົາ 5 ແຂວງ ເປົ້າໝາຍ ຄື: ແຂວງຄຳມ່ວນ, ບໍລິຄຳໄຊ, ໄຊຍະບູລີ, ແຂວງວຽງຈັນ ແລະ ນະຄອນຫຼວງວຽງຈັນ.
ໂຄງການນີ້, ກົມສົ່ງເສີມການຄ້າ ແລະ ຫັດຖະກໍາ, ກະຊວງ ອຄ ເປັນຜູ້ຮັບຜິດຊອບການຈັດຕັ້ງປະຕິບັດ 03 ອົງປະກອບຍ່ອຍ ຄື: 1). ການພັດທະນາລະບົບຂໍ້ມູນຂ່າວສານຕະຫຼາດກະສິກໍາ (AMIS), 2). ພັດທະນາຍຸດທະສາດການສົ່ງອອກເຂົ້າ (Rice Export Strategy) ແລະ 3). ການພັດທະນາເຄື່ອງໝາຍຄຸນນະພາບສິນຄ້າກະສິກໍາ (Agriculture Quality Mark) ເຊິ່ງການພັດທະນາລະບົບຂໍ້ມູນຂ່າວສານຕະຫຼາດກະສິກຳນີ້ໄດ້ກຳນົດເອົາເປົ້າໝາຍການສົ່ງເສີມ ແມ່ນສິນຄ້າປະເພດເຂົ້າ, ຊາວກະສິກອນ, ກຸ່ມຜູ້ຜະລິດເຂົ້າ, ກຸ່ມຜູ້ປະກອບການໂຮງສີເຂົ້າ, ໂຮງງານປຸງແຕ່ງ, ພໍ່ຄ້າຄົນກາງ ແລະ ພາກສ່ວນທີ່ກ່ຽວຂ້ອງກັບຕ່ອງໂສ້ສິນຄ້າກະສິກໍາ, ໃຫ້ສາມາດເຊື່ອມໂຍງເຂົ້າຫາກັນ ແລະ ເຂົ້າເຖິງຕະຫຼາດ.
ລະບົບຂໍ້ມູນຂ່າວສານຕະຫຼາດກະສິກຳລາວ (LAO Agricultural Market Information System: ເອີ້ນຫຍໍ້ວ່າ LAO-AMIS) ມີເປົ້າໝາຍ:
- ເພື່ອເກັບກໍາຂໍ້ມູນຂ່າວສານກ່ຽວກັບສິນຄ້າກະສິກຳ (ປະເພດເຂົ້າ) ຢູ່ ສປປ ລາວ, ເປັນຂໍ້ມູນພື້ນຖານທີ່ນໍາໃຊ້ເຂົ້າໃນການວິເຄາະ ແລະ ຄາດຄະເນຕະຫຼາດຂອງສິນຄ້າກະສິກຳ ຢູ່ພາຍໃນປະເທດ ແລະ ສາກົນ.
- ເພື່ອສະໜອງຂໍ້ມູນທາງດ້ານການຕະຫຼາດກ່ຽວກັບສິນຄ້າກະສິກໍາ ເຊັ່ນ: ລາຄາ ປະລິມານ ແນວໂນ້ມ ແລະ ຂໍ້ມູນອື່ນໆທີ່ກ່ຽວຂ້ອງ ໃຫ້ຊາວກະສິກອນ, ກຸ່ມຜູ້ຜະລິດ, ຜູ້ປະກອບການໂຮງສີ, ໂຮງງານປຸ່ງແຕ່ງ ແລະ ພາກສ່ວນທີ່ກ່ຽວຂ້ອງກັບຕ່ອງໂສ້ສິນຄ້າກະສິກໍາ.
- ເພື່ອເປັນຂໍ້ມູນທີ່ນໍາໃຊ້ເຂົ້າໃນການວິເຄາະ ແລະ ການປະເມີນ ໃນວຽກງານການສົ່ງເສີມການຜະລິດກະສິກໍາເປັນສິນຄ້າ ກ້າວໄປເຖິງການຄົ້ນຄວ້າປັບປຸງນະໂຍບາຍຂອງລັດ ໃຫ້ຖືກຕ້ອງແທດເໝາະກັບສະພາບຄວາມເປັນຈິງ.
ການຈັດຕັ້ງປະຕິບັດໂຄງການ ໂຄງການ ໄດ້ເລີ່ມຈັດຕັ້ງແຕ່ປີ 2018 ຫາ 2022 ແຕ່ເນື່ອງຈາກວ່າມີຫຼາຍອົງປະກອບ ບວກກັບໄລຍະນັ້ນ ກໍມີການແຜ່ລະບາດCovid-19 ຈຶ່ງເຮັດໃຫ້ໂຄງການແກ່ຍາວມາຮອດຕົ້ນປີ 2024.
ສໍາເລັດການອອກແບບລະບົບ ເວັບໄຊ https://amis.la
ນອກຈາກການພັດທະນາ ລະບົບຂໍ້ມູນຂ່າວສານຕະຫຼາດສິນຄ້າກະສິກຳລາວ ກົມສົ່ງເສີມການຄ້າ ແລະ ຫັດຖະກຳ ກໍໄດ້ຄົ້ນຄວ້າ ແລະ ນຳສະເໜີ ໂຄງການ ເພື່ອພັດທະນາລະບົບຖານຂໍ້ມູນສິນຄ້າກະສິກໍາ ປະເພດ ເຂົ້າ ແລະ ສັດ ເພື່ອສະໜອງພາຍໃນ ແລະ ສົ່ງອອກ ເຊິ່ງໄດ້ຮັບການອະນຸມັດ ເປັນໂຄງການລົງທຶນຂອງລັດ ພາຍໃຕ້ໂຄງການສົ່ງເສີມຜະລິດເປັນສິນຄ້າ ແລະ ຄໍ້າປະກັນສະບຽນອາຫານ ຂອງກະຊວງ ອຄ. ໃນລະບົບຖານຂໍ້ມູນດັ່ງກ່າວ ນອກຈາກສິນຄ້າກະສິກຳປະເພດ ເຂົ້າ ແລະ ສັດ ຍັງໄດ້ປັບປຸງເພີ່ມຖານຂໍ້ມູນຂອງ ສິນຄ້າທ່າແຮງ ແລະ ສິນຄ້າໂອດອບ ຂອງລາວ ແລະ ກຳນົດເກັບກຳຂໍ້ມູນ ໃນທົ່ວປະເທດ, 17 ແຂວງ ແລະ ນະຄອນຫຼວງ, ດ້ວຍຮູບແບບລະບົບຢູ່ເທິງເວັບບຣາວເຊີ ເຊິ່ງເປັນລະບົບຖານຂໍ້ມູນທີ່ມີການເຊື່ອມຕໍ່ກັນ ໃນຊື່ www.epd.moic.gov.la.
ປັດຈຸບັນ ທາງກົມ ເຮັດສໍາເລັດການຈັດຝຶກອົບຮົມກ່ຽວກັບການນໍາໃຊ້ ລະບົບຖານຂໍ້ມູນສິນຄ້າ ເຂົ້າ, ສັດ, ສິນຄ້າທ່າແຮງ ແລະ ໂອດ໋ອບນີ້ ໃຫ້ພະນັກງານຮັບຜິດຊອບຂັ້ນແຂວງ ໃນຈໍານວນ 04 ແຂວງຄື: ບໍລິຄໍາໄຊ, ຄໍາມ່ວນ, ສະຫວັນນະເຂດ ແລະ ສາລະວັນ ເພື່ອອັບເດດ ແລະ ປ້ອນຂໍ້ມູນດ້ວຍຕົນເອງ ແລະ ຈະສືບຕໍ່ຈັດຝຶກອົບຮົມການນໍາໃຊ້ຖານຂໍ້ມູນດັ່ງກ່າວ ໃຫ້ແກ່ບັນດາແຂວງທີຍັງເຫຼືອໃນຂອບເຂດທົ່ວປະເທດ.
ຂໍ້ມູນທັງໝົດສາມາດອັບເດດຮອດມື້ນີ້ ເບື້ອງຕົ້ນແມ່ນ ສິນຄ້າປະເພດ ເຂົ້າ ມີ 27 ຫົວໜ່ວຍ, ສັດ ມີ 17 ຫົວໜ່ວຍ ໂອດ໊ອບ ມີ 362 ຫົວໜ່ວຍ ແລະ ສິນຄ້າທ່າແຮງ ມີ 243 ຫົວໜ່ວຍ.(ປະກອບມີຂໍ້ມູນ: ທີ່ຕັ້ງສະຖານທີ່, ເນື້ອທີ່ການຜະລິດ, ລາຄາ, ປະລິມານການຜະລິດ, ຜະລິດຕະພັນຫຼັກ, ຂໍ້ມູນແຕ່ລະປີ, ຮູບພາບປະກອບ ແລະ ຂໍ້ມູນການຕະຫຼາດ).
ທ່ານ ມະໂນທອງ ວົງໄຊ ກ່າວວ່າ: ປະຈຸບັນເປັນຍຸກຂອງການພັດທະນາ ດ້ານຂໍ້ມູນຂ່າວສານເຕັກໂນໂລຊີ ທີ່ມີຄວາມກ້າວໜ້າຢ່າງວ່ອງໄວ, ການເກັບຖານຂໍ້ມູນຂະໜາດໃຫຍ່, ການວິເຄາະຂໍມູນດ້ວຍລະບົບປັນຍາປະດິດ ໄດ້ເປັນເຄື່ອງມືທີ່ສຳຄັນ ໃຫ້ແກ່ການສ້າງ ແລະ ພັດທະນາໃນເກືອບທຸກຂົງເຂດວຽກງານ ແນ່ນອນວ່າໃນໂຄງການ ຜະລິດກະສິກຳເປັນສິນຄ້າ ແມ່ນມີຄວາມຈຳເປັນທີ່ສຸດໃນການສ້າງ ແລະ ອັບເດດຂໍ້ມູນທີ່ຕິດພັນກັບ ຜະລິດຕະພັນກະສິກຳ ໂດຍສະເພາະ ປະເພດສິນຄ້າກະສິກຳ, ປະລິມານ ແລະ ລາຄາ, ພ້ອມດ້ວຍຂໍ້ມູນອື່ນໆທີ່ກ່ຽວຂ້ອງທີ່ນຳໃຊ້ເຂົ້າໃນການວິເຄາະ ແລະ ປະເມີນ ໃນການສົ່ງເສີມການຜະລິດເປັນສິນຄ້າ ໃຫ້ແທດເໝາະກັບຄວາມເປັນຈິງ, ທັງເປັນຖານຂໍ້ມູນ ນໍາໃຊ້ເຂົ້າໃນການສົ່ງເສີມການຄ້າ, ການລົງທຶນ ໃຫ້ແກ່ຫົວໜ່ວຍທຸລະກິດ.
ທ່ານ ມະໂນທອງ ວົງໄຊ ກ່າວຕື່ມອີກວ່າ: ໃນໄລຍະຜ່ານມາ ກະຊວງ ອຄ ກໍໄດ້ສຸມຄວາມພະຍາຍາມ ສ້າງ ແລະ ພັດທະນາຖານຂໍ້ມູນ ທີ່ຕິດພັນກັບຂະແໜງການ ໃຫ້ເປັນລະບົບ ແລະ ສາມາດສັງລວມ ຂໍ້ມູນທີ່ລະອຽດ ເຊັ່ນ:
- ຖານຂໍ້ມູນວິສາຫະກິດແຫ່ງຊາດ (ned.moic.gov.la) ເຊື່ອມຕໍ່ກັບ ລະບົບ TaxRIS ຂອງກົມອາກອນ, ກະຊວງການເງິນ;
- ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ (bned.moic.gov.la);
- ຖານຂໍ້ມູນຊັບສິນທາງປັນຍາ (online.dip.gov.la) ເຊື່ອມຕໍ່ກັບຖານຂໍ້ມູນ ຊັບສິນທາງປັນຍາໂລກ;
- ຖານຂໍ້ມູນນິຕິກຳຂອງຂະແໜງອຸດສາຫະກຳ ແລະ ການຄ້າ (law.moic.gov.la);
- ລະບົບການຄ້າທາງເອເລັກໂຕນິກສຳລັບຜະລິດຕະພັນກະສິກຳລາວ, ເຊິ່ງສ້າງເປັນຖານຂໍ້ມູນຢູ່ໃນລະບົບ ຄລາວ (https://laoproduct.com.la/);
- ຖານຂໍ້ມູນເຄມີແຫ່ງຊາດ (chinfo.moic.gov.la);
- ລະບົບການອອກໃບອານຸຍາດດຳເນີນກິດຈະການໂຮງງານອຸດສາຫະກຳປຸງແຕ່ງ ເອເລັກໂທນິກ ເຊື່ອມຕໍ່ກັບຖານຂໍ້ມູນວິສາຫະກິດແຫ່ງຊາດ;
- ລະບົບບໍລິການອອກໃບຢັ້ງຢືນແຫລ່ງກຳເນີດສິນຄ້າ ທາງເອເລັກໂທນິກ (www.ecolao.gov.la);
- ລະບົບຂຶ້ນທະບຽນຜູ້ນຳເຂົ້າ-ສົ່ງອອກ; ແລະ
- ລະບົບສະຖິຕິການຄ້າຕ່າງປະເທດ (laotradestat.moic.gov.la)
ເຖິງວ່າ ລະບົບຂໍ້ມູນຂ່າວສານຕະຫຼາດກະສິກຳ ດັ່ງກ່າວ ທີ່ມານຳສະເໜີໃນມື້ນີ້ ຈະຖືກອອກແບບອອກມາດີແລ້ວກໍຕາມ ແຕ່ກໍຍັງເປັນພຽງຂັ້ນລິເລີ່ມ ມີພຽງສິນຄ້າປະເພດດຽວ ແລະ ບໍທັນລົງເກັບກຳໃນບັນດາແຂວງທັງໝົດ ພ້ອມນີ ການສືບຕໍ່ນຳໃຊ້ ຫຼື ການອັບເດດຂໍ້ມູນແຕ່ລະໄລຍະນັ້ນ ກໍຖືວ່າເປັນສິ່ງທີ່ທ້າທາຍເຊິ່ງກໍມີຫຼາຍປັດໄຈ ໂດຍສະເພາະ ງົບປະມານ ເພື່ອລົງເກັບກຳຂໍ້ມູນຢູ່ທ້ອງຖີ່ນ, ຢູ່ພື້ນຖານການຜະລິດຕົວຈິງໃນແຕ່ລະໄລຍະ, ຄວາມຊຳນານງານຂອງບຸກຄະລະກອນໃນທ້ອງຖິ່ນທີ່ຮັບຜິດຊອບປ້ອນຂໍ້ມູນລົງໃນລະບົບທັນຕາມລະດູການຜະລິດ ແລະ ຫຼັງການເກັບກ່ຽວຜົນຜະລິດໃນແຕ່ລະປີທີ່ຊັດເຈນນັ້ນ ເຫັນວ່າພວກເຮົາຈະໄດ້ສືບຕໍ່ ຂົນຂວາຍຍາດແຍ່ງທຶນຮອນ, ການຮ່ວມມື ແລະ ສ້າງຄວາມເຂັ້ມແຂງໃຫ້ແກ່ພະນັກງານຮັບຜິດຊອບ ເຊິ່ງໃນຕໍ່ໜ້າ ຄາດຄະເນວ່າຈະໄດ້ຮັບ ບ້ວງທຶນຈາກທະນາຄານໂລກ ໃນໄລຍະທີສອງ ເພື່ອພັດທະນາໃຫ້ລະບົບ ໃຫ້ອຸດົມສົມບູນຍິ່ງຂຶ້ນ.
