ພະແນກອຸດສາຫະກຳ ແລະການຄ້າແຂວງອຸດົມໄຊລາຍງານວ່າ: ເລີ່ມເເຕ່ ເດືອນ ກັນຍາ 2023 ເປັນຕົ້ນມາ ພະເເນກອຸດສາຫະກຳ ແລະ ການຄ້າ ໄດ້ລົງຊຸກຍູ້ ໃຫ້ບັນດາເມືອງ ໃຫ້ຫັນປ່ຽນ ການນຳໃຊ້ຊິງຊັ່ງຈາກອານາລັອກ ມາ ເປັນຊິງຊັ່ງ ໄຟຟ້າ (electric scale) ທີ່ເປັນລະບົບດີຈີຕອນ ທີ່ມີຄວາມລະອຽດຊັດເຈນສູງ ແລະ ສະດວກສະບາຍໃນການນໍາໃຊ້ຊັ່ງສິນຄ້າ.
ພະເເນກອຸດສາຫະກຳ ແລະ ການຄ້າ ຈິ່ງໄດ້ແຈ້ງການໃຫ້ບັນດາ ຫ້ອງການອຸດສາຫະກຳ ແລະ ການຄ້າ 7 ເມືອງ ເປັນເຈົ້າການໃນການຈັດຕັ້ງປະຕິບັດ ການປັບປ່ຽນຊິງຊັ່ງອານາລັອກມາເປັນຊິງຊັ່ງໄຟຟ້າ ທີ່ເປັນດີຈີຕອນ ຢູ່ບັນດາຕະຫຼາດ, ຫ້າງຮ້ານ ຈຳໜ່າຍປະເພດສິນຄ້າ ເຊັ່ນ: ຊີ້ນ, ປາ, ເຂົ້າສານ ໂດຍໄດ້ສົມທົບກັບເຈົ້າຂອງຕະຫຼາດ, ເຕົາຂ້າສັດ, ລູກຂຽງ, ກຸ່ມຈັດຊື້ ແລະ ຜູ້ປະກອບການຄ້າ – ຂາຍ ຫັນປ່ຽນມານຳໃຊ້ຊິງໄຟຟ້າ ແມ່ນການຈັດຕັ້ງປະຕິບັດ ລະບຽບ, ກົດໝາຍ ແລະ ວຽກງານເຄັ່ງຮ້ອນ ເພື່ອແກ້ໄຂບັນຫາຫາງສຽງຂອງສັງຄົມ, ການນຳໃຊ້ຊິງຊັ່ງໃຫ້ມີຄວາມຖືກຕ້ອງ ແລະ ທັນສະໄໝ ມາຮອດປັດຈຸບັນນີ້ ບັນດາຕະຫຼາດຂອງແຕ່ລະເມືອງເເມ່ນໄດ້ຫັນປ່ຽນມານຳໃຊ້ຊິງຊັ່ງໄຟຟ້າ ໃນປະເພດຊີ້້ນ, ປາ ແລະ ເຂົ້າ.
ສຳລັບຢູ່ເມືອງໄຊ ຂະເເໜງຊັບສິນທາງປັນຍາ, ມາດຕະຖານ ແລະ ວັດແທກ ໄດ້ສົມທົບກັບຫ້ອງການອຸດສາຫະກຳ ແລະ ການຄ້າເມືອງ ໄດ້ລົງຊຸກຍູ້ບັນດາຜູ້ປະກອບການ ແລະ ໄດ້ເຮັດບົດບັນທຶກກຳນົດການປ່ຽນການນຳໃຊ້ຊິງຊັ່ງ ເປັນເເຕ່ລະລາຍບຸກຄົນ. ທັງນີ້ກໍ່ເພື່ອເຮັດໃຫ້ການຊື້ຂາຍ, ການຊັ່ງສິນຄ້າໃຫ້ສະດວກສະບາຍຫຼາຍຂຶ້ນ, ມີຄວາມໂປງໃສ, ສັດເຈນຕໍ່ນ້ຳໜັກ ແລະ ການຄິດໄລ່ເງິນ ພ້ອມທັງເຮັດໃຫ້ສັງຄົມມີຄວາມໄວ້ວາງໃຈ ຄາດວ່າຈະໃຫ້ສຳເລັດໃນທ້າຍເດືອນ ກັນຍາ 2024 ນີ້.
ຂ່າວ ແລະຮູບຈາກພະແນກອຸດສາຫະກຳ ແລະການຄ້າແຂວງອຸດົມໄຊ
