ການຜະລິດກະສິກໍາທີ່ມີລະບົບຈັດການຕ່ອງໂສ້ແບບທັນສະໄໝ ແລະ ມີຕະຫຼາດຮອງຮັບແມ່ນມີໂອກາດຂະຫຍາຍໂຕໄດ້ໄປອີກຍາວໄກ ເຊິ່ງກຸ່ມສະຫະກອນ 3F ກະສິກໍາຍືນຍົງຂອງລາວ ແມ່ນຍັງຕ້ອງການສະມາຊິກໃນການລ້ຽງໝູເພື່ອສະໜອງຕະຫຼາດ ທາງກຸ່ມພ້ອມສະໜັບສະໜູນໃນການສ້າງສະມາຊິກ ແລະ ຂະຫຍາຍໂອກາດໃນການລ້ຽງລົງສູ່ຊຸມຊົນທ້ອງຖີ່ນ.
ທ່ານ ຂັນທອງ ສີປະເສີດ ປະທານສະຫະກອນ 3F ກະສິກໍາຍືນຍົງຂອງລາວ ທັງເປັນຜູ້ອໍານວຍການບໍລິສັດ KT Farm, ບໍລິສັດ UDA Farm ເຊິ່ງໃນນັ້ນແມ່ນພວກເຮົາແມ່ນກຸ່ມການຜະລິດການລ້ຽງໝູ ເຊິ່ງມີພໍ່ແມ່ພັນ ແລະ ໝູພັນຊີ້ນສະໜອງໃຫ້ສັງຄົມ ເຊິ່ງມື້ນີ້ມາຮ່ວມປຶກສາຫາລືແລກປ່ຽນຂອງໂຄງການສົ່ງເສີມການມີວຽກເຮັດງານທໍາຢູ່ໃນຊົນນະບົດ ຖືວ່າເປັນໂອກາດທີ່ດີ ທີ່ຈະເຮັດໃຫ້ພວກເຮົາໄດ້ແລກປ່ຽນລະຫວ່າງຜູ້ຜະລິດກະສິກໍາດ້ວຍກັນ ແລະ ແລກປ່ຽນກັບ ບັນດາສະຖາບັນການສຶກສາຂອງລາວເຮົາ ເຊິ່ງໃນນັ້ນພວກເຮົາຕ້ອງການທີ່ຈະຂະຫຍາຍຟາມໝູ, ຕ້ອງການຂະຫຍາຍກໍາລັງການຜະລິດ ແຕ່ຍັງຂາດພະນັກງານທີ່ມີສີມືທາງດ້ານການລ້ຽງໝູ ເຊິ່ງມື້ນີ້ພວກເຮົາກໍມີຄູ່ມືການລ້ຽງ, ເຕັກນິກການລ້ຽງ, ການເບິ່ງແຍງຮັກສາ ຈະໄດ້ລົງເລີກຮ່ວມກັນ ເພື່ອສ້າງຄູ່ມືການຝືກງານ ເຊິ່ງເປົ້າໝາຍຂອງພວກເຮົາແມ່ນຢາກໃຫ້ທຸກຄົນໄດ້ມາເຮັດວຽກໂຕຈິງໃນຟາມຂອງກຸ່ມພວກເຮົາ ເພື່ອທີ່ຈະສ້າງທັກສະ ສີມືຄວາມຊໍານານສະເພາະດ້ານໃນການລ້ຽງໝູ ເພື່ອຈະໄດ້ສືບຕໍ່ເຮັດວຽກກັບຟາມຂອງພວກເຮົາ ຫຼື ກັບໄປເຮັດວຽກຢູ່ໃນທ້ອງຖີ່ນຂອງພວກເພີ່ນ.
ທ່ານກ່າວວ່າ: ສໍາລັບຜູ້ທີ່ສົນໃຈຢາກລ້ຽງເຮົາກໍໃຫ້ຄວາມຮູ້ໄດ້ຄົບວົງຈອນ ເລີ່ມແຕ່ລ້ຽງໝູແມ່ພັນ ເພື່ອສະໜອງໃຫ້ສັງຄົມ ຫຼື ຕ້ອງການລ້ຽງເອົາລູກໝູໄປລ້ຽງເປັນໝູຊີ້ນ ມັນຈະມີເຕັກນິກການລ້ຽງ ລວມທັງໃຫ້ຮູ້ລົງເລີກເຖິງຕົ້ນທຶນການຜະລິດວ່າໃຊ້ແນວໃດ? ລ້ຽງແນວໃດ? ແລ້ວຂາຍອອກຈະເຫຼືອກໍາໄລເທົ່າໃດ? ແລະ ເຕັກນິກອື່ນໆ ເຊິ່ງພວກເຮົາ ກໍມີຕະຫຼາດຮອງຮັບຜົນຜະລິດໃຫ້ ເຊິ່ງຄວາມຕ້ອງການຂອງຕະຫຼາດຍັງມີຫຼາຍ.
ທ່ານກ່າວວ່າ: ຢູ່ໃນ ກຸ່ມສະຫະກອນ 3F ກະສິກໍາຍືນຍົງຂອງລາວ ຂອງພວກເຮົາມີພໍ່ແມ່ພັນ ລວມກັນທັງໝົດ 7 ພັນກວ່າໂຕ ສະໜອງລູກໝູໄດ້ 1,8 ແສນໂຕຕໍ່ປີ ເຊິ່ງກໍຍັງບໍ່ທັນພຽງພໍ ກຸ່ມຂອງພວກເຮົາສະໜອງພາຍໃນປະະເທດໄດ້ພຽງ 20% ຂອງຄວາມຕ້ອງການເທົ່ານັ້ນ ແລະ ຕ້ອງການຂະຫຍາຍສະມາຊິກເພີ່ມເຕີມໃນຂອບເຂດທົ່ວປະເທດ. ທ່ານຂັນທອງ ກ່າວ.
