ທ່ານ ເຕີ້ຍ ສົມສັກ ປະທານບໍລິສັດທີທີພາວເວີໂຕໂທຈໍາກັດຜູ້ດຽວ ທີ່ສູ້ຊີວິດກາຍເປັນນັກທຸລະກິດໜຸ່ມໃນເສັ້ນທາງທຸລະກິດນໍ້າ ມັນເຊື້ອໄຟໄດ້ເລົ່າສູ່ທີມຂ່າວແຂວງໄຊຍະບູລີ ເມື່ອບໍ່ດົນມານີ້ວ່າ: ທ່ານ ເຕີ້ຍ ສົມສັກ ອາຍຸ 45 ປີ ເກີດທີ່ບ້ານເມືອງຫານ ເມືອງຫົງສາ ແຂວງໄຊຍະບູລີ ລະດັບການສຶກສາຈົບ ມ.3 ເຕີບໂຕຈາກຊາວໄຮ່ຊາວນາ ກ່ອນຈະມາເຖິງຈຸດນີ້ເມື່ອກ່ອນພາຍຫຼັງຮຽນຈົບຊັ້ນມັດທະຍົມຕົ້ນໃນປີ 1997-1998 ຕົນເອງໄດ້ໄປເປັນກໍາມະກອນກໍ່ສ້າງ ແລະ ຍັງໄດ້ທົດລອງຕັ້ງເຕົາເຜົາດິນຈີ່ແຕ່ກໍ່ເຮັດໃຫ້ລາຍໄດ້ພໍແຕ່ກຸ້ມກິນ,ຮອດປີ 2005 ຈຶ່ງໄດ້ຫັນປ່ຽນອາຊີບມາເກັບຊື້ເຫຼັກເສດຕັ້ງຮ້ານຂາຍແຜ່ນຊິດີ,ເຫັນວ່າລາຍຮັບໄປໄດ້ດີໃນໄລຍະນັ້ນກໍໄດ້ຊື້ລົດໃຫຍ່ໜຶ່ງຄັນຈາກເງິນທີ່ໄດ້ເກັບທ້ອນໂຮມໄວ້ເພື່ອຮັບໃຊ້ດໍາເນີນທຸລະກິດຊື້ເຫຼັກເສດຂາຍ.
ບໍ່ສະເພາະຮັບຊື້ເຫຼັກເສດຂາຍຕົນເອງຍັງມີແນວຄິດຢາກຂາຍນໍ້າມັນຈຶ່ງໄດ້ລົງທຶນຊື້ນໍ້າມັນມາຂາຍດ້ວຍລະບົບປັ່ນໃນໄລຍະນັ້ນເຫັນວ່າໄດ້ຂາຍດີມີກໍາໄລງາມ,ຕົນເອງເລີ່ມມີແນວຄິດວ່າການດໍາເນີນທຸລະກິດຂາຍສົ່ງນໍ້າມັນແມ່ນໄດ້ດີ ແລະ ໄປຖືກທາງກັບຄວາມຕັ້ງໃຈຂອງຕົນເອງຈຶ່ງໄດ້ຊື້ດິນຢູ່ບ້ານຂອນເມືອງເງິນ 7 ລ້ານ 5 ແສນກີບ ຕັ້ງປໍ້ານໍ້າມັນແກວ່ງດ້ວຍມື ແລະ ປໍ້າມໍເຕີໄຟຟ້າໜ່ວຍໜຶ່ງມາຮອດປີ 2012 ກິດຈະການກໍຍັງດໍາເນີນໄປດ້ວຍດີມີທ່ວງທ່າຂະຫຍາຍຕົວຂຶ້ນຄວາມຕ້ອງການຜູ້ຊົມໃຊ້ນໍ້າມັນໃນສັງຄົມສູງຂຶ້ນຕົນເອງຈຶ່ງໄດ້ຫັນມາຕັ້ງໂຮງກັ່ນນໍ້າມັນຢູ່ບ້ານເພຍງາມໂດຍໃສ່ຊື່ວ່າບໍລິສັດລືໄຊເຄີນພາວເວີໃນປີ 2013 ແຕ່ກໍບໍ່ສໍາເລັດຜົນເນື່ອງຈາກວ່າເກີດອັກຄີໄພສອງປີຊ້ອນຕິດຕໍ່ກັນ (2014-2015) ຊຶ່ງໄດ້ສ້າງຄວາມເສຍຫາຍຫຼາຍຮ້ອຍລ້ານກີບ. ແຕ່ແນວໃດກໍ່ຕາມຍ້ອນມີພັກ-ລັດນໍາພາ ຄອຍໃຫ້ກໍາລັງໃຈອຸ້ມຊູຍູ້ໜູນລຸກຂຶ້ນຕໍ່ໄປໃນເມື່ອເຮົາຍັງມີລົມຫາຍໃຈຢູ່ຕົນເອງຈຶ່ງໄດ້ຊື້ດິນອີກຕື່ມຈໍານວນ 3 ເຮັກຕາ ເພື່ອມາສ້າງເປັນຄັງນໍ້າມັນຂະໜາດບັນຈຸ 7-8 ລ້ານລິດ ແລະ ຍັງຂະຫຍາຍອອກໄປຕື່ມອີກ, ປັດຈຸບັນນີ້ ບໍລິສັດຂອງຂ້າພະເຈົ້າໄດ້ນໍາເຂົ້ານໍ້າມັນໄດ້ເຖິງປີລະ 165 ລ້ານລິດ ມີທຶນຈົດທະບຽນ 150 ຕື້ກີບ, ໃນນີ້ມີ 12 ສາຂາ ມີປໍ້າຕົວແບບ, ປໍ້າຕົວແທນ 315 ປໍ້າໃນທົ່ວປະເທດແຕ່ລະປີກໍໄດ້ມອບພັນທະເຂົ້າງົບປະມານ 700-800 ຕື້ກີບຕໍ່ປີ,ສະເລ່ຍວັນໜຶ່ງ 2 ຕື້ກີບ ນອກນັ້ນ ຍັງໄດ້ຊ່ວຍເຫຼືອສັງຄົມປີລະ 300-400 ລ້ານກີບ ນັບແຕ່ບຸກຄົນຂັ້ນບ້ານ, ຂັ້ນເມືອງ, ຂັ້ນແຂວງ ແລະ ຂັ້ນສູນກາງ ແຕ່ເຖິງຢ່າງໃດກໍ່ຕາມໃນຊ່ວງລັດຖະບານ ສປປ ລາວ ດັດສົມບໍລິສັດ,ດັ່ງນັ້ນບໍລິສັດຂອງຂ້າພະເຈົ້າພະຍາຍາມປັບປຸງໃຫ້ຖືກທິດຕາມດໍາລັດເລກທີ 031/ລບ ເພາະເພິ່ນຂັດຈ້ອນໃຫ້ 5 ບໍລິສັດ ຖືກຕ້ອງຕາມເງື່ອນໄຂທີ່ກໍານົດສາງນໍ້າມັນຕອງບັນລຸ 20 ລ້ານລິດ ທຶນຈົດທະບຽນຕ້ອງ 400 ກວ່າຕື້ກີບ ໃນນັ້ນ ຕ້ອງມີນໍ້າມັນສະຕອກ 7 ລ້ານກວ່າລິດ ເພື່ອແກ້ໄຂວິກິດແກ້ໄຂນໍ້າມັນຂາດແຄນຢູ່ໃນພາກເໜືອຂອງເຮົາ ແລະ ຄາດວ່າບໍລິສັດຂອງພວກເຮົາແມ່ນຈະໄດ້ເຂົ້າຮອບ 1 ປີ ໃນ 5 ບໍລິສັດ ທີ່ລັດຖະບານກໍານົດໄວ້; ທັງໝົດນັ້ນແມ່ນຜົນສໍາເລັດການເຄື່ອນໄຫວວຽກງານຂອງບໍລິສັດທີທີພາວເວີໂຕໂທຈໍາກັດຜູ້ດຽວ.
ທ່ານ ເຕີ້ຍ ສົມສັກ ນັກທຸລະກິດໜຸ່ມປະທານບໍລິສັດພາວເວີໂຕໂທຈໍາກັດຜູ້ດຽວຍັງໃຫ້ຮູ້ຕື່ມວ່າ: ຍ້ອນພັກ-ລັດ ເຫັນໄດ້ຄວາມຮູ້ຄວາມສາມາດຄວາມເປັນບໍລິສັດໝັ້ນຄົງ ທ່ານ ເຕີ້ຍ ສົມສັກ ນັກທຸລະກິດໜຸ່ມຍັງໄດ້ຖືກແຕ່ງຕັ້ງໃຫ້ເປັນກໍາມະການແນວລາວສ້າງຊາດເມືອງເງິນໃນປີ 2015 ເພື່ອຊຸກຍູ້ຊ່ວຍວຽກທາງດ້ານທຶນຮອນທັງດ້ານແນວຄິດເຕົ້າໂຮມຄວາມສາມັກຄີພໍ່ແມ່ປະຊາຊົນຈົນສາມາດປະກາດເມືອງເງິນເປັນເມືອງສາມັກຄີປອງດອງເປັນເມືອງທໍາອິດຂອງແຂວງກໍຄືຂອງທົ່ວປະເທດໃນປີ 2018-2019 ໄດ້ຮັບເລືອກຕັ້ງເປັນຮອງນັກທຸລະກິດໜຸ່ມ,ຕົນເອງໄດ້ປະກອບສ່ວນທຶນຮອນ 100 ລ້ານກວ່າກີບຊ່ວຍເຫຼືອສັງຄົມໄດ້ຈັດຕັ້ງແຜນສູ້ຊົນ 5 ປີ ໃນການເປີດກອງປະຊຸມນັກທຸລະກິດໜຸ່ມໄດ້ 2 ເມືອງຄື: ເມືອງເງິນ ແລະ ເມືອງຫົງສາ ພ້ອມນີ້ຕົນເອງຍັງໄດ້ຮັບຄວາມໄວ້ເນື້ອເຊື່ອໃຈຈາກພໍ່ແມ່ປະຊາຊົນໄດ້ເລືອກຕົນເອງເປັນຜູ້ແທນສະພາປະ ຊາຊົນແຂວງໄຊຍະບູລີ ຊຸດທີ II ຊຶ່ງຕົນເອງກໍໄດ້ເຮັດພາລະບົດບາດໜ້າທີ່ຂອງຕົນຢ່າງເຕັມສ່ວນພ້ອມນີ້ຍັງໄດ້ຮັບມອບໝາຍແຕ່ງຕັ້ງໃຫ້ເປັນທີ່ປຶກສາກໍາມາທິການແຜນການ ແລະ ການເງິນກວດສອບຂອງສະພາປະຊາຊົນແຂວງໄດ້ຊຸກຍູ້ສົ່ງເສີມນັກທຸລະກິດພໍ່ແມ່ປະຊາຊົນຜູ້ປະກອບການ, ທະຫານ, ຕໍາຫຼວດ ຈັດຕັ້ງປະຕິບັດແຜນງົບປະມານໃຫ້ໄດ້ເກີນແຜນ ຮອດປີ 2022-2023 ໄດ້ຮັບເລືອກຕັ້ງເປັນຮອງປະທານແນວລາວສ້າງຊາດແຂວງໄຊຍະບູລີ(ບໍ່ປະຈໍາການ) ຕົນເອງກໍໄດ້ຕັ້ງໜ້າປະຕິບັດໜ້າທີ່ຄວາມຮູ້ຄວາມສາມາດໄດ້ສະຫຼະເວລາປະກອບສ່ວນທຶນຮອນເພື່ອສູ້ຊົນໃຫ້ໄດ້ເປີດເມືອງສາມັກຄີປອງດອງໃຫ້ໄດ້ 4 ເມືອງຄື: ເມືອງແກ່ນທ້າວ, ເມືອງບໍ່ແຕນ, ເມືອງຊຽງຮ່ອນ ແລະ ເມືອງໄຊສະຖານ ແລະ ຈະພະຍາຍາມສູ້ຊົນໃຫ້ໄດ້ເປີດແຂວງໄຊຍະບູລີເປັນແຂວງສາມັກຄີປອງດອງບໍ່ສະເພາະແຕ່ຖືກແຕ່ງຕັ້ງໃຫ້ຮັບໜ້າທີ່ທີ່ກ້າວມານັ້ນໃນຫຼ້າສຸດຕົນເອງກໍໄດ້ຮັບມອບໝາຍໃຫ້ເປັນກໍາມະການສູນກາງແນວລາວສ້າງຊາດສະໄໝທີ 11 ເປັນທີ່ປຶກສາຊັ້ນຄົນເປັນທີ່ປຶກສາກໍາມະທິການ ແຜນການ-ການເງິນ ແລະ ກວດສອບສະມາຊິກສະພາແຫ່ງຊາດຊຶ່ງເປັນວຽກທີ່ລະອຽດອ່ອນສະນັ້ນເຮົາຕ້ອງຍຶດໝັ້ນ 2 ຫຼັກການຄື ຫຼັກການທີໜຶ່ງ: ເມືອງຕ້ອງເຄົາລົບລະບຽບກົດໝາຍ, ເຮັດວຽກຕາມການມອບໝາຍ ແລະ ຕາມໜ້າທີ່ຮັບຜິດຊອບຍຶດໝັ້ນຕາມຫຼັກຖານຂໍ້ມູນຕົວຈິງອັນໃດຖືກອັນໃດຜິດ, ຫຼັກການທີສອງ ຄື: ຍຶດໝັ້ນຜົນປະໂຫຍດຂອງພໍ່ແມ່ປະຊາຊົນບັນດາເຜົ່າທົ່ວປະເທດ, ຍຶດໝັ້ນຜົນປະໂຫຍດຂອງຊາດ, ຍຶດໝັ້ນຜົນປະໂຫຍດຂອງຜູ້ປະກອບການ ນັກທຸລະກິດຜູ້ມາລົງທຶນທັງພາຍໃນ ແລະ ຕ່າງປະເທດ.
(ຂ່າວ+ພາບ: ບຸນທີ)
