ສະໂມສອນດອກປີກໄກ່ ແລັບດອກ ແຊັມເກົ່າ ຕັ້ງເປົ້າຍາດ 8 ຫຼຽນຄໍາ ເພື່ອປ້ອງກັນແຊັມໃນການແຂ່ງຂັນກີລາດອກປີກໄກ່ລາຍກາຍໃຫຍ່ທີ່ສຸດໃນສປປ ລາວ ກັບລາຍການ 23rd Beerlaos badminton Championship 2024 ລະຫວ່າງວັນທີ 22-25 ສິງຫາ 2024 ທີ່ສະໜາມດອກປີກໄກ່ໃນຮົ່ມ ເສດຖາ ( ເຂດບຶງຂະຫຍອງ ) ນະຄອນຫຼວງວຽງຈັນ ສປປ ລາວ ແຕ່ຜ່ານການແຂ່ງຂັນຕົວຈິງສາມາດຍາດໄດ້ 5 ຫຼຽນຄໍາ ແຕ່ກໍດີພໍທີ່ຈະປ້ອງກັນແຊັມ ແລະ ຄວ້າຂັນແຊັມໄປຄອງເປັນສະໄໝທີ 2.
ການແຂ່ງຂັນກີລາດອກປີກໄກ່ລາຍກາຍໃຫຍ່ທີ່ສຸດໃນສປປ ລາວ ກັບລາຍການ 23rd Beerlaos badminton Championship 2024 ລະຫວ່າງວັນທີ 22-25 ສິງຫາ 2024 ມີການຊີງໄຊ 17 ລາຍການປະກອບມີ:
+ຮຸ່ນເຍົາວະຊົນ 10 ລາຍການຄື: ດ່ຽວເຍົາວະຊົນຊາຍ 13 ປີ, ດ່ຽວເຍົາວະຊົນຍິງ 13 ປີ, ດຽ່ວເຍົາວະຊົນຊາຍ 15 ປີ, ດ່ຽວເຍົາວະຊົນຍິງ 15 ປີ, ຄູ່ເຍົາວະຊົນຊາຍ 15 ປີ, ດ່ຽວເຍົາວະຊົນຊາຍ 17 ປີ, ດ່ຽວເຍົາວະຊົນຍິງ 17 ປີ ແລະ ຄູ່ປະສົມ 17 ປີ.
-ຮຸ່ນຊາວໜຸ່ມ-ທົ່ວໄປ 7 ລາຍການຄື: ດ່ຽວຊາຍທົ່ວໄປ, ດ່ຽວຍິງທົ່ວໄປ, ຄູ່ຊາຍທົ່ວໄປ, ຄູ່ປະສົມທົ່ວໄປ, ຄູ່ສະໝັກຫຼິ້ນຊາຍ ( ສາຍ ຂ ) ແລະ ຄູ່ຊາຍອາຍຸລວມ 70 ປີຂຶ້ນໄປ ( ນັກກີລາແຕ່ລະຄົນຕ້ອງມີອາຍຸ 35 ປີຂຶ້ນໄປ ).
ຜ່ານການແຂ່ງຂັນປາກົດວ່າ: ສະໂມສອນດອກປີກໄກ່ ແລັບດອກ ແຊັມເກົ່າ ສາມາດຄວ້າແຊັມໄປ 5, 3 ຫຼຽນເງິນ ແລະ 5 ຫຼຽນທອງ ລາຍການຈາກທັງໝົດ 17 ລາຍການ ເຊິ່ງກາຍເປັນສະໂມສອນທີ່ຍາດໄດ້ຫຼຽນຄໍາໄດ້ຫຼາຍທີ່ສຸດໃນປີນີ້ ເຮັດໃຫ້ໄດ້ຄວ້າຂັນແຊັມຂັນໃຫຍ່ໄປຄອງເປັນສະໄໝທີ 2 ຕິດຕໍ່ກັນ.
ສ່ວນອັນດັບ 2 ເປັນຂອງ ສະໂມສອນ LGB ສີຣິວົງ ກວາດໄປ 4,5 ຫຼຽນຄໍາ, 5 ຫຼຽນເງິນ ແລະ 6 ຫຼຽນທອງ ແລະ ອັນດັບ 3 ສະໂມສອນ APMC ກວາດໄປ 4 ຫຼຽນຄໍາ, 7 ຫຼຽນເງິນ ລະ 10 ຫຼຽນທອງ.
ຂ່າວ: Larh Creators; ຮູບ: ສົງການ
