ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ໄດ້ ຢ້ຽມຢາມ ແລະ ພົບປະໂອ້ລົມ ພະນັກງານຫຼັກແຫຼ່ງ ຂະແໜງສາທາລະນະສຸກ ພາຍໃຕ້ການນຳພາຕ້ອນຮັບ ຂອງທ່ານ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ມີບັນດາຄະນະກົມ, ຫ້ອງການ, ອຳນວຍການໂຮງໝໍ, ແພດໝໍ, ພະຍາບານ ແລະ ພະນັກງານຫຼັກແຫຼ່ງອ້ອມຂ້າງກະຊວງສາທາລະນະສຸກເຂົ້າຮ່ວມ, ໃນຕອນເຊົ້າວັນທີ 22 ສິງຫາ 2024 ທີ່ໂຮງໝໍມະໂຫສົດ.
ຜ່ານການຮັບຟັງ ການລາຍງານ ຂອງລັດຖະມົນຕີກະຊວງສາທາລະນະສຸກ ກໍ່ຄືການຕິດຕາມວຽກງານ ໃນຂະແຫນງການສາທາລະນະສຸກ. ຂ້າພະເຈົ້າ ຕີລາຄາສູງຕໍ່ບັນດາສະຫາຍ ທີ່ໄດ້ມີຄວາມພະຍາຍາມ, ສູ້ຊົນ, ບຸກບືນ ສຸມທຸກກໍາລັງ ແລະ ຊັບພະຍາກອນທີ່ມີ ຜ່ານຜ່າທຸກອຸປະສັກ ແລະ ຄວາມຫຍຸ້ງຍາກ ເພື່ອຈັດຕັ້ງປະຕິບັດ ແນວທາງ, ນະໂຍບາຍຂອງ ພັກ-ລັດ ແລະ ແຜນພັດທະນາຂອງຂະແຫນງສາທາລະນະສຸກ ໃຫ້ເຂົ້າ ສູ່ຊີວິດຕົວຈິງ ແລະ ເປັນຮູບປະທໍາຫຼາຍຂຶ້ນ ເຮັດໃຫ້ຫຼາຍຕົວຊີ້ວັດ ດ້ານສາທາລະນະສຸກ ສາມາດບັນລຸຜົນຕາມຄາດໝາຍທີ່ວາງໄວ້.
ໃນການຢ້ຽມຢາມໃນຄັ້ງນີ້ ທ່ານ ເລຂາທິການໃຫຍ່, ປະທານປະເທດ ໄດ້ເໜັ້ນໜັກໃຫ້ຂະແໜງສາທາລະນະສຸກໃຫ້ມີຈຸດສຸມດັ່ງຕໍ່ໄປນີ້:
1.ສະເໜີໃຫ້ຖັນແຖວແພດໝໍ ຮັກສານາມມະຍົດ “ນັກຮົບເສື້ອຂາວ” ເພື່ອສ້າງຕົນໃຫ້ເປັນ “ແພດປະຕິວັດ” ທີ່ມີມາດຕະ ຖານ ນັບມື້ນັບສູງຂຶ້ນ ເພື່ອຕອບສະໜອງຄວາມຮຽກຮ້ອງຕ້ອງການ ທີ່ນັບມື້ນັບສູງຂອງສະພາບການຂອງປະເທດເຮົາ, ທັງກຽມພ້ອມຮັບມືກັບສິ່ງທ້າທາຍທີ່ອາດຈະເກີດຂຶ້ນ, ຂະແໜງການສາທາລະນະສຸກ, ແພດ, ໝໍ, ພະຍາບານ ຕ້ອງເປັນຜູ້ສະດຸ້ງໄວ, ຮຽນຮູ້ສິ່ງໃໝ່ໆຢູ່ທຸກເວລາ, ຕິດຕາມສະພາບການ ແລະ ນຳທັນສະຖານະການ ດ້ານການປ້ອງກັນພະຍາດ ແລະ ປິ່ນປົວພະຍາດໃຫ້ທັນການ.
2.ສືບຕໍ່ປະຕິບັດນະໂຍບາຍສາທາລະນະສຸກທົ່ວປວງຊົນ, ຖືເອົາວຽກງານອະນາໄມ ກັນພະຍາດ ແລະ ສົ່ງເສີມສຸຂະພາບ ເປັນຕົ້ນຕໍ, ຖືເອົາວຽກງານປິ່ນປົວ ແລະ ສະໜອງການບໍລິການສຸຂະພາບ ຢ່າງທົ່ວເຖິງ, ມີຄຸນນະພາບ ຍຸຕິທໍາ ແລະ ສະເໝີພາບ ເປັນສໍາຄັນ;
3.ໂຄສະນາສຸຂະສຶກສາ, ສະໜອງຂໍ້ມູນຂ່າວສານ ແລະ ສ້າງຄວາມເຂົ້າໃຈ, ຄວາມຕື່ນຕົວ ໃນການຮັກສາສຸຂະພາບ ຂອງປະຊາຊົນ ໃຫ້ນັບມື້ນັບກວ້າງຂວາງ, ໃຫ້ເປັນວຽກງານປະຈຳ, ຊ່ວຍໃຫ້ພົນລະເມືອງຮູ້ຂໍ້ມູນໃໝ່ໆຢ່າງເປັນປົກກະຕິ ໂດຍຜ່ານພາຫະນະສື່ມວນຊົນ ໃຫ້ຫລາຍຂຶ້ນ;
-ປັບປຸງກອງທຶນປະກັນສຸຂະພາບ ໃຫ້ເຂັ້ມແຂງ, ມີປະສິດທິພາບ, ຮັບປະກັນ ໃຫ້ປະຊາຊົນ ເຂົ້າເຖິງການບໍລິການ ທີ່ນັບມື້ນັບທົ່ວເຖິງ ໄປພ້ອມກັບການສືບຕໍ່ປັບປຸງຕາໜ່າງສາທາລະນະສຸກ ອອກສູ່ທ້ອງຖິ່ນ, ຊົນນະບົດ, ເຂດພູດອຍ, ເຂດຫ່າງໄກສອກຫລີກ ໃຫ້ກວ້າງອອກ ແລະ ທົ່ວເຖິງ;
4.ຍົກສູງຄຸນນະພາບ ຂອງການບໍລິການສຸຂະພາບ ຢູ່ໂຮງໝໍຂັ້ນຕ່າງໆ, ຫັນໂຮງໝໍສູນກາງ ແລະ ໂຮງໝໍແຂວງຈໍານວນໜຶ່ງ ໄປສູ່ຄວາມທັນສະໄໝ ເທື່ອລະກ້າວ, ທັງທາງດ້ານພື້ນຖານໂຄງລ່າງ, ອຸປະກອນການແພດ ແລະ ປະກອບບຸກຄະລາກອນທີ່ເກັ່ງ, ຊໍານິຊໍານານ, ມີມາດຕະຖານນັບມື້ນັບສູງຂຶ້ນ;
-ລະບົບການບໍລິຫານຈັດການຂອງໂຮງໝໍ ຕ້ອງຫັນໄປນໍາໃຊ້ລະບົບໄອທີໃຫ້ໄດ້, ສ້າງໃຫ້ໂຮງໝໍ ສາມາດກຸ້ມຕົນເອງເທື່ອລະກ້າວທາງດ້ານງົບປະມານ;
5.ຊຸກຍູ້ສົ່ງເສີມການສົມທົບການປີ່ນປົວຢາຫລວງ ແລະ ຢາພື້ນເມືອງ (ການແພດສະໄໝໃໝ່ ແລະ ການແພດພື້ນເມືອງ);
6.ເອົາໃຈໃສ່ພັດທະນາໂຮງງານຜະລິດຢາຂອງລັດ ແລະ ເອກະຊົນທີ່ມີແລ້ວພາຍໃນປະເທດ ໃຫ້ພຽງພໍກັບການນໍາໃຊ້ ຄຽງຄູ່ກັບການຮັກສາມາດຕະຖານທີ່ມີຢູ່ ແລະ ປັບປຸງຄຸນນະພາບ ໃຫ້ຫຍັບເຂົ້າມາດຕະຖານພາກພື້ນ ແລະ ສາກົນເທື່ອລະກ້າວ;
7.ປັບປຸງອົງການອາຫານ ແລະ ຢາ (ອຢ) ໃຫ້ປະຕິບັດໜ້າທີ່ໃຫ້ມີປະສິດທິຜົນສູງຂຶ້ນ ເພື່ອຊ່ວຍໃຫ້ພົນລະເມືອງລາວຫລັກຈາກອາຫານເປັນພິດ, ຢາບໍ່ໄດ້ມາດຕະ ຖານ, ຄຸນນະພາບ ທີ່ເປັນອັນຕະລາຍຕໍ່ສຸຂະພາບຂອງພົນລະເມືອງ;
8.ເອົາໃຈໃສ່ ຕິດຕາມ, ກວດກາ, ຄຸ້ມຄອງ, ຈັດສັນ ບັນດາໂຮງໝໍ ແລະ ຄລີນິກ ເອກະຊົນ ໃຫ້ເປັນລະບົບ, ທັງເສີມຂະຫຍາຍບົດບາດຄວາມເປັນເຈົ້າການ ຂອງໂຮງໝໍເອກະຊົນ ໃນການສະໜອງບໍລິການກວດສຸຂະພາບ ແລະ ປິ່ນປົວພະຍາດ ໃຫ້ມີຄຸນນະພາບ ແລະ ລາຄາສົມເຫດສົມຜົນ ເພື່ອໃຫ້ປະຊາຊົນສາມາດເຂົ້າເຖິງ ແລະ ມີທາງເລືອກຫລາຍຂຶ້ນ; ແຕ່ເວລາດຽວກັນ ກໍຕ້ອງຄຸ້ມຄອງດ້ານຈັນຍາ ບັນ-ຈັນຍາທຳ ບໍ່ໃຫ້ກາຍເປັນການກົດຂີ່ຂູດຮີດ ໃນການບໍລິການປີ່ນປົວຄົນເຈັບ;
9.ສືບຕໍ່ເປັນເຈົ້າການຮ່ວມມືກັບຄູ່ຮ່ວມພັດທະນາ, ອົງການຈັດຕັ້ງສາກົນ, ປະເທດເພື່ອນມິດ ເພື່ອພັດທະນາວຽກງານສາທາລະນະສຸກ ໃຫ້ເຂັ້ມແຂງ.
