ທ່ານເຈົ້າແຂວງສະຫວັນນະເຂດ ໄດ້ລົງຊຸກຍູ້ການຈັດຕັ້ງປະຕິບັດວຽກງານຂອງສູນພັດທະນາ ແລະ ບໍລິການກະສິກຳ – ປ່າໄມ້ໜອງເຕົ່າ ແລະ ກຸ່ມປູກຜັກບ້ານໂພນສິມ ນະຄອນໄກສອນ ພົມວິຫານ ເມື່ອທ້າຍອາທິດຜ່ານມາ ໂດຍເນັ້ນໃຫ້ຍົກລະດັບກຸ່ມການປູກຜັກບ້ານໂພນສິມ ເປັນສະຫະກອນ ເພື່ອເພີ່ມຄວາມອາດສາມາດໃນການຜະລິດ.
ໂອກາດນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ຮັບຟັງການລາຍງານກ່ຽວກັບການຈັດຕັ້ງເຄື່ອນໄຫວວຽກງານການປູກ – ການລ້ຽງພາຍໃນສູນ ແລະ ກຸ່ມດັ່ງກ່າວ ລວມເຖິງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ແຜນການໃນຕໍ່ໜ້າ.
ພ້ອມນີ້, ທ່ານເຈົ້າແຂວງ ໄດ້ກ່າວມີຄຳເຫັນໃຫ້ທິດຊີ້ນຳທີ່ເປັນປະໂຫຍດຕໍ່ກັບການພັດທະນາການປູກ – ການລ້ຽງ ພາຍໃນສູນພັດທະນາ ແລະ ບໍລິການກະສິກຳ – ປ່າໄມ້ໜອງເຕົ່າ ແລະ ກຸ່ມປູກຜັກບ້ານໂພນສິມ ເຊິ່ງຜ່ານມາແມ່ນປະຕິບັດໄດ້ດີສົມຄວນ; ແຕ່ເມື່ອທຽບໃສ່ທ່າແຮງ ແລະ ຄວາມຮຽກຮ້ອງຕ້ອງການຕົວຈິງຂອງສັງຄົມ ແມ່ນຍັງບໍ່ທັນສາມາດຕອບສະໜອງໄດ້ພຽງພໍ. ສະນັ້ນ ທາງສູນພວກເຮົາ ຕ້ອງໄດ້ມີການທົບທວນຄືນຈຸດໃດທີ່ຍັງຕ້ອງປັບປຸງ ໂດຍໃຫ້ມີການຮ່ວມມືກັບສູນເພາະພັນພືດປາກບໍ່ ແລະ ສູນຄົ້ນຄວ້າກະສິກຳທ່າຊະໂນ ໃນການຜະລິດແນວພັນປາ ທີ່ຕະຫຼາດມີຄວາມຕ້ອງການສູງ.
ສ່ວນກຸ່ມການປູກຜັກບ້ານໂພນສິມ ທີ່ໄດ້ຮັບການສ້າງຕັ້ງມາແຕ່ປີ 2012 ປັດຈຸບັນພາຍໃນກຸ່ມມີສະມາຊິກ 13 ຄອບຄົວ ( ສະເພາະບ້ານໂພນສິມ ມີ 9 ຄອບຄົວ ) ໂດຍໄດ້ທຳການປູກຜັກໃນຫຼາຍໆຊະນິດ ເພື່ອສະໜອງຕະຫຼາດພາຍໃນ ແລະ ສົ່ງບໍລິສັດຊັນເປເປີ ເຊິ່ງສາມາດສ້າງລາຍຮັບແກ່ຄອບຄົວໄດ້ 5 – 8 ລ້ານກີບຕໍ່ເດືອນ. ປັດຈຸບັນທາງກຸ່ມກຳລັງຂະຫຍາຍສະມາຊິກເພີ່ມອີກ 27 ຄອບຄົວ ລວມເປັນທັງໝົດ 40 ຄອບຄົວ ແລະ ຍັງຈະສືບຕໍ່ຂະຫຍາຍຕື່ມອີກ.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ເນັ້ນໃຫ້ພາກສ່ວນກ່ຽວຂ້ອງຂັ້ນແຂວງ – ນະຄອນ ຂຸ້ນຂ້ຽວໃນການຍົກລະດັບກຸ່ມປູກຜັກໂພນສິມ ເປັນສະຫະກອນໃຫ້ສຳເລັດໂດຍໄວ ເຊິ່ງສະຫະກອນຈະມີລະບົບການບໍລິຫານທີ່ເປັນລະບົບຄົບຊຸດ, ມີການແບ່ງວຽກກັນຢ່າງຄັກແນ່. ພາຍຫຼັງສຳເລັດແລ້ວ ທາງການນຳພວກເຮົາ ຈະໄດ້ຊອກຊ່ອງທາງໃນການຊຸກຍູ້ສົ່ງເສີມ ເປັນຕົ້ນ: ດ້ານທຶນຮອນ, ເນື້ອທີ່ການຜະລິດ, ນ້ຳ ແລະ ອື່ນໆ ເພື່ອຍົກລະດັບການຜະລິດໃຫ້ຫຼາຍກວ່າເກົ່າ ແລະ ສາມາດສະໜອງພຽງພໍກັບຄວາມຕ້ອງການພາຍໃນແຂວງ ເວົ້າສະເພາະນະຄອນໄກສອນ ພົມວິຫານ ແລະ ເຮັດໃຫ້ຊີວິດການເປັນຢູ່ຂອງຊາວກະສິກອນພວກເຮົາ ດີຂຶ້ນຢ່າງເປັນກ້າວໆ.
