ປັດຈຸບັນກຸ່ມຜູ້ປະກອບການສວນທຸລຽນລາວ ມີເນື້ອທີ່ສວນ 20.000 ເຮັກຕາ ສາມາດເກັບກ່ຽວແລ້ວ 10.000 ກວ່າຕົ້ນ ເຊິ່ງຄາດວ່າຮອດປີ 2029 ຈະເກັບກ່ຽວໄດ້ປະມານ 270.000 ຕົ້ນ ຜົນຜະລິດປະມານ 24.300 ໂຕນ.
ກອງປະຊຸມພົບປະປຶກສາຫາລື ລະຫວ່າງ ສະມາຄົມທຸລະກິດກະສິກຳລາວ ແລະ ຄະນະບໍລິຫານສະມາຄົມ ພ້ອມດ້ວຍຕົວແທນຂອງກຸ່ມຜູ້ປະກອບການສວນທຸລຽນລາວ ກັບ ຄະນະນັກທຸລະກິດຜູ້ນຳເຂົ້າສິນຄ້າກະສິກຳ ຈາກ ສປ ຈີນ ມີຂຶ້ນໃນວັນທີ 20 ສິງຫາ 2024 ທີ່ສະພາການຄ້າ ແລະ ອຸດສາຫະກຳແຫ່ງຊາດລາວ ເພື່ອຮັບຟັງຂໍ້ມູນຈາກຝ່າຍລາວ ກ່ຽວກັບການປູກທຸລຽນໃນ ສປປ ລາວ ແລະ ຝ່າຍຈີນ ໄດ້ນຳສະເໜີຄວາມຕ້ອງການຊື້ທຸລຽນຂອງ ສປ ຈີນ.
ທ່ານ ບຸນທ່ຽງ ລັດຕະນະວົງ ປະທານສະມາຄົມທຸລະກິດກະສິກຳລາວ ໄດ້ນຳສະເໜີບົດບາດໜ້າທີ່ຂອງສະມາຄົມທຸລະກິດກະສິກຳລາວ ທີ່ເປັນຕົວແທນຂອງຜູ້ປະກອບການກະສິກຳ ເຊິ່ງປະກອບມີຜູ້ປະກອບການທຸລະກິດກະສິກຳຫຼາຍຂະແໜງການ ທັງຂະແໜງການປູກຝັງ, ລ້ຽງສັດ, ການປະມົງ, ການປຸງແຕ່ງສິນຄ້າກະສິກຳ ແລະ ຜູ້ສະໜອງປັດໄຈກະສິກຳ. ກຸ່ມຜູ້ປະກອບການສວນທຸລຽນ ແມ່ນກຸ່ມໜຶ່ງທີ່ຂຶ້ນກັບສະມາຄົມທຸລະກິດກະສິກຳລາວ.
ທ່ານ ເອລາວັນ ລາດປາກດີ ຕົວແທນຜູ້ປະກອບການສວນທຸລຽນລາວ ໄດ້ລາຍງານໃຫ້ຊາບວ່າ: ປັດຈຸບັນໃນກຸ່ມທີ່ຢູ່ໃນສະມາຄົມມີ 170 ສວນ ມີເນື້ອທີ່ທັງໝົດ 20.000 ເຮັກຕາ, ໃນນີ້ມີຈຳນວນໜຶ່ງທີ່ເລີ່ມເກັບກ່ຽວແລ້ວ ປະມານ 10.000 ກວ່າຕົ້ນ, ມີຜົນຜະລິດປະມານ 900 ໂຕນ, ເປົ້າໝາຍໃນປີ 2029 ຄາດວ່າຈະເກັບກ່ຽວປະມານ 270.000 ຕົ້ນ ຄາດວ່າຈະເກັບກ່ຽວໄດ້ 24.300 ໂຕນ ຄາດຄະເນມູນຄ່າ 155,5 ລ້ານໂດລາສະຫະລັດ, ໃນກຸ່ມຜູ້ປະກອບການຊາວສວນທຸລຽນລາວ ຍັງມີຜູ້ຊ່ຽວຊານກ່ຽວກັບການປູກ ແລະ ດູແລສວນແບບມືອາຊີບ.
ທ່ານ ເຖົາ ຈ້ຽນ ນັກລົງທຶນຈາກ ສປ ຈີນ ທີ່ມາລົງທຶນເຮັດສວນທຸລຽນຢູ່ ສປປ ລາວ ໄດ້ກ່າວວ່າ: ເພິ່ນໄດ້ເອົາແນວພັນມາຈາກປະເທດມາເລເຊຍ ມາຕໍ່ກັບຕົ້ນໝາກທຸລຽນພື້ນເມືອງຂອງລາວ ເຊິ່ງຕົ້ນທຸລຽນໃນສວນຂອງເພິ່ນເລີ່ມໃຫ້ໝາກແລ້ວ ເຫັນວ່າຄຸນນະພາບດີຫຼາຍ.
ທ່ານ ຫວານຈີ່ນ ນັກທຸລະກິດຜູ້ນຳເຂົ້າສິນຄ້າກະສິກຳ ໂດຍສະເພາະໝາກທຸລຽນ ລາຍງານໃຫ້ຮູ້ວ່າ: ຕາມຕົວເລກສະຖິຕິຂອງກົມໃຫຍ່ພາສີຂອງ ສປ ຈີນ ໃຫ້ຮູ້ວ່າ ໃນປີ 2022 ປະເທດຈີນ ນຳເຂົ້າທຸລຽນ 800.000 ໂຕນ, ປີ 2023 ນຳເຂົ້າ 1,3 ລ້ານໂຕນ, ສຳລັບປີ 2024 ເຄິ່ງປີ ນຳເຂົ້າປະມານ 1,4 ລ້ານໂຕນ ຄາດວ່າໝົດປີ 2024 ຈະມີສູງເຖິງ 2,3 ລ້ານໂຕນ; ຈາກຕົວເລກສະຖິຕິດັ່ງກ່າວ ເຫັນໄດ້ວ່າຄົນຈີນມີຄວາມນິຍົມບໍລິໂພກທຸລຽນສູງຂຶ້ນຢ່າງຕໍ່ເນື່ອງ.
ທ່ານຍັງໄດ້ມີຄຳເຫັນ ແລະ ຄຳແນະນຳວ່າ ທຸລຽນລາວ ມີໂອກາດສູງທີ່ຈະເຂົ້າໄປຂາຍຢູ່ປະເທດຈີນ ແຕ່ຜູ້ປະກອບການລາວ ຍັງຕ້ອງໄດ້ເຮັດວຽກອີກຫຼາຍຢ່າງ ເພື່ອໃຫ້ສິນຄ້າ ( ໝາກທຸລຽນລາວ ) ໄດ້ມາດຕະຖານຕາມເງື່ອນໄຂລະບຽບກົດໝາຍຂອງປະເທດຈີນ.
