ພິທີມອບ – ຮັບເງິນພັດທະນາໂຄງການອ້ອມອາຊີສາກົນ ແລະ ໂຄງການວຽງຈັນນະຄອນສີຂຽວງວດທໍາອິດ ມູນຄ່າ 400 ລ້ານໂດລາສະຫະລັດ ລະຫວ່າງ ບໍລິສັດ ການຄ້າຮາມດາອຸຍໂຮນດິ້ງສາກົນ ( ຜູ້ມອບ ) ຮັບໂດຍ ໂຄງການອ້ອມອາຊີສາກົນ ໂຄງການວຽງຈັນນະຄອນສີຂຽວ ມີຂຶ້ນໃນວັນທີ 19 ສິງຫາ 2024 ທີ່ຫ້ອງການ ໂຄງການອ້ອມອາຊີສາກົນ ໃນເຂດເສດຖະກິດພິເສດບຶງທາດຫຼວງ ນະຄອນຫຼວງວຽງຈັນ.
ເຂົ້າຮ່ວມມີ ທ່ານ ຈ້າວເພີຍຈົງ ( Zhao Peizhong ) ປະທານ ບໍລິສັດ ຊີນກາງ, ທ່ານ Younes Hamdaoui Ei Bou ປະທານ ບໍລິສັດການຄ້າ ຮາມດາອຸຍໂຮນດິ້ງ ສາກົນ ພ້ອມດ້ວຍຜູ້ຕາງໜ້າຈາກພາກສ່ວນກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ທ່ານ ຈ້າວເພີຍຈົງ ປະທານ ບໍລິສັດຊີນກາງ ກ່າວວ່າ: ຄວາມມີຊີວິດຊີວາ ແລະ ໂອກາດຂອງຕະຫຼາດອາຊີຕາເວັນອອກສ່ຽງໃຕ້ ຄວາມກ້າວໜ້າທາງເສດຖະກິດຂອງປະເທດລາວ ໄດ້ເລັ່ງຂະຫຍາຍຕົວຂຶ້ນຢ່າງຕໍ່ເນື່ອງ ໂດຍດຶງດູດນັກລົງທຶນຕ່າງຊາດໃຫ້ມາລົງທຶນໃນປະເທດຢ່າງຕໍ່ເນື່ອງ ແລະ ກາຍເປັນໜຶ່ງໃນພື້ນທີ່ ແລະ ການລົງທຶນທີ່ພົ້ນເດັ່ນທີ່ມີທ່າແຮງສູງສຸດໃນພື້ນທີ່ທາງອາຊີປາຊີຟິກ.
ນັບຕັ້ງແຕ່ເປີດຕົວໂຄງການອ້ອມອາຊີສາກົນ ໂຄງການວຽງຈັນນະຄອນສີຂຽວ ໃນປີ 2017 ຕະຫຼາດອາຊີຕາເວັນອອກສ່ຽງໃຕ້ ໄດ້ສະແດງໃຫ້ເຫັນເຖິງຄວາມມີຊີວິດຊີວາ ແລະ ໂອກາດໃນການເປັນຕະຫຼາດທີ່ພົ້ນເດັ່ນ.
ທ່ານ ດຣ. Younes Hamdaoui Ei Bou ປະທານ ກຸ່ມບໍລິສັດ ການຄ້າຮາມດາອຸຍ ກ່າວວ່າ: ພິທີລົງນາມຮ່ວມມືທາງກົນລະຍຸດ ລະຫວ່າງ ໂຄງການອ້ອມອາຊີສາກົນໂຄງການວຽງຈັນນະຄອນສີຂຽວ ແລະ ບໍລິສັດການຄ້າຮາມດາອຸຍ ຈາກປະເທດແອັດສະປາຍ ຊ່ວຍສົ່ງເສີມການແລກປ່ຽນທາງເສດຖະກິດ ແລະ ມິດຕະພາບຄວາມສໍາພັນລະຫວ່າງປະເທດຈີນ, ປະເທດລາວ ແລະ ປະເທດແອັດສະປາຍ, ຂ້າພະເຈົ້າຂໍໃຊ້ 3 ຄໍາ ໂດຍມີຄໍາວ່າ “ ໃໝ່ ” ເພື່ອປຶກສາຫາລືກ່ຽວກັບການພັດທະນາອະນາຄົດກັບທຸກທ່ານ.
ໂຄງການອ້ອມອາຊີສາກົນ, ໂຄງການວຽງຈັນນະຄອນສີຂຽວ ເລີ່ມກໍ່ສ້າງເມື່ອວັນທີ 5 ພະຈິກ 2019 ໃຊ້ເວລາກໍ່ສ້າງເກືອບ 5 ປີ, ໂຄງການອ້ອມອາຊີສາກົນ ມີຫຼາຍອາຄານ, ໃນນີ້ 8 ອາຄານສໍານັກງານຫ້ອງການ, 10 ອາຄານຄອນໂດມີນຽມ ແລະ 6 ອາຄານອາພາດເມັ້ນ ສໍາລັບໂຄງຮ່າງຂອງຕຶກແມ່ນສ້າງສໍາເລັດແລ້ວ. ສ່ວນໂຄງການວຽງຈັນນະຄອນສີຂຽວ ມີ 5 ອາຄານອາພາດເມັ້ນ, ເດືອນສິງຫາ 2023 ເປັນມື້ເປີດສູນການຕະຫຼາດຢ່າງເປັນທາງການ ແລະ ເດືອນຕຸລາ 2023 ເປັນມື້ເປີດຫ້ອງຕົວຢ່າງທີ່ຕົກແຕ່ງສົມບູນ.
