ການພັດທະນາເຂດເສດຖະກິດພິເສດ ( ຂພສ ) ຢູ່ ສປປ ລາວ ໄດ້ເລີ່ມຕົ້ນນັບແຕ່ປີ 2003 ເປັນຕົ້ນມາ ປັດຈຸບັນມີ ຂສພ ທັງໝົດ 21 ເຂດ ຕັ້ງຢູ່ໃນ 7 ແຂວງ ມີເນື້ອທີ່ຕາມສັນຍາພັດທະນາ 33.088 ເຮັກຕາ ແຕ່ປັດຈຸບັນເນື້ອທີ່ພັດທະນາຕົວຈິງມີພຽງແຕ່ 15 ພັນກວ່າເຮັກຕາ, ສາມາດດຶງດູດເອົານັກລົງທຶນຈາກພາຍໃນ ແລະ ຕ່າງປະເທດເຂົ້າມາລົງທຶນໄດ້ແລ້ວ 1.643 ບໍລິສັດ ມີທຶນຈົດທະບຽນປະມານ 20 ຕື້ກວ່າໂດລາສະຫະລັດ ແລະ ແຜນການລົງທຶນ 66 ຕື້ ກວ່າໂດລາສະຫະລັດ.
ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ( ຫຂສພ ) ກະຊວງແຜນການ ແລະ ການລົງທຶນເມື່ອມໍ່ໆມານີ້ ໂດຍໃຫ້ການຕ້ອນຮັບຂອງ ທ່ານ ສອນປະເສີດ ດາລາວົງ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ພ້ອມດ້ວຍຄະນະ ແລະ ສະມາຊິກພະນັກງານຫຼັກແຫຼ່ງປະຈໍາ ຫຂສພ ແລະ ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ເຂົ້າຮ່ວມ.
ໃນໂອກາດນີ້, ທ່ານ ສອນປະເສີດ ດາລາວົງ ໄດ້ລາຍງານໂດຍຫຍໍ້ກ່ຽວກັບສະພາບການພັດທະນາເຂດເສດຖະກິດພິເສດ ( ຂສພ ) ໃນໄລຍະຜ່ານມາວ່າ: ການພັດທະນາເຂດເສດຖະກິດພິເສດຢູ່ ສປປ ລາວ ໄດ້ເລີ່ມຕົ້ນນັບແຕ່ປີ 2003 ເປັນຕົ້ນມາ ແລະ ໄດ້ມີການເຕີບໃຫຍ່ຂະຫຍາຍຕົວເປັນກ້າວໆ ເຊິ່ງມາເຖິງປັດຈຸບັນທົ່ວປະເທດ ໄດ້ມີ ຂສພ ທັງໝົດ 21 ເຂດ ຕັ້ງຢູ່ໃນ 7 ແຂວງ ໄດ້ມີເນື້ອທີ່ຕາມສັນຍາພັດທະນາຈໍານວນ 33.088 ເຮັກຕາ ແຕ່ປັດຈຸບັນເນື້ອທີ່ພັດທະນາຕົວຈິງມີພຽງແຕ່ 15 ພັນກວ່າເຮັກຕາ, ສ່ວນທີ່ເຫຼືອຍັງຢູ່ໃນຂັ້ນຕອນສືບຕໍ່ການຊົດເຊີຍ.
ເຖິງຢ່າງໃດກໍຕາມ, ພື້ນທີ່ດັ່ງກ່າວແມ່ນສາມາດດຶງດູດເອົານັກລົງທຶນຈາກພາຍໃນ ແລະ ຕ່າງປະເທດເຂົ້າມາລົງທຶນໄດ້ແລ້ວ 1.643 ບໍລິສັດ ( ພາຍໃນ 218 ບໍລິສັດ, ຕ່າງປະເທດ 1.350 ບໍລິສັດ, ພາຍໃນຮ່ວມກັບຕ່າງປະເທດ 75 ບໍລິສັດ ); ສ່ວນໃຫຍ່ເປັນບໍລິສັດທີ່ມາຈາກ ສປ ຈີນ, ຍີ່ປຸ່ນ, ດານມາກ, ຝຣັ່ງ, ໄທ ແລະ ອື່ນໆ ມີທຶນຈົດທະບຽນປະມານ 20 ຕື້ກວ່າໂດລາສະຫະລັດ ແລະ ແຜນການລົງທຶນ 66 ຕື້ກວ່າໂດລາສະຫະລັດ.
ນອກຈາກນັ້ນ, ຍັງມີຫົວໜ່ວຍທຸລະກິດຂະໜາດນ້ອຍ – ກາງ ເຂົ້າມາລົງທຶນໃນຂະແໜງການຄ້າ, ການບໍລິການເຖິງ 3.000 ກວ່າຫ້າງຮ້ານ; ສາມາດປະຕິບັດພັນທະເຂົ້າງົບປະມານໄດ້ 1.300 ລ້ານກວ່າກີບ; ຂສພ ສາມາດຜະລິດເພື່ອສົ່ງອອກແລ້ວເປັນມູນຄ່າຫຼາຍກວ່າ 3,35 ຕື້ກວ່າໂດລາສະຫະລັດ ເຊິ່ງການສົ່ງອອກສ່ວນ ໃຫຍ່ເປັນຊິ້ນສ່ວນເອເລັກໂຕຣ ນິກ, ເລນແວ່ນຕາ, ກ້ອງຖ່າຍຮູບນິຄອນ, ຜະລິດຕະພັນເຄື່ອງນຸ່ງຫົ່ມ, ວິກຜົມ, ເຄື່ອງຫຼິ້ນເດັກນ້ອຍ ແລະ ອື່ນໆ ໂດຍສະເລ່ຍການສົ່ງອອກ ປະມານ 400 – 500 ລ້ານໂດລາຕໍ່ປີ ແລະ ຈະມີທ່າອ່ຽງເພີ່ມຂຶ້ນໄປເລື້ອຍໆ.
ປັດຈຸບັນ ຂສພ ສາມາດສ້າງວຽກເຮັດງານທໍາໄດ້ທັງໝົດ 84.540 ຄົນ ( ລາວ 38.544 ຄົນ ແລະ ຕ່າງປະເທດ 45.996 ຄົນ ).
ທ່ານ ເພັດ ພົມພິພັກ ກໍໄດ້ມີບາງຄໍາເຫັນເພື່ອເປັນທິດເຍືອງທາງໃຫ້ແກ່ການຈັດຕັ້ງປະຕິບັດ ວ່າ: ເພື່ອຮອງຮັບໃຫ້ແກ່ການພັດທະນາ ແລະ ເຕີບໃຫຍ່ຂະຫຍາຍຕົວໃນຕໍ່ໜ້າ ແມ່ນພວກເຮົາຈໍາເປັນຕ້ອງໄດ້ສືບຕໍ່ປັບປຸງຕື່ມບາງຈຸດ ເປັນຕົ້ນແມ່ນດ້ານບຸກຄະລາກອນ, ກົງຈັກການຈັດຕັ້ງ, ການກວດກາປະເມີນຄືນບັນດາສັນຍາຂອງແຕ່ລະເຂດ ເພື່ອເຮັດແນວໃດໃຫ້ເກີດຜົນປະໂຫຍດສູງສຸດໃຫ້ແກ່ການພັດທະນາ ກໍຄືການສ້າງ ຂສພ ໃຫ້ກາຍເປັນຖານເກັບລາຍຮັບທີ່ໝັ້ນຄົງໃຫ້ແກ່ລັດຖະບານ ກໍຄືສ້າງວຽກເຮັດງານທໍາ – ການຖ່າຍທອດເຕັກນິກວິຊາການມາສູ່ ສປປ ລາວ ໃຫ້ນັບມື້ຫຼາກຫຼາຍ ແລະ ມີຄຸນນະພາບ ລວມເຖິງການສ້າງໂຄງການມີສ່ວນຮ່ວມລະຫວ່າງເຂດເສດຖະກິດພິເສດ ແລະ ຊຸມຊົມອ້ອມຂ້າງ.
